اسلام آباد: الیکشن کمیشن آف پاکستان نے رواں سال کے بلدیاتی انتخابات میں انتخابی ضابطہ اخلاق کی خلاف ورزی پر کسی بھی منتخب عوامی نمائندہ کیخلاف پہلی اور بڑی کارروائی کرتے ہوئے  سندھ کے ایم پی اے بشیر ہالیپوٹو کی رکنیت ختم کردی۔

سندھ اسمبلی کے رکن بشیراحمد ہالیپوٹو  پی ایس  پچپن بدین سے پیپلزپارٹی کے رکن منتخب ہوئے تھے۔ ان کےخلاف گزشتہ بلدیاتی انتخابات میں انتخابی ضابطہ اخلاق کی خلاف ورزی کرنے کا الزام عائد کرتے ہوئے الیکشن کمیشن میں ریفرنس دائر کیا گیا تھا۔

انکے سیاسی مخالف حسام مرزا کے دائر مقدمہ کی سماعت چیف الیکشن کمشنر جسٹس ریٹائرڈ سردار رضا کی سربراہی میں کمیشن کے بنچ نے کی تھی ۔ مخالف فریق نے الزام عائد کیا تھا کہ بشیر ہالیپوٹو ، چیئرمین اور وائس چیئرمین الیکشن کے دوران پولنگ اسٹیشن کے عملے اور ووٹرز پر اثرانداز ہوئے، اس کے نتیجے میں انتخابی ضابطہ اخلاق کی خلاف ورزی کے مرتکب ہوئے ۔

 کمیشن نے اس حوالے سے پیش کردہ تصاویر اور ویڈیوز کے ثبوت کا جائزہ لینے کے بعد بشیر ہالیپوٹو کی سندھ اسمبلی سے رکنیت منسوخ کرنے کا حکم سنایا ۔