اسلام آباد:مولانا فضل الرحمن کہتے ہیں آل پارٹیزکانفرنس تصادم نہیں بلکہ مشاورت کا پلیٹ فارم ہے، اس میں شرکت کرنا فرض سمجھتے ہیں، حکومت راہداری منصوبے پر تحفظات کو فراخ دلی سے دور کرے۔

اسلام آباد میں اختر مینگل کے ساتھ مشترکہ پریس کانفرنس کرتے ہوئے مولانا فضل الرحمن نے کہا کہ کل جماعتی کانفرنس کی دعوت میں شرکت کرنا اپنا فرض سمجھتے ہیں،انہوں نے کہا کہ اے پی سی کو تصادم کا تصور نہیں دے رہے ہیں۔

مولانا فضل الرحمن نے کہا کہ پسماندہ علاقوں کو اقتصادی راہداری منصوبے سے بڑی امیدیں ہیں۔حکومت بھی لوگوں کے تحفظات فراخ دلی کے ساتھ دور کرنے کی کوشش کرے۔اس موقع پر اختر مینگل کا کہنا تھا کہ مذاکرات بامقصد ہونے چاہئے فوٹو سیشن تک محدود نہیں رہنے چاہئے۔

اختر مینگل کا کہنا تھا کہ کچھ خطرات کو محسوس کررہے ہیں جنہیں حکومت کے سامنے رکھنا چاہتے ہیں،انہوں نے کہا کہ قوم پرست، مذہبی سمیت تمام جماعتوں کو اے پی سی میں شرکت کی دعوت دی ہے۔