لاہور:لاہور میں زیر تعمیر نجی ریسٹورنٹ میں گیس سلنڈر پھٹنے سے آگ لگنے کے باعث 26 افراد جھلس گئے۔

 ریسکیو کے مطابق لاہور کے علاقے وحدت روڈ پر واقع ایک زیر تعمیر ریسٹورنٹ میں کام جاری تھا کہ وہاں موجود گیس سلنڈر اچانک دھماکے سے پھٹ گیا اور آگ لگ گئی۔

 آگ نے دیکھتے ہی دیکھتے ریسٹورنٹ اور اس سے ملحقہ پلاسٹک کے برتنوں کی دکان کو لپیٹ میں لے لیا جس کے نتیجے میں26 افراد جھلس کر زخمی ہوگئے۔

 زخمیوں کو اسپتال منتقل کردیا گیا جن میں سے دو افراد کی حالت تشویشناک بتائی جا رہی ہے۔ ریسکیو حکام کے مطابق زخمی ہونے والوں میں  زیادہ تر مزدور  تھے،  جو عمارت میں کام میں مصروف تھے۔

آتشزدگی کی اطلاع ملتے ہی پولیس کی بھاری نفری بھی موقع پر پہنچ گئی۔ڈی سی او لاہور محمد عثمان نے آگ لگنے کے واقعے کی تحقیقات کے احکامات جاری کردیئے ہیں۔