کراچی:ایم کیوایم نے عمران فاروق قتل کیس میں گرفتارملزمان کے اعترافی بیانات کو مسترد کردیا اور کہا پارٹی کے کسی بھی شخص کاعمران فاروق قتل کیس سے کوئی تعلق نہیں نہ ہی کوئی کارکن اس میں ملوث ہے۔

ایم کیوایم انٹرنیشنل سیکرٹریٹ کے ای میل پر جاری کردہ بیان میں کہا گیا ہے کہ پاکستانی میڈیا پرچلنے والی رپورٹ کے مندرجات سے آگاہ ہیں،جن میں پاکستانی قانون نافذ کرنےوالے اداروں کے زیرحراست ملزمان نے مبینہ طور پر ڈاکٹرعمران فاروق کے قتل کا اعتراف کیا ہے۔

گرفتار افراد نے ایم کیوایم سے تعلق رکھنے والی شخصیت پر عمران فاروق کے قتل کے احکامات دینے کا الزام عائد کیا، بیان میں کہا گیا کہ ایم کیوایم گرفتار افراد کے اس بے بنیاد الزام کی تردید کرتی ہے اور واضح طور پر کہتی ہے کہ پارٹی کے کسی بھی شخص کاعمران فاروق قتل کیس سے کوئی تعلق نہیں ہے۔

ہم پہلے ہی اپنے دوست اور دیرینہ ساتھی ڈاکٹر عمران فاروق کی موت پرغمزدہ ہیں،ایم کیوایم برٹش میٹروپولیٹن پولیس سروس کوعمران فاروق قتل کیس کے حل کیلئے فراہم کی گئی ہر طرح کی معاونت کا خیرمقدم کرے گی۔