اسلام آباد: حکومت نے قومی شناختی کارڈ کی تصدیقی مہم مکمل کرتے ہوئے دو لاکھ سے زائد مشتبہ کارڈ روک دیئے ہیں، وفاقی وزیرداخلہ چوہدری نثار نے کہا ہے کہ مشرف دور حکومت میں قومی شناخت بیچنے کی اندھیرنگری مچی رہی۔

وزیرداخلہ چودھری نثار نے نادرا ہیڈکوارٹرز، اسلام آباد میں میڈیا کو بتایاکہ گزشتہ پیپلزپارٹی دور میں کم لیکن مشرف دور میں لاکھوں غیرملکیوں کو شناختی دستاویز دیئے گئے۔

وفاقی وزیر داخلہ نے مزید کہا کہ ان کی پڑتال کیلئے دوہزار گیارہ سے پہلے کبھی تصدیقی مہم نہیں چلائی گئی، موجودہ حکومت سے پہلے ادوار میں صرف  پانچ سو سے زائد کارڈز بلاک ہوئے ۔

چوہدری نثار کا کہنا تھاکہ موجودہ ساڑھے  تین سالہ دور میں ساڑھے  چار لاکھ کارڈز ، ساڑھے  بتیس ہزار پاسپورٹس بلاک ہوچکے ہیں۔ مزید تصدیق کا عمل پارلیمانی نگرانی میں ہوگا۔

انہوں نے کہاکہ شناختی کارڈ کی تصدیقی مہم کا تعلق قومی سلامتی سے ہے لیکن اس پر بہت تنقید کی گئی، مذموم مقاصد والے اسے رکوانا چاہتے ہیں۔

وزیرداخلہ کا کہناتھاکہ اگر کسی پاکستانی کا کارڈ بلاک ہے تو وہ  انیس سو اٹھہترسے پہلے کا اپنا یا مصدقہ خاندانی رکارڈ لائے، ڈومیسائل یا اراضی دستاویز دے تو کارڈ بحال کردیاجائے گا۔

چودھری نثار نے بتایا کہ خانانی اینڈ کالیا اور ایگزیکٹ کیسز کیلئے بھی نئی کمیٹیاں آئندہ ہفتے تک بنا دی جائیں گی ۔