پاک فوج کے شعبہ تعلقات عامہ (آئی ایس پی آر) کے مطابق بھارتی سرپرستی میں کام کرنے والے فتنہ الہندوستان اور فتنہ الخوارج کے دہشت گرد نیٹ ورک کے خلاف سیکیورٹی فورسز کی کارروائیاں بلا تعطل جاری ہیں، جن کے تحت بلوچستان کے مختلف علاقوں میں مشترکہ آپریشنز کیے جا رہے ہیں۔

آئی ایس پی آر کے مطابق گزشتہ 48 گھنٹوں کے دوران بلوچستان کے ضلع سوراب اور ضلع مستونگ میں انٹیلی جنس بیسڈ آپریشنز کیے گئے، جن میں مجموعی طور پر 10 دہشت گرد مارے گئے۔

ترجمان کا کہنا ہے کہ سیکیورٹی فورسز نے دہشت گردوں کے ٹھکانوں کو مؤثر انداز میں نشانہ بنایا، ضلع سوراب میں آپریشن کے دوران 7 اور مستونگ میں 3 دہشت گردوں کو ہلاک کیا گیا۔

آئی ایس پی آر کے مطابق مستونگ آپریشن میں بھارتی سرپرستی میں سرگرم تنظیم فتنہ الہندوستان سے تعلق رکھنے والی 2 خودکش بمبار خواتین اور ایک سہولت کار کو بھی گرفتار کیا گیا جب کہ کارروائیوں کے دوران دہشت گروں کے قبضے سے اسلحہ، گولہ بارود اور دیسی ساختہ دھماکا خیز مواد (آئی ای ڈیز) بھی برآمد کیا گیا۔

ترجمان پاک فوج کا کہنا ہے کہ بھارتی سرپرستی میں کام کرنے والے دہشت گردوں کی موجودگی کے خاتمے کے لیے سینیٹائزیشن آپریشن جاری ہے تاکہ کسی بھی مبینہ دہشت گرد یا اس کے سہولت کار کو گرفتار کیا جا سکے۔

بیان میں مزید کہا گیا کہ نیشنل ایکشن پلان کے تحت منظور شدہ عزمِ استحکام وژن کے مطابق سیکیورٹی فورسز اور قانون نافذ کرنے والے اداروں کی دہشت گردی کے خلاف مہم پوری قوت سے جاری رہے گی تاکہ ملک سے بیرونی سرپرستی میں ہونے والی دہشت گردی کا مکمل خاتمہ کیا جا سکے۔

صدر، وزیراعظم، وزیر داخلہ کا فورسز کو خراج تحسین

دوسری جانب صدرِ مملکت آصف علی زرداری نے بلوچستان کے اضلاع سوراب اور مستونگ میں سیکیورٹی فورسز کی کارروائیوں کے دوران 10 دہشت گردوں کی ہلاکت پر سیکیورٹی فورسز کو خراجِ تحسین پیش کیا ہے۔

آصف زرداری نے کہا کہ بلوچستان میں بھارتی سرپرستی میں سرگرم مبینہ فتنہ الہندوستان اور فتنہ الخوارج کے دہشتگرد نیٹ ورکس کے خلاف سیکیورٹی فورسز کی مؤثر کارروائیاں قومی امن و استحکام کے لیے ناگزیر ہیں، بیرونی مداخلت کی وجہ سے ہونے والی دہشت گردی کے خلاف جنگ جاری رہے گی اور پاکستان اس خطرے کے خاتمے کے لیے پرعزم ہے۔

انہوں نے مزید کہا کہ پوری قوم دہشت گردی کے خلاف جنگ میں سیکیورٹی فورسز اور قانون نافذ کرنے والے اداروں کے شانہ بشانہ کھڑی ہے اور ملک میں امن کے قیام کے لیے ان کی قربانیوں کو قدر کی نگاہ سے دیکھتی ہے۔

وزیراعظم شہباز شریف نے بلوچستان کے اضلاع سوراب اور مستونگ میں فتنہ الخوارج اور فتنہ الہندوستان کے دہشت گردوں کے خلاف کامیاب آپریشن پر سیکیورٹی فورسز کے افسران اور اہلکاروں کو خراجِ تحسین پیش کیا ہے۔

وزیراعظم نے آپریشن کے دوران 10 دہشت گردوں کو ہلاک کرنے اور 2 خودکش بمبار خواتین سمیت ایک سہولت کار کو گرفتار کرنے پر سیکیورٹی فورسز کی پیشہ ورانہ صلاحیتوں کو سراہا۔

شہباز شریف نے کہا کہ کسی کو بھی بلوچستان کا امن تباہ کرنے کی اجازت نہیں دی جائے گی۔ انہوں نے اس عزم کا اظہار کیا کہ ملک سے دہشت گردی کے مکمل خاتمے تک اس کے خلاف جنگ جاری رکھی جائے گی۔

انہوں نے مزید کہا کہ دہشت گرد بلوچستان اور اس کے عوام کی ترقی و خوشحالی کے دشمن ہیں جب کہ پوری قوم دہشت گردی کے خلاف جنگ میں اپنی سیکیورٹی فورسز کے ساتھ کھڑی ہے، وہ خود اور پوری قوم وطنِ عزیز کے دفاع اور امن و استحکام کے قیام کے لیے افواجِ پاکستان کے غیر متزلزل عزم میں ان کے شانہ بشانہ ہیں۔

وفاقی وزیر داخلہ محسن نقوی نے بھی مستونگ اور سوراب میں فتنہ الہندوستان کے دہشت گردوں کے خلاف کامیاب انٹیلی جنس بیسڈ آپریشنز پر سیکیورٹی فورسز کو خراج تحسین پیش کیا ہے۔

محسن نقوی نے کہا کہ فتنہ الہندوستان کے 10 دہشت گردوں کو جہنم واصل کرنے پر سیکیورٹی فورسز کو خراج تحسین پیش کرتا ہوں۔ انہوں نے سیکیورٹی فورسز کی پیشہ ورانہ صلاحیتوں اور بہادری کو سراہتے ہوئے کہا کہ بلوچستان میں قیام امن کے لیے سیکیورٹی فورسز کی کارروائیاں قابل تحسین ہیں۔

وفاقی وزیر داخلہ نے مزید کہا کہ دہشت گردوں کے خلاف انٹیلی جنس بیسڈ آپریشنز امن و استحکام کے لیے ناگزیر ہیں، سیکیورٹی فورسز کے افسران اور جوان ہمارے سر کا تاج اور اصل ہیرو ہیں۔ انہوں نے کہا کہ بھارتی اسپانسرڈ دہشت گردوں کا صفایا کرنے والے جری سپوتوں پر قوم کو ناز ہے۔

پٹرول پمپ مالکان اور ڈیلرز کی جانب سے ملک گیر ہڑتال کی کال کے بعد حکومت نے پیٹرولیم اونرز ایسوسی ایشن کو مذاکرات کے لیے طلب کرلیا ہے۔

پیٹرولیم اونرز ایسوسی ایشن نے بھی آج رات 12 بجے سے ملک بھر کے تمام پٹرول پمپ بند کرنے کا اعلان کر رکھا ہے۔ ایسوسی ایشن کے مختلف دھڑوں نے متفقہ طور پر حکومت کے سامنے تین اہم مطالبات رکھے ہیں۔

ذرائع کے مطابق ڈیلرز کا پہلا مطالبہ ہے کہ ان کے منافع کا مارجن موجودہ 2.6 فیصد سے بڑھا کر 8 فیصد کیا جائے۔ دوسرا مطالبہ پٹرولیم مصنوعات کی قیمتوں کے روزانہ تعین کے بجائے دوبارہ 15 روزہ یا ماہانہ بنیادوں پر تعین ہے جب کہ تیسرا مطالبہ آئل مارکیٹنگ کمپنیوں کی جانب سے نافذ کیے گئے کوٹہ سسٹم کے خاتمے پر مبنی ہے۔

یاد رہے کہ وفاقی حکومت نے 18 جولائی کو پٹرولیم مصنوعات کی قیمتوں کے تعین کا اختیار آئل اینڈ گیس ریگولیٹری اتھارٹی (اوگرا) کے سپرد کرتے ہوئے اعلان کیا تھا کہ پٹرول اور ہائی اسپیڈ ڈیزل کی قیمتوں کا تعین روزانہ کی بنیاد پر کیا جائے گا، جب کہ اوگرا نئی قیمتیں اپنی ویب سائٹ پر جاری کرے گی۔

اس فیصلے کے بعد 18 جولائی کی رات آئندہ تین روز کے لیے پٹرول کی قیمت میں 5 روپے 44 پیسے جب کہ ہائی اسپیڈ ڈیزل کی قیمت میں 31 روپے فی لیٹر اضافہ کیا گیا تھا۔ اس کے بعد سے روزانہ کی بنیاد پر پٹرولیم مصنوعات کی قیمتوں کا تعین جاری ہے۔

حکومت کی نئی پالیسی پر عوام، ٹرانسپورٹرز اور پٹرول پمپ مالکان مسلسل تحفظات کا اظہار کر رہے ہیں۔ ڈیزل مہنگا ہونے کے بعد ملک بھر میں ٹرانسپورٹرز نے کرایوں میں بھی اضافہ کر دیا، جبکہ پٹرولیم ڈیلرز ایسوسی ایشن کے تمام دھڑوں نے روزانہ قیمتوں کے تعین کی پالیسی واپس نہ لینے کی صورت میں احتجاج اور ہڑتال کی دھمکی دے رکھی ہے۔

دفترِ خارجہ پاکستان کی جانب سے جاری کیے گئے ایک بیان میں کہا گیا ہے کہ ”ایسے اقدامات علاقائی سلامتی کے لیے خطرہ ہیں، بحری جہاز رانی کی آزادی کو متاثر کرتے ہیں، بین الاقوامی قانون کے اصولوں کو چیلنج کرتے ہیں اور عالمی تجارت کی بلا تعطل کی آمد و رفت کو خطرے میں ڈالتے ہیں“۔

دفترِ خارجہ کا کہنا ہے کہ سعودی عرب کے ساتھ قانونی تجارتی سرگرمیوں میں مصروف بحری جہازوں کو دی جانے والی یہ دھمکیاں بالکل ناقابلِ قبول اور بین الاقوامی قوانین کی خلاف ورزی ہیں۔

پاکستان نے اس بات کا بھی اعادہ کیا ہے کہ اگر کسی بھی پاکستانی بحری جہاز یا پاکستان کے سمندری مفادات کے خلاف کوئی جارحانہ اقدام کیا گیا تو اسے ملک کی قومی سلامتی اور خودمختار مفادات کے لیے ایک انتہائی سنگین خطرہ تصور کیا جائے گا۔

ترجمان دفتر خارجہ نے زور دے کر کہا کہ ”اقوام متحدہ کے چارٹر اور بین الاقوامی قوانین کے مطابق پاکستان اپنے بحری اثاثوں اور قومی مفادات کا تحفظ کرنے کے لیے تمام ضروری اقدامات اٹھانے کا حق محفوظ رکھتا ہے، جس میں سیلف ڈیفنس یعنی اپنے دفاع میں قانونی طاقت کا استعمال بھی شامل ہے“۔

دفترِ خارجہ نے مشرقِ وسطیٰ میں جاری تنازع کے اندر سعودی عرب کو گھسیٹنے کی کوششوں پر شدید تشویش کا اظہار کیا ہے۔

انہوں نے واضح کیا کہ ”پاکستان اپنے برادر ملک مملکتِ سعودی عرب کی سلامتی، خودمختاری، علاقائی سلامتی اور خوشحالی کے لیے اپنی غیر متزلزل حمایت کا اعادہ کرتا ہے“۔

پاکستان نے مذاکرات، سفارت کاری اور خطے میں کشیدگی کو کم کرنے کے اپنے عزم کو دہراتے ہوئے تمام فریقین سے مطالبہ کیا ہے کہ وہ بین الاقوامی قوانین کا احترام کریں اور عالمی بحری راستوں اور تجارتی جہاز رانی کے امن و امان کو یقینی بنائیں۔

مشرق وسطیٰ، شمالی افریقہ، افغانستان اور پاکستان کے لیے کینوا کے جنرل مینیجر احمد اقبال نے لنکڈ ان پر ایک پوسٹ میں بتایا ہے کہ ان کی کمپنی پی آئی اے کی اعلیٰ انتظامیہ سے رابطہ کرنے کی کوشش کر رہی ہے۔

ان کا کہنا تھا کہ اس منصوبے کے تحت پی آئی اے کے پرانے نشان، ڈیزائن، جہازوں کے اوپر کی جانے والی پینٹنگز اور مارکیٹنگ کی مہم کو بالکل نئے انداز میں تیار کیا جائے گا۔ احمد اقبال کے مطابق یہ اقدام ایئرلائن پر عوام کا اعتماد بحال کرنے کا ایک موقع بن سکتا ہے۔

انہوں نے اپنی پوسٹ میں لکھا، ”پاکستانیوں کے ذریعے، پاکستان کے لیے ڈیزائن“۔ احمد اقبال نے کہا کہ کینوا اس مقابلے کے لیے ”بڑی انعامی رقم“ دینے کے لیے تیار ہے تاکہ پاکستانی ڈیزائنرز کو اپنی صلاحیت دکھانے کا موقع مل سکے۔

انہوں نے ماضی کی یادیں تازہ کرتے ہوئے کہا کہ پی آئی اے کی اپنی ایک شان دار تاریخ رہی ہے اور سال 2026 میں ایئر لائن کی نئی ملکیت کے ساتھ اس کا ایک نیا سفر شروع ہو رہا ہے۔ عوامی سطح پر لوگوں کو اس تبدیلی میں شامل کرنے سے نہ صرف ایوی ایشن کا پرانا وقار بحال ہو گا بلکہ پاکستان کے ڈیزائن، ثقافت اور قومی فخر کو فروغ مل سکتا ہے۔

احمد اقبال نے سوشل میڈیا پر پی آئی اے کے دو ایسے جہازوں کی تصاویر بھی شیئر کیں جن پر سندھ کی مشہور اجرک کے خوبصورت رنگ بنے ہوئے تھے۔ انہوں نے بتایا کہ یہ ڈیزائن کسی پیشہ ور ڈیزائنر نے نہیں بلکہ ایک عام شخص نے کینوا کے ٹولز کا استعمال کرتے ہوئے بنایا تھا۔ انہوں نے سوال کیا، ”ذرا تصور کریں کہ پورا ملک مل کر کیا کر سکتا ہے۔“

کینوا کی اس پیشکش کے بعد انٹرنیٹ پر لوگوں کی بڑی تعداد کے درمیان بحث شروع ہو گئی۔ کچھ لوگوں نے اس سوچ کو سراہتے ہوئے کہا کہ اس سے ملک کے نوجوانوں اور نیا کام کرنے والے فنکاروں کو اپنا ہنر دکھانے اور اپنی ثقافت کو دنیا کے سامنے لانے کا بہترین موقع ملے گا۔

دوسری طرف کچھ لوگوں نے اس پر خدشات کا اظہار بھی کیا۔ بعض صارفین کا کہنا تھا کہ جہازوں پر زیادہ شوخ یا زیادہ پینٹ کرنے سے ان کا وزن بڑھ جاتا ہے جس سے جہاز کا خرچہ زیادہ ہوتا ہے۔

کچھ لوگوں کا کہنا تھا کہ جہازوں پر گہرے رنگ لگانے سے وہ دھوپ میں زیادہ گرم ہو جاتے ہیں اور انہیں ٹھنڈا رکھنے کے لیے زیادہ محنت کرنا پڑتی ہے۔ ماہرین اور صارفین کا یہ بھی ماننا تھا کہ نیا روپ بناتے وقت خوبصورتی کے ساتھ ساتھ جہازوں کی تکنیکی ضرورتوں کا خیال رکھنا بھی بہت ضروری ہے۔

پی آئی اے کی نئی شناخت سے متعلق کینوا کی تجویز ایسے وقت میں سامنے آئی ہے جب قومی ایئرلائن اپنی ساکھ بہتر بنانے اور نئے دور میں داخل ہونے کی کوشش کر رہی ہے۔ اب دیکھنا یہ ہے کہ یہ تجویز عملی شکل اختیار کرتی ہے یا نہیں اور اگر مقابلہ منعقد ہوتا ہے تو پاکستانی ڈیزائنرز قومی ایئرلائن کے لیے کس طرح کی نئی پہچان تخلیق کرتے ہیں۔

پروونشل ڈیزاسٹر مینجمنٹ اتھارٹی (پی ڈی ایم اے) خیبرپختونخوا کے مطابق گزشتہ 24 گھنٹے میں خیبرپختونخوا کے مختلف اضلاع میں مختلف حادثات کے نتیجے میں 18 افراد جاں بحق اور 19 افراد زخمی ہو چکے ہیں۔

پی ڈی ایم اے نے اپنے جاری کردہ بیان میں بتایا ہے کہ ”جاں بحق ہونے والے افراد میں 7 مرد، 8 بچے اور 3 خواتین شامل ہیں، جبکہ زخمیوں میں 11 مرد، 4 خواتین اور 4 بچے شامل ہیں“۔

پی ڈی ایم اے رپورٹ کے مطابق، بارشوں اور فلش فلڈ سے اب تک 28 مکانات متاثر ہوئے ہیں جن میں سے 6 گھر مکمل طور پر منہدم جبکہ 22 کو جزوی نقصان پہنچا ہے۔

پی ڈی ایم اے کی رپورٹ کے مطابق حادثات پشاور، نوشہرہ، خیبر، مردان، بونیر، باجوڑ، شانگلہ، صوابی، چترال لوئر، دیر لوئر و اپر، ایبٹ آباد، مانسہرہ، تورغر، کرم اور شمالی وزیرستان میں پیش آئے ہیں۔

ترجمان پی ڈی ایم اے نے بتایا ہے کہ ”پی ڈی ایم اے، ریسکیو 1122 اور ضلعی انتظامیہ کی جانب سے تمام متاثرہ علاقوں میں امدادی سرگرمیاں مسلسل جاری ہیں، جبکہ صوبے کے تمام دریاؤں اور ندی نالوں میں فی الحال پانی کی سطح اور بہاؤ معمول کے مطابق ہے“۔

پی ڈی ایم اے نے یہ بھی تنبیہ کی ہے کہ صوبے میں بارشوں کا یہ سلسلہ 23 جولائی تک وقفے وقفے سے جاری رہنے کا امکان ہے۔

علاوہ ازیں، جنوبی وزیرستان کے علاقے سراروغہ میں بھی بارش کے دوران مکان کی چھت گرگئی، جس کے نتیجے میں چار افراد جاں بحق ہوگئے۔ جاں بحق افراد میں میاں بیوی اور2 بچے شامل ہیں۔

پنجاب میں بھی مون سون بارشوں کے باعث مختلف دریاؤں اور ندی نالوں میں پانی کی سطح مسلسل بلند ہو رہی ہے۔ پروونشل ڈیزاسٹر مینجمنٹ اتھارٹی (پی ڈی ایم اے) پنجاب کے مطابق صوبے میں مون سون بارشوں کا دوسرا اسپیل 24 جولائی تک جاری رہنے کا امکان ہے، جس کے باعث بالائی علاقوں میں مزید بارشوں سے دریاؤں میں پانی کے بہاؤ میں اضافے کا خدشہ ہے۔

پی ڈی ایم اے پنجاب نے دریاؤں کی موجودہ صورتحال کی تفصیلات جاری کرتے ہوئے بتایا ہے کہ دریائے سندھ میں کالاباغ اور چشمہ کے مقام پر نچلے درجے کی سیلابی صورتحال ہے۔ اس وقت کالاباغ کے مقام پر پانی کا بہاؤ 3 لاکھ 17 ہزار کیوسک جبکہ چشمہ کے مقام پر 2 لاکھ 95 ہزار کیوسک ریکارڈ کیا گیا ہے۔

دوسری جانب دریائے چناب میں بھی پانی کی آمد بڑھ رہی ہے، جہاں مرالہ کے مقام پر 1 لاکھ 28 ہزار کیوسک اور قادر آباد کے مقام پر 1 لاکھ 57 ہزار کیوسک کے ساتھ نچلے درجے کا سیلاب ہے۔ تاہم، چناب میں خانکی کے مقام پر پانی کا بہاؤ 1 لاکھ 52 ہزار کیوسک ہے اور وہاں درمیانے درجے کا سیلاب ریکارڈ کیا گیا ہے۔

اس کے برعکس دریائے راوی، ستلج اور جہلم میں فی الحال پانی کا بہاؤ نارمل ہے، جبکہ نالہ بئیں میں نچلے درجے کی سیلابی صورتحال موجود ہے۔

اس ابھرتی ہوئی صورتحال کے پیش نظر ڈی جی پی ڈی ایم اے عمر عباس میلہ نے شہریوں سے احتیاط برتنے کی اپیل کی ہے۔

انہوں نے ہدایات جاری کرتے ہوئے کہا کہ ”دریاؤں کے پاٹ میں موجود شہری فوری طور پر محفوظ مقامات پر منتقل ہو جائیں“۔

ڈی جی پی ڈی ایم اے نے عوام کے لیے خصوصی احتیاطی تدابیر کی تاکید کرتے ہوئے کہا کہ ”شہری موسم اور سیلاب کی صورتحال کے پیش نظر احتیاطی تدابیر اختیار کریں اور دریاؤں، نہروں اور ندی نالوں کے اطراف سیرو تفریح کے لیے جانے سے بالکل گریز کریں“۔

انہوں نے انتظامیہ کو ہدایت دی ہے کہ ”دریاؤں کی کراسنگ کے لیے معیاری بوٹس اور لائف جیکٹس کی فراہمی کو ہر صورت یقینی بنایا جائے“۔ اس کے ساتھ ساتھ انہوں نے والدین سے بھی اپیل کی کہ ”بچوں کا خاص خیال رکھیں اور انہیں کسی صورت بھی دریاؤں یا ندی نالوں میں نہانے کے لیے نہ جانے دیں“۔

دوسری جانب لنڈیکوتل میں بھی مون سون کے پیشِ نظر پاک افغان شاہراہ پر ریسکیو ٹیمیں تعینات کر دی گئی ہیں۔

ریسکیو حکام نے بتایا ہے کہ ”ریسکیو ٹیمیں 7 مختلف ہائی رسک مقامات پر ڈیوٹی پر موجود ہیں اور تمام ریسکیو اسٹیشنز اور ریفرل پوائنٹس پر عملے کو الرٹ رکھ دیا گیا ہے“۔

ریسکیو اداروں نے شہریوں سے اپیل کی ہے کہ ”عوام ندی نالوں سے دور رہیں اور بچوں کو پانی کے قریب نہ جانے دیں“۔

ادھر پنجاب کے ضلع وزیرآباد اور گردونواح میں گزشتہ 36 گھنٹوں سے جاری وقفے وقفے کی بارش نے عام زندگی کو شدید متاثر کر دیا ہے۔

ہیڈ مرالہ، خانکی اور قادر آباد بیراج کے مقامات پر نچلے درجے کا سیلاب ریکارڈ کیا گیا ہے۔

سرکاری اعداد و شمار کے مطابق ہیڈ مرالہ پر پانی کی آمد 128,128 کیوسک جبکہ اخراج 108,078 کیوسک ہے، خانکی بیراج پر آمد 157,874 اور اخراج 152,024 کیوسک، جبکہ قادر آباد بیراج پر پانی کی آمد 157,725 اور اخراج 139,225 کیوسک ریکارڈ کیا گیا ہے۔

خطرے کے پیشِ نظر ضلعی انتظامیہ کی جانب سے مساجد میں اعلانات کروائے گئے ہیں جن میں دریا کے کنارے آباد شہریوں کو اپنے مال مویشیوں سمیت فوری طور پر محفوظ مقامات پر منتقل ہونے کی ہدایات جاری کی گئی ہیں۔

منگل کو لاہور میں ایڈیشنل سیشن جج نصرت علی صدیقی نے اینکرپرسن ریحان طارق کی بعد از گرفتاری ضمانت کی درخواست پر سماعت کی۔ سماعت کے دوران ریحان طارق کی جانب سے ایڈووکیٹ میاں داؤد پیش ہوئے اور اپنے دلائل عدالت کے سامنے رکھے۔

وکیل میاں داؤد نے مؤقف اختیار کیا کہ ایف آئی آر کے متن سے کسی بھی وقوعے کا ثابت ہونا ظاہر نہیں ہوتا۔ انہوں نے کہا کہ پاکستان کے کسی بھی قانون میں تاریخی مذہبی سوالات پر مبنی کسی شخص کا انٹرویو کرنا قابلِ دست اندازی جرم قرار نہیں دیا گیا۔

وکیل صفائی نے مزید مؤقف اختیار کیا کہ اس مقدمے میں صحافی کی کوئی الیکٹرانک ڈیوائس استعمال نہیں ہوئی جب کہ تفتیش کے دوران بھی ریحان طارق کے خلاف زیرِ تنازع ویڈیو یا انٹرویو اپ لوڈ کرنے کا ایک بھی ثبوت سامنے نہیں آیا۔

انہوں نے عدالت کو بتایا کہ ایف آئی آر میں عائد کی گئی تمام دفعات ضابطہ فوجداری کے تحت غیرممنوعہ نوعیت کی ہیں، جن میں ملزم کو ضمانت دینا اس کا آئینی حق ہے۔

دلائل مکمل ہونے کے بعد ایڈیشنل سیشن جج نصرت علی صدیقی نے درخواست پر فیصلہ سناتے ہوئے اینکرپرسن ریحان طارق کی بعد از گرفتاری ضمانت ایک لاکھ روپے کے مچلکوں کے عوض منظور کر لی۔

واضح رہے کہ نیشنل سائبر کرائم انویسٹی گیشن ایجنسی (این سی سی آئی اے) نے ریحان طارق کے خلاف توہین مذہب کے الزام میں مقدمہ درج کر رکھا ہے۔

واضح رہے کہ ریلوے ٹریکس پر حادثات کا یہ پہلا واقعہ نہیں ہے۔ اس سے محض دو روز قبل بھی کراچی سے پنجاب جانے والی کوئلہ بردار مال گاڑی وہاب شاہ ریلوے اسٹیشن کے قریب پٹڑی سے اتر گئی تھی۔

اس حادثے کے نتیجے میں اپ اور ڈاؤن دونوں ریلوے ٹریکس شدید متاثر ہوئے تھے، جس سے ملک کے اس اہم ترین ریلوے روٹ پر گاڑیاں مکمل طور پر رک گئی تھیں۔

اُس وقت ریلوے ٹریک کو دوبارہ بحال کرنے میں عملے کو 24 گھنٹے کا طویل وقت لگا تھا اور تب تک پنجاب آنے اور جانے والی تمام ریل گاڑیوں کی آمد و رفت مکمل طور پر معطل رہی تھی۔

چیف الیکشن کمشنر جسٹس ریٹائرڈ غلام مصطفیٰ مغل نے ترمیمی انتخابی شیڈول جاری کردیا ہے۔ نئے شیڈول کے مطابق پہلے مرحلے میں میرپور ڈویژن کے 3 اضلاع میرپور، بھمبر اور کوٹلہ کے 13 انتخابی حلقوں میں پولنگ 27 جولائی کو ہو گی۔

دوسرے مرحلے میں مظفرپور ڈویژن کے 3 اضلاع نیلم، جہلم ویلی اور مظفرآباد کے 9 اور مہاجرین جموں و کشمیر مقیم پاکستان کے 12 انتخابی حلقوں میں 2 اگست کو پولنگ ہوگی۔

انتخابات کا آخری مرحلہ 10 اگست کو ہوگا، پونچھ ڈویژن کے 4 اضلاع پونچھ راولاکوٹ، سدھنوتی، حویلی اور باغ کے 11 انتخابی حلقوں میں پولنگ ہوگی۔

چیف الیکشن کمشنر جسٹس ریٹائرڈ غلام مصطفیٰ مغل نے پر یس کانفرنس کرتے ہوئے کہا کہ تمام سیاسی جماعتوں کی قیادت کی مشاورت سے سیکورٹی فورسز کی کمی کے باعث انتخابات تین مراحل میں ڈویژن کی سطح پر کرانے کا فیصلہ کیا گیا ہے۔

چیف الیکشن کمشنر نے واضح کیا ہے کہ انتخابات کے نتائج بھی روایتی انداز کے بجائے مرحلہ وار ہی جاری کیے جائیں گے۔ انہوں نے کہا یہ نہیں کہا جا سکتا کہ آزاد کشمیر میں حالات بہت خراب ہیں، فوج کی خدمات تو تب حاصل کی جاتی ہیں جب حالات بالکل کنٹرول سے باہر ہوں، ہم مرحلہ وار انتخابات اسی لیے کرا رہے ہیں تاکہ امن و امان قائم رہے اور ووٹرز کو شفاف ماحول مل سکے۔

انہوں نے پریس کانفرنس میں اعتراف کیا کہ عوامی اور سیاسی حلقوں میں یہ شدید شک و شبہات پائے جا رہے تھے کہ موجودہ حالات کے پیشِ نظر شاید انتخابات ملتوی کر دیے جائیں تاہم الیکشن کمیشن نے حتمی مشاورت کے بعد نظرثانی شدہ ضابطہ کار تیار کر کے نیا پولنگ پروگرام جاری کر دیا ہے۔

غلام مصطفیٰ مغل نے دوٹوک الفاظ میں کہا کہ الیکشن کمیشن کا کام ریاست چلانا نہیں بلکہ انتخابات کرانا ہے اور ہم اپنا کام بخوبی کر رہے ہیں۔

سرکاری ملازمین کے لیے پولنگ کا مرحلہ مکمل

دوسری جانب آزاد جموں و کشمیر میں عام انتخابات کے دوران ڈیوٹی انجام دینے والے سرکاری ملازمین کے لیے پولنگ کا مرحلہ مکمل کرلیا گیا ہے۔

سرکاری ملازمین کے لیے پولنگ کا عمل گزشتہ روز صبح 8 سے شام 5 بجے تک پرامن ماحول میں جاری رہا، 3 ڈویژنز کے 8 اضلاع میں مجموعی طور پر 24 ہزار 40 ملازمین نے ووٹنگ کے عمل میں حصہ لیا۔

راولاکوٹ ڈویژن کے 2 اضلاع کی 4 قانون ساز اسمبلی نشستوں پر 4 ہزار 278 ووٹ کاسٹ کیے گئے۔ میرپورڈویژن کے 3 اضلاع کی 13 قانون ساز اسمبلی نشستوں پر 12 ہزار 41 سرکاری ملازمین نے ووٹ کاسٹ کیا جب کہ مظفرآباد ڈویژن کے 3 اضلاع کی 9 قانون ساز اسمبلی نشستوں پر 7 ہزار 721 ووٹ کاسٹ کیے گئے۔

پولنگ کے عمل کے بعد سیل شدہ بیلٹ باکسز اور تمام انتخابی سامان مقررہ ضابطے کے تحت متعلقہ ریٹرننگ افسران کے سپرد کردیا گیا۔ ان ووٹوں کی گنتی اور سرکاری نتائج کا باضابطہ اعلان عام انتخابات کے لیے مقرر کردہ پولنگ کے روز کیا جائے گا۔

نئے احکامات کے تحت بنیادی اسکیلز 2022 کی جگہ اب نئے پے اسکیلز 2026 کا نفاذ کر دیا گیا ہے اور یہ نیا فریم ورک فوری طور پر نافذ العمل ہوگا۔

حکومت کے جاری کردہ نوٹیفیکیشن کے مطابق گریڈ 1 کے ملازم کی کم از کم تنخواہ 13 ہزار 550 روپے سے بڑھا کر 16 ہزار 280 روپے مقرر کی گئی ہے، جبکہ ان کا سالانہ اضافہ بھی 430 روپے سے بڑھا کر 520 روپے کر دیا گیا ہے۔

نئے اسکیلز کے مطابق مختلف گریڈز کی بنیادی تنخواہوں میں نمایاں ترمیم کی گئی ہے۔

گریڈ 16 کے ملازمین کی بنیادی تنخواہ 33 ہزار 720 روپے اور زیادہ سے زیادہ حد 1 لاکھ 15 ہزار 320 روپے طے کی گئی ہے۔

اسی طرح گریڈ 17 کے افسران کی بنیادی تنخواہ 45 ہزار 70 روپے سے بڑھا کر 54 ہزار 140 روپے کر دی گئی ہے۔

جبکہ گریڈ 22 کے اعلیٰ افسر کے لیے بنیادی تنخواہ 1 لاکھ 46 ہزار 770 روپے اور زیادہ سے زیادہ حد 2 لاکھ 93 ہزار 350 روپے مقرر کی گئی ہے۔

حکومت نے پے اسکیلز 2026 کے نفاذ کے دوران پیدا ہونے والے کسی بھی ابہام یا مسئلے کو دور کرنے کے لیے ایک اینوملی کمیٹی بھی قائم کر دی ہے۔

اس کے علاوہ، گریڈ 17 سے گریڈ 22 تک کے افسران کے لیے پے اسکیلز 2022 کے تحت ایگزیکٹو الاؤنس کی بھی منظوری دی گئی ہے، جس کا نفاذ یکم جولائی 2026 سے ہوگا۔ ساتھ ہی گریڈ 1 سے گریڈ 22 تک کے تمام وفاقی ملازمین کے کنوینس الاؤنس کی شرح میں یکمشت 50 فیصد کا اضافہ کیا گیا ہے اور اس کی بھی ترمیم کا نوٹیفیکیشن جاری کر دیا گیا ہے۔

نئے سفری الاؤنس کے تحت گریڈ 1 سے 4 کے ملازمین کے لیے کنوینس الاؤنس 1 ہزار 785 روپے سے بڑھا کر 2 ہزار 678 روپے جبکہ گریڈ 5 سے 10 کے ملازمین کے لیے نیا ماہانہ کنوینس الاؤنس 2 ہزار 898 روپے مقرر کیا گیا ہے۔ گریڈ 11 سے 15 کے ملازمین کا الاؤنس 2 ہزار 856 روپے سے بڑھا کر 4 ہزار 284 روپے ماہانہ کر دیا گیا ہے۔

گریڈ 16 یا اس سے اوپر کے تمام افسران کا سفری الاؤنس 5 ہزار روپے سے بڑھا کر 7 ہزار 500 روپے کر دیا گیا ہے۔ کنوینس الاؤنس کی ان تمام نئی شرحوں کا اطلاق بھی یکم جولائی 2026 سے نافذ تصور کیا جائے گا۔

پاک فوج کے شعبہ تعلقات عامہ (آئی ایس پی آر) کے مطابق منگل کے روز ایران کے وزیر داخلہ اسکندر مومنی نے جنرل ہیڈ کوارٹرز (جی ایچ کیو) راولپنڈی کا دورہ کیا اور آرمی چیف و چیف آف ڈیفنس فورسز فیلڈ مارشل سید عاصم منیر سے ملاقات کی۔

آئی ایس پی آر کے مطابق اس ملاقات میں باہمی دلچسپی کے امور، علاقائی اور دو طرفہ سیکیورٹی اور مؤثر بارڈر مینجمنٹ پر تبادلہ خیال کیا گیا۔

ایرانی وزیر داخلہ نے علاقائی کشیدگی کو کم کرنے اور امن کے لیے بامقصد کوششوں پر پاکستان کی مؤثر سفارتی کردار کو سراہا۔

آئی ایس پی آر کے مطابق ملاقات میں علاقائی سلامتی اور باہمی خوشحالی کے فروغ کے لیے قریبی رابطہ کاری اور تعاون پر مبنی میکانزم کو برقرار رکھنے کے عزم کا اعادہ بھی کیا گیا۔

وزیراعظم سے ایرانی وزیر داخلہ کی ملاقات

قبل ازیں وزیراعظم شہباز شریف سے ایرانی وزیر داخلہ اسکندر مومنی نے وزیراعظم ہاؤس میں ملاقات کی، جس میں باہمی دلچسپی کے امور اور خطے کی مجموعی صورت حال پر غور کیا گیا۔

ایرانی وزیر داخلہ نے وزیراعظم کو ایرانی صدر مسعود پزشکیان کا خصوصی پیغام بھی پہنچایا اور حالیہ کشیدگی کی وجوہات سے بھی آگاہ کیا جب کہ اسکندر مومنی نے ایران امریکا مذاکرات میں پاکستان کی ثالثی کی کوششوں کی تعریف کی۔

وزیراعظم نے ایران اور امریکا کے درمیان بڑھتی کشیدگی پر تشویش کا اظہار کر تے ہوئے فریقین پر مذاکرات کی طرف واپس آنے پر بھی زور دیا۔ شہباز شریف نے ایران کے ساتھ تعلقات کو مزید مستحکم کرنے کے عزم کا اعادہ بھی کیا جب کہ اس اہم ملاقات میں پاکستان اور ایران کا قریبی روابط جاری رکھنے پر اتفاق کیا گیا۔

ایرانی وزیر داخلہ فیلڈ مارشل سید عاصم منیر سے بھی اہم ملاقات کریں گے۔ قبل ازیں ایرانی وزیر داخلہ کے اعزاز میں پولیس لائنز اسلام آباد میں شاندار پریڈ کا انعقاد کیا گیا، جہاں وزیر مملکت طلال چوہدری کے ہمراہ ان کا پرتپاک استقبال کیا گیا۔

وفاقی پولیس کے خصوصی دستے نے ایرانی وزیر داخلہ اسکندر مومنی کو گارڈ آف آنر پیش کیا جب کہ اس موقع پر پاکستان اور ایران کے قومی ترانے بھی بجائے گئے۔

معزز مہمان نے طلال چوہدری کے ہمراہ پولیس پریڈ کا معائنہ کیا اور اسلام آباد پولیس کے چاق و چوبند دستوں کی سلامی قبول کی۔

بعد ازاں ایرانی وزیر داخلہ پاکستان مونومنٹ بھی پہنچے، جہاں ایف سی کے چاق و چوبند دستے نے انہیں سلامی پیش کی، ‎‏انہوں نے یاد گار شہداء پر حاضری دی، پھول رکھے اور فاتحہ خوانی کی۔

ایران کے وزیر داخلہ نے شکرپڑیاں سے اسلام آباد شہر اور مارگلہ پہاڑی سلسلے کو دیکھا جب کہ انہوں نے شاندارخدمات انجام دینے والے پولیس اہلکاروں میں انعامات بھی تقسیم کیے۔

پنجاب کے مختلف علاقوں میں مون سون کی بارشوں کا سلسلہ جاری ہے۔ گجرانوالہ میں سب سے زیادہ 250 ملی میٹر بارش ریکارڈ کی گئی، جس کے باعث شہر کی متعدد شاہراہیں دریا کا منظر پیش کرنے لگیں۔

گجرات میں بھی 150 ملی میٹر بارش ریکارڈ کی گئی، جہاں مختلف علاقے زیر آب آ گئے۔ کچہری چوک، جناح چوک، علی پورہ روڈ، پرنس چوک، جلالپور جٹاں روڈ اور دیگر علاقوں میں کئی کئی فٹ پانی جمع ہوگیا، جس سے ہر طرف دریاؤں جیسا منظر دکھائی دیا۔

لاہور میں صبح سے وقفے وقفے سے بارش کا سلسلہ جاری ہے جب کہ رائیونڈ میں موسلادھار بارش کے باعث ریلوے روڈ سمیت متعدد علاقے زیر آب آ گئے۔ بارش کا پانی اسسٹنٹ کمشنر (اے سی) رائیونڈ کے دفتر میں بھی داخل ہوگیا۔

لاہور میں بارش کے باعث گلشن بند روڈ پر واقع بوتلیں بنانے والی ایک فیکٹری کی ٹی آر گارڈر سے بنی چھت اچانک منہدم ہوگئی۔ ریسکیو 1122 کے مطابق تقریباً پانچ مرلہ رقبے پر قائم فیکٹری کی چھت گرنے سے چار افراد ملبے تلے دب کر زخمی ہوگئے۔ اطلاع ملتے ہی ریسکیو کی اربن سرچ اینڈ ریسکیو ٹیم موقع پر پہنچی اور امدادی کارروائی کے دوران چاروں زخمیوں کو زندہ ملبے سے نکال کر ابتدائی طبی امداد دینے کے بعد اسپتال منتقل کر دیا۔

پاکپتن میں بارش کے دوران ایک گھر کی چھت گرنے سے 2 بچے جاں بحق جب کہ ان کی والدہ شدید زخمی ہوگئیں۔ جاں بحق ہونے والوں میں 7 سالہ بچہ عثمان اور 9 سالہ نور فاطمہ بچی شامل ہیں جب کہ بچوں کی ماں کو زخمی حالت میں اسپتال منتقل کردیا گیا ہے۔

کامونکی میں تیز بارش کے باعث گلیاں، سڑکیں اور بازار تالاب کا منظر پیش کرنے لگے جب کہ ایک انڈر پاس مکمل طور پر پانی سے بھر گیا۔ ریسکیو حکام کے مطابق 12 سالہ بچہ انڈر پاس میں جمع پانی میں ڈوب گیا، جس کی تلاش کے لیے کارروائی جاری ہے۔

راولپنڈی میں موسلادھار بارش کے باعث متعدد علاقوں میں پانی گھروں میں داخل ہوگیا، جبکہ روات کے علاقے بروالہ گاؤں میں بھی سیلابی صورتحال پیدا ہوگئی اور آبادی زیر آب آگئی۔ وزیرآباد میں گزشتہ رات سے بارش کا سلسلہ جاری ہے جب کہ دریائے چناب میں ہیڈ خانکی کے مقام پر پانی کے بہاؤ میں اضافے کے باعث سیلاب کا خدشہ ظاہر کیا جا رہا ہے۔

پنجاب کے ضلع شیخوپورہ اور اس کے گردونواح میں موسلا دھار بارش سے گرمی اور حبس کا زور ٹوٹ گیا۔ بارش کے دوران بجلی کے متعدد فیڈر ٹرپ کر گئے، جس کے نتیجے میں مختلف علاقوں میں بجلی کی فراہمی معطل ہوگئی۔ تاہم شدید گرمی سے نڈھال شہریوں نے بارش کے بعد سکھ کا سانس لیا اور خوشگوار موسم سے لطف اندوز ہوئے۔

ضلع شکر گڑھ میں بھی کرتارپور اور گردونواح میں بارش کا سلسلہ جاری رہا، جس سے موسم خوشگوار ہوگیا اور گرمی کی شدت کم ہوگئی۔ بارش شروع ہوتے ہی واپڈا کے کئی فیڈر ٹرپ کر گئے، جس سے متعدد علاقوں میں بجلی کی فراہمی متاثر ہوئی۔

محکمہ موسمیات کے مطابق مون سون کے دوسرے اسپیل کے پیشِ نظر 24 جولائی تک الرٹ جاری ہے اور متعلقہ اداروں کو ممکنہ صورت حال سے نمٹنے کے لیے چوکس رہنے کی ہدایت کی گئی ہے۔

دوسری جانب صوبائی دارالحکومت لاہور میں بھی ہلکی اور تیز بارش نے موسم کا مزاج بدل دیا۔ مال روڈ، جیل روڈ، فیروزپور روڈ، گڑھی شاہو، ریلوے اسٹیشن اور بادامی باغ سمیت مختلف علاقوں میں بارش ریکارڈ کی گئی، جس کے بعد گرمی اور حبس میں نمایاں کمی آگئی اور شہریوں نے خوشگوار موسم کا خیرمقدم کیا۔

علی پور چٹھہ سمیت مضافاتی علاقوں میں موسلا دھار بارش سے موسم خوشگوار ہوگیا تاہم نشیبی علاقوں میں پانی جمع ہونے سے کئی علاقے زیر آب آگئے۔ بارش کے دوران بجلی کے متعدد فیڈر بھی بند ہوگئے، جس سے شہریوں کو بجلی کی بندش کا سامنا کرنا پڑا۔

ملکوال شہر اور گردونواح میں بھی موسلا دھار بارش ہوئی، جس کے نتیجے میں سڑکیں اور گلیاں ندی نالوں کا منظر پیش کرنے لگیں۔ کئی نشیبی علاقوں میں بارش کا پانی گھروں میں داخل ہوگیا، جس سے متاثرہ شہریوں کو مشکلات کا سامنا کرنا پڑا اور معمولات زندگی متاثر ہوئے۔

محکمہ موسمیات نے پیش گوئی کی ہے کہ مون سون بارشوں کا سلسلہ آئندہ چند روز تک وقفے وقفے سے جاری رہ سکتا ہے، جس کے باعث نشیبی علاقوں میں پانی جمع ہونے اور بجلی کے نظام میں خلل کا بھی خدشہ ہے۔

ادھر مری میں گزشتہ تین روز سے مسلسل موسلادھار بارش کا سلسلہ جاری ہے، جس سے ملکہ کوہسار کا حسن مزید نکھر گیا تاہم متعلقہ ادارے صورت حال پر نظر رکھے ہوئے ہیں۔

وزیراعلیٰ پنجاب کی ہائی الرٹ رہنے کی ہدایت

دوسری جانب وزیراعلیٰ پنجاب مریم نواز نے مون سون بارشوں کے پیش نظر تمام متعلقہ محکموں، ضلعی انتظامیہ، واسا، ریسکیو اور دیگر اداروں کو ہائی الرٹ رہنے کی ہدایت جاری کر دی ہے۔

وزیراعلیٰ کے مطابق ان کی ہدایت پر پنجاب بھر میں ریکارڈ مدت میں بارشی پانی کی نکاسی مکمل کی گئی۔ انہوں نے کہا کہ ہر ضلع، ہر شہر اور ہر گلی میں نکاسی آب کے لیے ٹیمیں فیلڈ میں موجود ہیں، واسا کی مشینری اور ضلعی انتظامیہ مسلسل کام کر رہی ہے جب کہ سیف سٹی کیمروں کے ذریعے صورتحال کی مسلسل نگرانی بھی کی جا رہی ہے۔

وزیراعلیٰ مریم نواز نے تمام کمشنرز اور ڈپٹی کمشنرز کو فیلڈ میں موجود رہنے کا حکم دیتے ہوئے کہا کہ عوام کو ایک لمحے کی تکلیف بھی گوارا نہیں، ہر شہر میں بارشی پانی کی فوری نکاسی حکومت کی اولین ترجیح ہے۔

انہوں نے بتایا کہ لاہور، گجرانوالہ، سیالکوٹ اور منڈی بہاؤالدین میں بارشی پانی کی نکاسی تیزی سے مکمل کی گئی، جبکہ گجرانوالہ میں 250 ملی میٹر بارش کے باوجود پانی کا بروقت انخلا یقینی بنایا گیا۔

سیالکوٹ میں علامہ اقبال روڈ، کوٹلی بہرام، کمشنر روڈ، خادم علی روڈ، تحصیل بازار، ریلوے روڈ، راگ پورہ روڈ اور پیرس روڈ سے بارشی پانی نکال کر ٹریفک بحال کر دی گئی۔ وزیراعلیٰ نے سیالکوٹ انتظامیہ کی بروقت کارکردگی پر اطمینان کا اظہار کرتے ہوئے ہدایت کی کہ سیالکوٹ سمیت پنجاب کے تمام اضلاع میں مسلسل مانیٹرنگ جاری رکھی جائے تاکہ نشیبی علاقوں میں پانی جمع نہ ہونے دیا جائے۔

خیبرپختونخوا میں بارش سے 12 اموات

خیبرپختونخوا میں گزشتہ 48 گھنٹوں کے دوران مون سون تیز بارشوں اور فلش فلڈ سے گھروں کی چھتیں و دیواریں گرنے اور سیلابی ریلے میں بہہ جانے کے باعث اب تک 12 افراد جاں بحق جب کہ 18 افراد زخمی ہوئے۔

پی ڈی ایم اے کے مطابق مجموعی طور پر جاں بحق افراد میں 5 مرد، 5 بچے اور 2 خواتین جب کہ زخمیوں میں 10 مرد، 4 خواتین اور 4 بچے شامل ہیں، بارشوں کے باعث 3 گھر منہدم اور 15 گھروں کو جزوی نقصان پہنچا۔

پشاور میں موسلا دھار بارش کے بعد نشیبی علاقے زیر آب آگئے اور بارش کا پانی گھروں میں داخل ہو گیا، بارش کے باعث شہر بھر میں بجلی کا طویل بریک ڈاؤن ہونے سے درجنوں فیڈر ٹرپ کر گئے۔ ریسکیو 1122 نے نوشہرہ کے صاحبزادہ ٹاؤن اکوڑہ خٹک میں سیلابی ریلے سے محصور 12 افراد کو بحفاظت ریسکیو کرلیا جب کہ آدم زئی شیٹ گلاس فیکٹری کے قریب پھنسے 6 افراد بھی محفوظ مقام پر منتقل کر دیے گئے۔

مانسہرہ، ناران، کاغان اور بالاکوٹ میں بھی بارشوں کا سلسلہ جاری ہے، سہوج میں لینڈ سلائیڈنگ کے سڑکیں بند ہوگئیں۔ کے ڈی اے حکام نے جھیل سیف الملوک روڈ کو بحال کردیا، جھیل سیف الملوک سے واپس آنے والی گاڑیوں کو نکال لیا گیا جب کہ دیگر سڑکیں کھولنے پرکام جاری بدستور جاری ہے۔

خیبرپختونخوا کے ضلع ملاکنڈ میں آج دوسرے روز بھی بارش کا سلسلہ جاری رہا، جس کے باعث موسم خوشگوار ہوگیا اور گرمی کی شدت میں نمایاں کمی آگئی۔ بٹ خیلہ، درگئی، سخاکوٹ اور دیگر علاقوں میں بھی وقفے وقفے سے بارش ریکارڈ کی گئی جب کہ شہریوں نے ٹھنڈے موسم پر اطمینان کا اظہار کیا۔

ضلع اٹک اور گردونواح میں گزشتہ 12 گھنٹوں سے مسلسل بارش کا سلسلہ جاری ہے، موسلا دھار بارش کے باعث ندی نالوں میں طغیانی آگئی جب کہ گرج چمک کے ساتھ ہونے والی بارش نے موسم کو خوشگوار بنا دیا اور گرمی کی شدت میں واضح کمی ریکارڈ کی گئی۔

ہزارہ ڈویژن اور کاغان ویلی میں بھی طوفانی بارشوں سے تین رابطہ پل بہہ گئے ہیں اور لینڈ سلائیڈنگ کے باعث اہم راستے بند ہو چکے ہیں جنہیں کھولنے کے لیے بھاری مشینری کام کر رہی ہے۔

ایبٹ آباد میں شاہراہِ ریشم پانی جمع ہونے سے جھیل کا منظر پیش کر رہی ہے۔ ضلع ہری پور میں دوڑ ندی میں 13 ہزار کیوسک کا سیلابی ریلا گزر رہا ہے۔ صورتحال کی حساسیت کو دیکھتے ہوئے ہری پور انتظامیہ نے شہریوں کو محتاط رہنے کی ہدایت کی ہے۔

ڈپٹی کمشنر نے اپنے بیان میں کہا کہ ”برساتی نالوں کے اطراف موجود تمام افراد فوری طور پر محفوظ مقامات پر منتقل ہو جائیں تاکہ کسی بھی ناخوشگوار حادثے سے بچا جا سکے“۔ یہاں تک کہ اسلام آباد کے ندی نالوں میں طغیانی کی صورت حال ہے۔

پی ڈی ایم اے نے خبردار کیا ہے کہ بارشوں کا سلسلہ 23 جولائی تک وقفے وقفے سے جاری رہ سکتا ہے، شہری غیر ضروری سفر سے گریز کریں اور سرکاری ہدایات پر عمل کریں۔

این ڈی ایم اے کا الرٹ

نیشنل ڈیزاسٹر مینجمنٹ اتھارتی (این ڈی ایم اے) نے گلگت بلتستان، آزاد کشمیر اور خیبرپختونخوا کے لیے فلیش فلڈ کا الرٹ جاری کر دیا ہے۔

این ڈی ایم اے کے مطابق 25 جولائی تک گرمی اور بارشوں کے باعث گلیشیرز پگھلنے کا شدید خدشہ ہے، جس سے ہنزہ، نگر، سکردو، شگر، استور اور دیامر میں سیلاب اور مٹی کے تودے گر سکتے ہیں جب کہ اپر اور لوئر چترال کو انتہائی حساس قرار دیا گیا ہے۔

موسم کی عمومی صورت حال کے مطابق خیبرپختونخوا کے اکثر اضلاع میں مطلع ابر آلود ہے، جہاں پشاور میں درجہ حرارت 27 ڈگری سینٹی گریڈ اور ہوا میں نمی 82 فیصد ریکارڈ کی گئی۔

آزاد کشمیر

آزاد کشمیر کے ضلع باغ میں طوفانی بارش نے بڑے پیمانے پر تباہی مچائی۔ ریسکیو حکام کے مطابق سیور کے علاقے میں ایک مکان لینڈ سلائیڈنگ کی زد میں آنے سے ایک خاتون جاں بحق ہوگئیں۔

آزاد کشمیر کے رہائشی علاقے قندیل کالونی کی حفاظتی دیوار ٹوٹنے سے قریبی آبادی متاثر ہوئی جب کہ نالہ ماہل کے قریب واقع شیخ بستی کے متعدد گھروں میں پانی داخل ہوگیا۔ باغ کے مرکزی پل کے نیچے قائم کئی دکانیں طغیانی کی نذر ہوگئیں جب کہ ایک رابطہ سڑک کا حصہ بھی سیلابی ریلے میں بہہ گیا۔

ادھر تربیلا ڈیم سے پانی کے اخراج کے بعد دریائے سندھ میں اٹک کے مقام پر سطح بلند ہو گئی ہے جہاں دریا کی طرف جانے والے راستوں پر پولیس تعینات کر دی گئی ہے۔ محکمہ موسمیات نے خبردار کیا ہے کہ 24 جولائی تک دریائے چناب، جہلم اور کابل میں اونچے درجے کے سیلاب کا امکان ہے۔

بلوچستان کے بیشتر اضلاع میں موسم شدید گرم اور مرطوب رہا، جہاں نوکنڈی میں درجہ حرارت 47، سبی میں 45 اور کوئٹہ میں 40 ڈگری سینٹی گریڈ ریکارڈ کیا گیا، تاہم قلات، خضدار، ژوب، لورالائی اور بارکھان سمیت چند علاقوں میں بارش کی پیش گوئی کی گئی ہے۔

ڈسٹرکٹ ویسٹ پولیس کے مطابق 2 سالہ آذان کے اغوا کیس میں مرکزی ملزم محمد احتشام بچے کے والد کا قریبی دوست نکلا، جس نے واردات کی باقاعدہ منصوبہ بندی کی اور دیگر ساتھیوں کے ساتھ مل کر بچے کو اغوا کیا۔

پولیس کا کہنا ہے کہ ملزم نے واردات سے 3 روز قبل متعلقہ نجی سوسائٹی کی مسلسل ریکی کی اور اغوا کی کارروائی کے لیے پہلے سے موٹرسائیکل، جعلی نمبر پلیٹ، ہیلمیٹ اور دیگر سامان کا انتظام کر رکھا تھا۔ سی سی ٹی وی فوٹیج میں بھی ملزم کو بچے کو اغوا کرتے ہوئے دیکھا گیا، جس کے بعد تکنیکی شواہد کی مدد سے تحقیقات کو آگے بڑھایا گیا۔

تحقیقات کے دوران معلوم ہوا کہ ملزمان نے بچے کے اہل خانہ سے 50 لاکھ روپے تاوان طلب کیا اور اس مقصد کے لیے بیرونِ ملک سے چلنے والے واٹس ایپ نمبرز استعمال کیے تاکہ اپنی شناخت چھپا سکیں۔

پولیس کے مطابق واردات کے بعد مرکزی ملزم نے مکاری کا مظاہرہ کرتے ہوئے مسلسل 2 روز تک بچے کے اہل خانہ کے ساتھ اس کی تلاش میں بھی حصہ لیا تاکہ خود پر کسی قسم کا شبہ نہ ہونے دے۔

ایس ایس پی ویسٹ طارق الہیٰ مستوئی کے مطابق پولیس کی مسلسل کارروائی، تکنیکی تحقیقات، میڈیا پر بھرپور تشہیر اور معززین کے دباؤ کے باعث ملزمان گھبرا گئے اور انہوں نے بچے کو کراچی سے گھارو منتقل کر دیا۔ بعد ازاں پولیس ٹیم نے گھارو کے قریب بروقت کارروائی کرتے ہوئے معصوم آذان کو بحفاظت بازیاب کرا لیا۔

پولیس نے مرکزی ملزم محمد احتشام سمیت تینوں ملزمان کو گرفتار کر لیا ہے۔ دورانِ تفتیش تینوں ملزمان نے اغوا میں ملوث ہونے کا اعتراف بھی کر لیا جب کہ پولیس نے تکنیکی شواہد کی مدد سے ان کے بیانات کی تصدیق کر لی ہے۔

پولیس کے قبضے سے واردات میں استعمال ہونے والی موٹرسائیکل، جعلی نمبر پلیٹ، ہیلمیٹ، واردات کے دوران استعمال کیے گئے کپڑے اور دیگر سامان بھی برآمد کر لیا گیا ہے۔

ڈسٹرکٹ ویسٹ پولیس کا کہنا ہے کہ یہ کامیاب کارروائی ایس ایس پی ویسٹ طارق الٰہی مستوئی کی سربراہی میں انجام دی گئی، جنہوں نے کامیاب آپریشن پر پولیس ٹیم کی کارکردگی کو سراہتے ہوئے انہیں شاباش دی۔

وزیراعظم شہباز شریف نے وزیراعظم آفس میں مصنوعی ذہانت پر مبنی جدید وزیراعظم آفس سسٹم (پی ایم او ایس) کا افتتاح کر دیا، جس کے ذریعے وزیراعظم کے احکامات کے اجرا سے لے کر ان پر عمل درآمد، نگرانی اور تکمیل تک تمام مراحل کو خودکار انداز میں مانیٹر کیا جائے گا۔

وزیراعظم آفس میں منعقدہ تقریب سے خطاب کرتے ہوئے وزیراعظم نے ہدایت کی کہ نئے نظام پر فوری اور مکمل عمل درآمد یقینی بنایا جائے۔ انہوں نے کہا کہ اب روایتی فائلوں کے ساتھ کام کرنے کا دور ختم ہونا چاہیے اور تمام وزارتیں جدید نظام کے تحت اپنے امور سرانجام دیں۔

شہباز شریف نے کہا کہ عوامی خدمت اور فلاح و بہبود کے لیے حکومتی فیصلوں پر بروقت عمل درآمد ضروری ہے، جب کہ مصنوعی ذہانت پر مبنی یہ نظام فیصلہ سازی کو تیز، شفاف اور مؤثر بنائے گا۔

وزیراعظم نے اس منصوبے کی تیاری پر وفاقی وزیر احد خان چیمہ، وفاقی وزیر آئی ٹی شزا فاطمہ خواجہ اور متعلقہ حکام کی کاوشوں کو سراہا۔

تقریب کے دوران وفاقی وزیر احد خان چیمہ نے کہا کہ جدید طرز حکمرانی کے لیے مصنوعی ذہانت اور ڈیٹا پر مبنی نظام متعارف کرایا گیا ہے، جو حکومتی فیصلوں میں شفافیت، بروقت اقدامات اور وزارتوں کی کارکردگی بہتر بنانے میں اہم کردار ادا کرے گا۔

انہوں نے بتایا کہ سابقہ نظام میں متعدد تکنیکی خامیاں موجود تھیں، جنہیں نئے پلیٹ فارم میں دور کیا گیا ہے تاکہ حکومتی فیصلوں کے نتائج سے بہتر انداز میں استفادہ کیا جا سکے۔

وفاقی وزیر آئی ٹی شزا فاطمہ خواجہ نے بریفنگ دیتے ہوئے کہا کہ وزیراعظم شہباز شریف نے بطور وزیراعلیٰ پنجاب ڈیجیٹلائزیشن کا آغاز کیا تھا اور اب حکومت ڈیجیٹل نظام سے مصنوعی ذہانت کی جانب منتقل ہو رہی ہے۔

انہوں نے بتایا کہ حکومت کاغذ سے پاک (پیپر لیس) طرز حکمرانی کی طرف بڑھ رہی ہے اور وزیراعظم آفس سسٹم وزارتوں کی کارکردگی، جواب دہی اور خود احتسابی کے عمل کو مزید مضبوط بنائے گا۔

بریفنگ میں بتایا گیا کہ وزیراعظم آفس سسٹم (پی ایم او ایس) پاکستان کا پہلا مصنوعی ذہانت سے چلنے والا سرکاری ڈیجیٹل پلیٹ فارم ہے، جو وزیراعظم کے احکامات کے اجرا، ان پر عمل درآمد، پیش رفت، تکمیل اور بعد ازاں نگرانی کے تمام مراحل کو ایک ہی نظام کے تحت مربوط کرے گا۔

حکام کے مطابق یہ نظام وزارتوں کی کارکردگی کی مسلسل نگرانی، احکامات کی مقررہ مدت پر عمل درآمد اور حکومتی پالیسیوں کے مؤثر نفاذ میں مدد دے گا، جب کہ جدید ٹیکنالوجی کے ذریعے شفافیت، تیز رفتار فیصلہ سازی اور بہتر گورننس کو فروغ ملے گا۔

لاہور میں میڈیا سے گفتگو کرتے ہوئے ڈائریکٹر این سی سی آئی اے علی وسیم نے بتایا کہ گرفتار ملزمان سعودی عرب، جرمنی اور اٹلی کے سفارت خانوں کے ڈیٹا تک رسائی حاصل کر رہے تھے۔

ملزمان نے مبینہ طور پر سفارت خانوں کے رابطہ نمبرز ہیک کرکے اپنے نمبرز پر ڈائیورٹ کر رکھے تھے، جس کے ذریعے وہ ویزا اور اپوائنٹمنٹ کے خواہشمند افراد کو دھوکا دیتے تھے۔

علی وسیم کے مطابق این سی سی آئی اے نے کارروائی کے دوران جعلی اپوائنٹمنٹ لیٹرز، موبائل فونز اور دیگر اہم ڈیجیٹل شواہد بھی برآمد کیے ہیں۔

انہوں نے بتایا کہ مختلف سفارت خانوں کی جانب سے شکایات اور رابطے کے بعد تحقیقات شروع کی گئیں، جس کے نتیجے میں اس گروہ کا سراغ لگایا گیا۔

ڈائریکٹر این سی سی آئی اے کا کہنا تھا کہ گرفتار گروہ 2019 سے سرگرم تھا اور ویزا ایکسٹینشن، اپوائنٹمنٹ لینے اور سفارتی خدمات کے خواہشمند افراد کو نشانہ بنا کر فراڈ کرتا تھا۔

ملزمان نے جعلی ویب سائٹس اور سفارت خانوں جیسا ماحول بھی تیار کر رکھا تھا تاکہ شہریوں کو اصل اور جعلی نظام میں فرق محسوس نہ ہو سکے۔

انہوں نے کہا کہ ملزمان کے مزید ساتھیوں کی گرفتاری کے لیے کارروائیاں جاری ہیں، جبکہ مبینہ طور پر استعمال ہونے والی ”ٹائیکون ٹو ایف اے“ نامی ہیکنگ ایپلیکیشن کے حوالے سے بھی تحقیقات کی جا رہی ہیں۔

علی وسیم نے مزید بتایا کہ کال سینٹرز کی نگرانی اور تحقیقات کے لیے تمام متعلقہ اداروں اور اسٹیک ہولڈرز پر مشتمل جوائنٹ ٹاسک فورس قائم کی جا رہی ہے، تاکہ سائبر فراڈ کے بڑھتے ہوئے واقعات کی روک تھام کی جا سکے۔

ریلوے حکام کے مطابق بحال کیے گئے ڈاؤن ٹریک سے فرید ایکسپریس، رحمان بابا ایکسپریس، ذکریا ایکسپریس سمیت دیگر ٹرینوں کو کراچی کے لیے روانہ کر دیا گیا ہے، جبکہ ریلوے آپریشن بتدریج معمول پر لایا جا رہا ہے۔

ریلوے حکام کا کہنا ہے کہ ڈاؤن ٹریک کو مکمل طور پر فعال کر دیا گیا ہے، تاہم اپ ٹریک کی بحالی کا کام تاحال جاری ہے۔

حکام کے مطابق متاثرہ ٹریک کی مرمت میں مزید کچھ وقت درکار ہوگا، جس کے بعد دونوں اطراف ریلوے ٹریفک مکمل طور پر بحال کر دی جائے گی۔

ریلوے انتظامیہ نے بتایا کہ اپ ٹریک کی بحالی تک ٹرینوں کی آمد و رفت کو دستیاب ٹریک کے ذریعے مرحلہ وار جاری رکھا جا رہا ہے تاکہ مسافروں کو کم سے کم مشکلات کا سامنا کرنا پڑے۔

یاد رہے کہ گزشتہ روز کراچی سے پنجاب جانے والی کوئلہ بردار مال گاڑی وہاب شاہ ریلوے اسٹیشن کے قریب پٹری سے اتر گئی تھی، جس کے نتیجے میں اپ اور ڈاؤن دونوں ریلوے ٹریک شدید متاثر ہوئے اور ملک کے اہم ریلوے روٹ پر ٹرینوں کی آمد و رفت معطل ہو گئی تھی۔

حادثے کی اطلاع ملتے ہی ریلوے انتظامیہ نے ہنگامی بنیادوں پر کارروائی شروع کر دی تھی اور مختلف سمتوں سے آنے والی مسافر ٹرینوں کو مختلف اسٹیشنز پر روک دیا گیا تھا۔

حادثے کے بعد انتظامیہ نے مسافروں کی حفاظت اور ٹریک کی مرمت کے لیے ہنگامی اقدامات کردیے تھے۔

پیر کو خیبر پختونخوا کے بالائی علاقوں میں بارش اورسیلابی ریلوں کے باعث 8 افراد جان کی بازی ہار گئے جب کہ 2 خواتین سمیت متعدد افراد زخمی ہو گئے۔ ریسکو 1122 کے مطابق مردان رستم کالو ڈھیری میں کمرے کی چھت گرنے سے 2 بچے جاں بحق جب کہ ماں اور بیٹی شدید زخمی ہوگئیں۔

ضلع خیبر میں ہونے والی موسلا دھار بارش اور سیلابی ریلوں نے تباہی مچا دی ہے، جہاں مختلف واقعات میں 6 افراد جاں بحق جب کہ کئی افراد زخمی ہوگئے جب کہ شدید بارش کے باعث لنڈی کوتل اور گردونواح میں متعدد رابطہ سڑکیں متاثر ہوئیں اور کچے مکانات اور 10 سے زائد گھروں کی چاردیواریاں بھی منہدم ہوگئیں.

ایبٹ آباد اور ہری پور سمیت مختلف اضلاع میں بھی بارش کا سلسلہ وقفے وقفے سے جاری ہے، بارش کے باعث ندی نالوں میں طغیانی سے شاہراہ ریشم پر پانی جمع ہونے سے سڑک تالاب کا منظر پیش کرنے لگی، جس کے باعث ٹریفک بلاک ہو گئی۔

گلیات کے علاقوں میں بارش اور شدید دھند کے باعث حدِ نگاہ صفر ہو گئی ہے، اس صورت حال پر گلیات ڈویلپمنٹ اتھارتی (جی ڈی اے) کی جانب سے سیاحوں کے لیے اہم ہدایات جاری کی گئی ہیں۔

جی ڈی اے نے الرٹ جاری کرتے ہوئے کہا کہ ”سیاح نتھیا گلی اور ڈونگا گلی کی طرف سفر کرنے سے گریز کریں اور لینڈ سلائیڈنگ کے خطرناک علاقوں میں اپنی گاڑیاں ہرگز پارک نہ کریں“۔

قبل ازیں محکمہ موسمیات نے ملک کے مختلف علاقوں میں تیز ہواؤں اور گرج چمک کے ساتھ بارش کی پیش گوئی کی ہے۔ خیبر پختونخوا، کشمیر، اسلام آباد، بالائی اور وسطی پنجاب اور گلگت بلتستان میں وسیع پیمانے پر بارش کا امکان ہے جب کہ اس کے برعکس ملک کے جنوبی حصوں میں شدید گرمی اور حبس کی صورتحال برقرار رہے گی۔

اسلام آباد میں کہیں ہلکی اور کہیں موسلادھار بارش سے موسم خوشگوار ہو گیا ہے جب کہ صوبہ بلوچستان کے زیادہ تر اضلاع میں موسم گرم اور مرطوب رہنے کے ساتھ ساتھ خضدار، موسیٰ خیل، شیرانی، کوہلو، ژوب اور بارکھان کے علاقوں میں آندھی اور بارش کی پیش گوئی کی گئی ہے۔

لاہور شہر کے مختلف حصوں میں ہلکی بارش ریکارڈ

پنجاب کے دارالحکومت لاہور میں بھی شہر کے مختلف حصوں میں ہلکی بارش ریکارڈ کی گئی ہے، جس پر واسا نے تمام اعداد و شمار جاری کر دیے ہیں۔

واسا کے مطابق گلشن راوی میں سب سے زیادہ 34.2 ملی میٹر اور سمن آباد میں 31.6 ملی میٹر بارش ریکارڈ کی گئی، جبکہ سگیاں میں 17.4، فرخ آباد میں 11.6، اقبال ٹاؤن میں 11، لکشمی چوک میں 6.8، پانی والا تالاب میں 1.4، چوک ناخدا میں 0.4، اور ہیڈ آفس گلبرگ و نشتر ٹاؤن میں 0.2 ملی میٹر بارش ہوئی تاہم جیل روڈ، ایئرپورٹ، اپر مال، مغلپورہ اور تاجپورہ کے علاقوں میں بارش ریکارڈ نہیں ہوئی۔ لاہور میں نکاسیِ آب کی صورتحال پر واسا انتظامیہ الرٹ ہے۔

ایم ڈی واسا غفران احمد نکاسی آب کے اس آپریشن کی مسلسل خود مانیٹرنگ کر رہے ہیں جب کہ شہر میں بارش کے پانی کو فوری صاف کرنے اور شہریوں کی سہولت کے لیے واسا کی تمام فیلڈ ٹیمیں سڑکوں پر متحرک ہیں۔

پہاڑی علاقوں کے لیے فلیش فلڈ الرٹ جاری

دوسری جانب نیشنل ڈیزاسٹر مینجمنٹ اتھارٹی (این ڈی ایم اے) نے گلگت بلتستان، آزاد کشمیر اور خیبر پختونخوا کے پہاڑی علاقوں کے لیے فلیش فلڈ کا الرٹ جاری کیا ہے۔

این ڈی ایم اے کے مطابق گلگت بلتستان اور خیبر پختونخوا میں 25 جولائی تک گلیشیرز پگھلنے کا شدید خدشہ ہے، جس کے باعث ندیاں اور نالوں میں پانی کے بہاؤ میں بڑا اضافہ ہو سکتا ہے۔

این ڈی ایم اے نے ہنزہ، نگر، سکردو، شگر، استور اور دیامر میں سیلاب اور مٹی کے تودے گرنے کے خدشات ظاہر کیے ہیں جب کہ اپر اور لوئر چترال اور ان کے ملحقہ علاقوں کو انتہائی حساس قرار دیا گیا ہے۔ شانگلہ کے مقام پر بھی دریائے سندھ میں پانی کا بہاؤ کافی تیز ہوگیا ہے۔

پنجاب میں دریاؤں کی صورت حال سے متعلق رپورٹ

پی ڈی ایم اے پنجاب نے صوبے میں دریاؤں کی موجودہ صورت حال سے متعلق رپورٹ جاری کرتے ہوئے کہا ہے کہ بیشتر دریاؤں میں پانی کا بہاؤ معمول کے مطابق ہے تاہم دریائے چناب کے خانکی اور قادر آباد کے مقامات پر نچلے درجے کی سیلابی صورت حال برقرار ہے۔

ترجمان پی ڈی ایم اے کے مطابق خانکی کے مقام پر پانی کی آمد ایک لاکھ پچیس ہزار اور اخراج ایک لاکھ سترہ ہزار کیوسک جب کہ قادر آباد میں پانی کی آمد ایک لاکھ چھیالیس ہزار اور اخراج ایک لاکھ ستائیس ہزار کیوسک ریکارڈ کیا گیا ہے۔ دریائے راوی، ستلج اور سندھ کے مختلف مقامات پر پانی کا بہاؤ فی الحال نارمل سطح پر ہے جب کہ ڈیرہ غازی خان کی رودکوہیوں میں بھی صورت حال معمول کے مطابق ہے۔

پی ڈی ایم اے نے خبردار کیا ہے کہ 24 جولائی تک مون سون بارشوں کے باعث دریاؤں میں پانی کے بہاؤ میں اضافے کا خدشہ ہے۔ دریائے راوی اور چناب سے ملحقہ نالوں، بسنتر، ڈیگ، پلکھو، بھمبر، ہلسی اور ڈورا میں سیلاب جب کہ ڈیرہ غازی خان کی رودکوہیوں میں فلیش فلڈنگ کا امکان ظاہر کیا گیا ہے۔

ادارے کے مطابق لاہور، گوجرانوالہ، سیالکوٹ، سرگودھا، اوکاڑہ، ساہیوال، بہاولنگر اور راولپنڈی ڈویژن میں اربن فلڈنگ کا بھی خدشہ ہے۔ ڈی جی پی ڈی ایم اے عمر عباس میلہ نے دریاؤں کے کناروں اور نشیبی علاقوں میں رہنے والے شہریوں کو محفوظ مقامات پر منتقل ہونے، غیر ضروری طور پر دریاؤں اور ندی نالوں کا رخ نہ کرنے اور بچوں کو پانی میں نہانے سے روکنے کی ہدایت کی ہے۔

انہوں نے بتایا کہ ممکنہ متاثرہ علاقوں میں فلڈ ریلیف کیمپس قائم کر دیے گئے ہیں، جہاں بنیادی سہولیات اور ادویات کی فراہمی یقینی بنائی جائے گی۔

ڈی جی پی ڈی ایم اے نے مزید کہا کہ شہری موسم و سیلاب کی صورت حال کے پیش نظر احتیاطی تدابیر اختیار کریں، دریاؤں نہروں اور ندی نالوں کے اطراف سیرو تفریح سے گریز کریں، بچوں کا خاص خیال رکھیں انہیں دریاؤں ندی نالوں میں ہرگز نہ نہانے دیں۔

وفاقی وزیر محسن نقوی نے ایئر پورٹ پر ایرانی وزیر داخلہ اسکندر مومنی اور وفد کا استقبال کیا اور آمد پر خیر مقدم کیا جب کہ وزیر مملکت داخلہ طلال چوہدری نے ایرانی وزیر داخلہ اسکندر مومنی کو گلدستہ پیش کیا۔ اس موقع پر ایرانی سفیر رضا امیری مقدم بھی موجود تھے۔

استقبال کے بعد گفتگو کرتے ہوئے وزیر داخلہ محسن نقوی نے کہا کہ پاکستان آمد پر اپنے بھائی کو خوش آمدید کہتا ہوں، امید ہے کہ ایرانی وزیر داخلہ اسکندر مومنی اچھی خبر لے کر آئے ہوں گے، آپ کے دورہ پاکستان سے دوطرفہ تعلقات کو فروغ ملے گا جب کہ علاقائی صورت حال پر بھی پیش رفت کی امید ہے۔

ایرانی وزیر داخلہ کے ہمراہ آنے والے اعلیٰ سطحی وفد میں گورنر جنرل سیستان و بلوچستان، نائب وزیر داخلہ، نائب وزیر برائے شہری ترقی و ٹرانسپورٹ، نیشنل ایرانی آئل کمپنی کے سربراہ، وزیر زراعت کے خصوصی نمائندے سمیت دیگر اعلیٰ حکام شامل ہیں۔

دورے کے دوران ایرانی وزیر داخلہ اسکندر مومنی، وزیر اعظم محمد شہباز شریف اور فیلڈ مارشل سید عاصم منیر سے ملاقات کریں گے، جن میں دوطرفہ تعلقات، سرحدی تعاون، اقتصادی روابط اور خطے کی مجموعی سیکیورٹی صورت حال پر تبادلہ خیال متوقع ہے۔

پاکستان پہنچنے کے بعد وفاقی وزیر داخلہ محسن نقوی اور ان کے ایرانی ہم منصب اسکندر مومنی کے درمیان ملاقات بھی ہوئی۔ اس موقع پر ایرانی وزیر داخلہ نے کہا کہ اپنے بھائی محسن نقوی سے دوبارہ ملاقات کرکے بہت خوشی ہوئی ہے۔ انہوں نے پاکستان اور ایران کے تعلقات کو فقیدالمثال قرار دیتے ہوئے کہا کہ دونوں ممالک کے درمیان برادرانہ روابط وقت کے ساتھ مزید مضبوط ہوئے ہیں۔

ایرانی وزیر داخلہ نے پاکستانی حکومت اور عوام کی مہمان نوازی کو سراہتے ہوئے کہا کہ وہ ہمیشہ پاکستان کے خلوص اور محبت کے معترف رہے ہیں۔

وفاقی وزیر داخلہ محسن نقوی نے اس امید کا اظہار کیا کہ ایرانی وزیر داخلہ کا یہ دورہ دونوں ممالک کے تعلقات کو مزید مستحکم کرنے اور باہمی تعاون کے نئے مواقع پیدا کرنے میں اہم کردار ادا کرے گا۔

یہ دورہ ایسے وقت میں ہو رہا ہے جب پاکستان، امریکا اور ایران کے درمیان گزشتہ ماہ طے پانے والے اسلام آباد مفاہمتی یادداشت (اسلام آباد ایم او یو) کو بچانے کے لیے سفارتی کوششیں جاری رکھے ہوئے ہے۔

پاکستان، امریکا اور اسرائیل کی جانب سے 28 فروری کو ایران پر حملوں کے بعد شروع ہونے والے بحران کے دوران مسلسل سفارتی کردار ادا کرتا رہا ہے۔ ان حملوں کے نتیجے میں آبنائے ہرمز میں جہاز رانی متاثر ہوئی اور عالمی توانائی منڈی شدید دباؤ کا شکار ہو گئی تھی۔

پاکستان کی ثالثی میں 18 جون کو امریکا اور ایران کے درمیان 14 نکاتی اسلام آباد مفاہمتی یادداشت (اسلام آباد ایم او یو) پر دستخط کیے گئے تھے جس کا مقصد جنگ کا خاتمہ، کشیدگی میں کمی اور آبنائے ہرمز کو دوبارہ بین الاقوامی بحری آمدورفت کے لیے کھولنا تھا۔

اگرچہ بعد میں جنگ بندی برقرار نہ رہ سکی تاہم پاکستان اب بھی دونوں ممالک کے درمیان سفارتی رابطوں کو بحال رکھنے اور خطے میں امن کی کوششوں کو آگے بڑھانے میں متحرک کردار ادا کر رہا ہے۔

ذرائع کے مطابق بچے کے والد عبد الوہاب نے اپنے بیٹے کی بازیابی کی تصدیق کرتے ہوئے بتایا ہے کہ دو سالہ اذان کو گھارو کے علاقے سے بحفاظت بازیاب کرایا گیا ہے۔

والد عبد الوہاب نے اپنے بیان میں کہا کہ الحمدللہ میرا بیٹا اذان بحفاظت مل گیا ہے، اسے گھارو سے بازیاب کرایا گیا ہے۔

یاد رہے کہ دو سالہ اذان کو کراچی کے علاقے منگھوپیر میں واقع ایک نجی سوسائٹی سے اغوا کر لیا گیا تھا، جس کے بعد پولیس نے بچے کی تلاش کے لیے کارروائیاں شروع کر دی تھیں۔

پولیس کی جانب سے بچے کی بازیابی کے حوالے سے مزید تفصیلات اور اغوا میں ملوث ملزمان کی گرفتاری سے متعلق معلومات کا انتظار کیا جا رہا ہے۔

اس سے قبل اذان کے مبینہ اغوا کے خلاف اہلخانہ اور علاقہ مکینوں نے احتجاجی مظاہرہ کیا تھا۔

مظاہرہ نیا ناظم آباد میں کیا گیا تھا، جہاں بچے کے اہلخانہ کے ساتھ سوسائٹی کے رہائشی بھی بڑی تعداد میں شریک ہوئے تھے۔

حادثے کی اطلاع ملتے ہی ریلوے انتظامیہ نے ہنگامی بنیادوں پر کارروائی شروع کر دی اور مختلف سمتوں سے آنے والی مسافر ٹرینوں کو مختلف اسٹیشنز پر روک دیا گیا۔

اس حادثے کے بعد انتظامیہ نے مسافروں کی حفاظت اور ٹریک کی مرمت کے لیے ہنگامی اقدامات کیے۔

حیدرآباد ریلوے اسٹیشن پر پہنچنے والی قراقرم ایکسپریس کو خالی کرا کر مسافروں کو نیچے اتار لیا گیا، جبکہ علامہ اقبال ایکسپریس کو کوٹری، پاکستان ایکسپریس کو لانڈھی، تیزگام ایکسپریس کو ڈرگ روڈ اور ملت و فرید ایکسپریس کو کراچی کینٹ اسٹیشن پر روک لیا گیا۔

ریلوے حکام کا کہنا ہے کہ ٹریکس کو پہنچنے والے شدید نقصان کی وجہ سے ریلوے آپریشن اگلے 24 گھنٹوں تک معطل رہنے کا امکان ہے، اور اسی بنیاد پر کل تک کے لیے تمام متعلقہ ٹرینیں منسوخ کر دی گئی ہیں۔

حادثے کی تفصیلات اور بحالی کے کاموں کے حوالے سے ڈی ایس ریلوے سکھر فرمان غنی نے بتایا کہ حادثے کے بعد تمام ٹرینوں کو مختلف ریلوے اسٹیشنوں پر روک دیا گیا ہے۔

انہوں نے مزید کہا کہ ”روہڑی سے روانہ ہونے والی ریلیف ٹرین رات 10 بجے تک جائے حادثہ پہنچے گی، جبکہ کوٹری سے بھی ریلیف ٹرین روانہ کر دی گئی ہے“۔

ان کا کہنا تھا کہ حادثے میں ریلوے ٹریک کا بڑا حصہ متاثر ہوا ہے جس کی بحالی میں وقت لگے گا، تاہم دونوں ٹریکس کو جلد از جلد صاف کر کے معطل ریلوے آپریشن بحال کرنے کی ہر ممکن کوشش کی جا رہی ہے۔

اس کے علاوہ ڈی ایس ریلوے سکھر نے یہ بھی بتایا کہ جیکب آباد سے کراچی جانے والی سکھر ایکسپریس کو منسوخ کر دیا گیا ہے۔

ریلوے انتظامیہ کی جانب سے مسافروں کی سہولت کے لیے ریفنڈ کا اعلان بھی کیا گیا ہے۔

ڈی سی او ریلویز کراچی اور پاکستان ریلویز کراچی ڈویژن کے مطابق حادثے کی سنگینی کو دیکھتے ہوئے ٹریک کی بحالی میں کل تک کا وقت لگ سکتا ہے۔

پاکستان ریلویز کراچی ڈویژن نے واضح کیا ہے کہ کراچی ڈویژن اپنی حدود کے ان تمام مسافروں کو ٹکٹوں کے پیسے مکمل طور پر ریفنڈ کرے گا جو اس حادثے اور ٹرینوں کی منسوخی کی وجہ سے متاثر ہوئے ہیں۔

اتوار کو کوٹلی آزاد کشمیر میں پاکستان پیپلز پارٹی کے انتخابی جلسے سے خطاب کرتے ہوئے چیئرمین پیپلز پارٹی بلاول بھٹو زرداری نے کہا کہ جب بھی وہ کوٹلی آتے ہیں تو انہیں ایسا محسوس ہوتا ہے جیسے اپنے گھر آگئے ہوں۔ انہوں نے کہا کہ جلسے میں موجود نمائندے صرف پارٹی کے نمائندے نہیں بلکہ ان کے خاندان کے نمائندے ہیں۔

بلاول بھٹو نے ماضی کو یاد کرتے ہوئے کہا کہ جلاوطنی کے دنوں میں کبھی دبئی اور کبھی لندن میں رہنا پڑتا تھا تاہم اس تمام عرصے میں چوہدری یاسین ہمیشہ ان کے ساتھ کھڑے رہے، انہیں اپنا بچپن یاد ہے جب بھی چوہدری یاسین پارٹی کے ساتھ موجود تھے اور آج بھی وہ اسی طرح پارٹی کے ساتھ کھڑے ہیں۔

انہوں نے چوہدری یاسین کو وفاداری، استقامت اور بہادری کی سیاست کی مثال قرار دیتے ہوئے کہا کہ انہوں نے مشکل ترین حالات میں بھی انتخابات جیتے اور جیل میں رہتے ہوئے بھی عوام کا اعتماد حاصل کیا جب کہ جن لوگوں نے انہیں جیل بھیجا تھا آج وہ خود جیل میں ہیں۔

چیئرمین پیپلز پارٹی نے مزید کہا کہ پارٹی نے ہمیشہ اپنے وفادار کارکنوں کو انتخابی ٹکٹ دیے ہیں اور اسی پالیسی کے تحت مطلوب انقلابی کے بیٹے کو بھی پارٹی ٹکٹ دیا گیا ہے۔ انہوں نے کوٹلی کے عوام سے اپیل کی کہ وہ مطلوب انقلابی کے بیٹے کو کامیاب بنائیں۔

بلاول بھٹو نے کہا کہ پیپلز پارٹی کا مقصد صرف انتخابات جیتنا نہیں بلکہ عوام کی خدمت کرنا ہے اور اقتدار میں آکر عوامی مسائل کو ترجیحی بنیادوں پر حل کیا جائے گا۔

انہوں نے مزید کہا کہ گزشتہ آزاد کشمیر انتخابات کے دوران پارٹی کو مشکل حالات کا سامنا کرنا پڑا تھا تاہم اس مرتبہ پہلے سے بھی بہتر نتائج حاصل کیے جائیں گے۔ انہوں نے کہا کہ وہ چاہتے ہیں کہ کوٹلی کی تمام نشستیں پیپلز پارٹی کے حصے میں آئیں اور آزاد کشمیر میں پارٹی اپنی حکومت قائم کرے۔

چیئرمین پیپلز پارٹی کا کہنا تھا کہ وہ پوری دنیا میں مسئلہ کشمیر کی حمایت کرتے رہے ہیں اور عالمی سطح پر کشمیر کا مقدمہ لڑ کر آئے ہیں۔ انہوں نے کہا کہ بین الاقوامی فورمز پر کشمیریوں کے حق خودارادیت اور آزادی کشمیر کا مؤقف بھرپور انداز میں پیش کیا ہے۔

بلاول بھٹو نے کہا کہ کچھ لوگ ہر شخص کو غدار اور قاتل قرار دینے کی سیاست کر رہے ہیں جب کہ ایک یا دو ایف آئی آر درج ہونے سے پیپلز پارٹی کے کارکنوں کو خوفزدہ نہیں کیا جا سکتا۔ انہوں نے کہا کہ ایسا محسوس ہوتا ہے کہ کچھ عناصر پورے کشمیر کو دہشت گرد قرار دینا چاہتے ہیں لیکن پیپلز پارٹی کے کارکن اس قسم کے ہتھکنڈوں سے مرعوب نہیں ہوں گے۔

انہوں نے کہا کہ ہم سب قائد عوام شہید ذوالفقار علی بھٹو کے سپاہی ہیں اور پارٹی کارکنوں کے خلاف ایف آئی آر درج کرانے والوں کو نہیں بھولیں گے۔ بلاول بھٹو نے کہا کہ انتخابات کے بعد وہ خود ان معاملات کو دیکھیں گے، عوام کو حق حاکمیت، حق ملکیت اور حق روزگار دلانا ان کی جماعت کی اولین ترجیح ہے۔

پیپلز پارٹی کے چیئرمین نے گلگت بلتستان کے عوام کا شکریہ ادا کرتے ہوئے کہا کہ وہاں پہلی مرتبہ وفاق کو شکست ہوئی اور پیپلز پارٹی عوام کے حقوق کے لیے اپنی جدوجہد جاری رکھے گی تاکہ گلگت بلتستان کے عوام کو ان کے جائز حقوق مل سکیں۔ انہوں نے کہا کہ جہاں کشمیریوں کا پسینہ گرے گا وہاں ہمارا خون گرے گا اور پاکستان کے فیصلہ ساز اداروں میں کشمیر کی نمائندگی ناگزیر ہے۔

بلاول بھٹو زرداری نے مزید کہا کہ ان کی خواہش ہے کہ جس طرح لاڑکانہ کا نمائندہ قومی اسمبلی میں موجود ہے، اسی طرح کوٹلی کا بھی ایک نمائندہ قومی اسمبلی میں ہو تاکہ کشمیری عوام اپنی آواز براہ راست پارلیمان میں پہنچا سکیں۔ انہوں نے کہا کہ کشمیر کے نوجوانوں کو روزگار کے بہتر مواقع فراہم کیے جانے چاہئیں کیوں کہ موجودہ حالات میں ہر کشمیری شہری پریشان ہے۔

اپنی ذاتی زندگی کا حوالہ دیتے ہوئے بلاول بھٹو نے کہا کہ ان کے نانا، دو ماموں اور والدہ کو شہید کیا گیا، اس لیے وہ شہداء کے لواحقین کے دکھ اور درد کو بخوبی سمجھتے ہیں۔ انہوں نے کہا کہ وہ اپنے دشمن کے لیے بھی ایسا دکھ نہیں چاہتے۔

خطاب کے اختتام پر بلاول بھٹو زرداری نے وفاقی حکومت سے مطالبہ کیا کہ آزاد کشمیر میں انٹرنیٹ سروس فوری طور پر بحال کی جائے تاکہ عوام کو درپیش مشکلات کا خاتمہ ہو۔

ترجمان پی ڈی ایم اے کے مطابق 20 سے 24 جولائی کے دوران پنجاب کے دریاؤں میں پانی کی صورت حال میں اضافے کا خدشہ ہے، دریائے چناب میں مرالہ کے مقام پر نچلے سے اونچے درجے کے سیلاب کی وارننگ جاری کی گئی ہے جب کہ دریائے راوی اور چناب سے ملحقہ ندی نالوں بہیں، بسنتر، ڈیگ، ایک، پلکھو، بھمبر، ہلسی اور ڈورا میں بھی سیلابی صورت حال کا خدشہ ظاہر کیا گیا ہے۔

پی ڈی ایم اے کے مطابق ڈیرہ غازی خان کی رود کوہیوں میں اچانک آنے والے سیلاب (فلیش فلڈ) کا خدشہ بھی ظاہر کیا ہے۔ اس کے علاوہ لاہور، گوجرانوالہ، سیالکوٹ، سرگودھا، اوکاڑہ، ساہیوال، بہاولنگر اور راولپنڈی ڈویژن کے مختلف علاقوں میں اربن فلڈنگ کا امکان بتایا گیا ہے۔

ممکنہ صورت حال کے پیش نظر تمام کمشنرز، ڈپٹی کمشنرز، واسا، ریسکیو 1122 اور دیگر متعلقہ اداروں کو ہائی الرٹ رہنے کی ہدایات جاری کر دی گئی ہیں۔ محکمہ آبپاشی، صحت، زراعت، جنگلات، لائیو اسٹاک، ٹرانسپورٹ اور لوکل گورنمنٹ کو بھی پیشگی انتظامات مکمل کرنے کا کہا گیا ہے۔

ڈی جی پی ڈی ایم اے عمر عباس میلہ نے متعلقہ حکام کو ہدایت کی ہے کہ ایمرجنسی کنٹرول رومز فعال رکھے جائیں، ریسکیو ٹیمیں ہر وقت تیار رہیں اور امدادی کارروائیوں کے لیے ضروری سامان، ایندھن اور مشینری کی دستیابی یقینی بنائی جائے۔

انہوں نے مزید کہا کہ دریا کے کناروں اور پاٹ میں رہائش پذیر افراد اور مویشیوں کی بروقت منتقلی کو یقینی بنایا جائے جب کہ فلڈ ریلیف کیمپوں میں خوراک، پینے کے صاف پانی اور دیگر بنیادی سہولیات فراہم کی جائیں۔

پی ڈی ایم اے نے شہریوں سے اپیل کی ہے کہ جاری کردہ حفاظتی ہدایات پر عمل کریں، غیر ضروری طور پر سیلابی علاقوں کا رخ نہ کریں اور کسی بھی ہنگامی صورت حال میں پی ڈی ایم اے کی ہیلپ لائن 1129 یا ریسکیو 1122 سے فوری رابطہ کریں۔

پولیس ذرائع کے مطابق واقعہ گزشتہ رات ڈیفنس اے کی حدود میں اس وقت پیش آیا جب ایک کار سوار نوجوان نے وفاقی وزیر کی گاڑی کو اوورٹیک کیا اور مبینہ طور پر فائرنگ کی۔

واقعے کے بعد ملزم کی تلاش کے لیے سیف سٹی اتھارٹی کی جدید ٹیکنالوجی اور کیمروں کی مدد لی گئی، جس کے نتیجے میں ملزم اسامہ کو گرفتار کر لیا گیا جبکہ اس کے زیرِ استعمال گاڑی بھی تحویل میں لے لی گئی۔

وفاقی وزیر اطلاعات عطا تارڑ نے واقعے کی تصدیق کرتے ہوئے بتایا کہ وہ اپنے اہل خانہ کے ساتھ ڈیفنس میں جا رہے تھے کہ ایک گاڑی نے بائیں جانب سے انہیں کراس کیا اور پانچ فائر کیے۔

عطا تارڑ کے مطابق فائرنگ کے بعد انہوں نے مشتبہ گاڑی کا تعاقب کیا اور فوری طور پر قریبی پولیس ناکے کو اطلاع دی، جس پر پولیس نے کارروائی کرتے ہوئے ملزم کو گرفتار کر لیا۔

پولیس کا کہنا ہے کہ واقعے کی مختلف پہلوؤں سے تحقیقات جاری ہیں اور یہ معلوم کیا جا رہا ہے کہ فائرنگ کی وجوہات کیا تھیں اور آیا یہ واقعہ ہوائی فائرنگ تھا یا اس کے پیچھے کوئی اور مقصد کارفرما تھا۔

سرکاری نوٹیفکیشن کے مطابق پیٹرول کی قیمت میں 5 روپے 44 پیسے اضافے کے بعد نئی قیمت 316 روپے 15 پیسے فی لیٹر مقرر کی گئی ہے، جبکہ ہائی اسپیڈ ڈیزل 31 روپے مہنگا ہونے کے بعد 354 روپے 35 پیسے فی لیٹر کا ہو گیا ہے۔

حکومت نے اعلان کیا ہے کہ نئی قیمتوں کا اطلاق آئندہ تین روز تک ہوگا، جبکہ مستقبل میں پیٹرولیم مصنوعات کی قیمتوں کا تعین روزانہ کی بنیاد پر کیا جائے گا۔

قیمتوں میں اضافے کے فوری بعد پاکستان منی مزدا گڈز ٹرانسپورٹ ایسوسی ایشن نے ملک بھر میں منی مزدا گاڑیوں کے کرایوں میں 10 فیصد اضافے کا اعلان کر دیا، جس کا اطلاق فوری طور پر کر دیا گیا ہے۔

ایسوسی ایشن کے صدر حاجی شیر علی چوہدری کا کہنا ہے کہ ڈیزل اور پیٹرول کی قیمتوں میں اضافے سے ٹرانسپورٹ کے اخراجات بڑھ گئے ہیں، جس کے باعث کرایوں میں اضافہ ناگزیر ہو گیا۔

لاہور سے مختلف شہروں کے لیے چلنے والی مسافر بسوں اور دیگر پبلک ٹرانسپورٹ کے کرایوں میں بھی اضافہ کر دیا گیا ہے، جس سے مسافروں پر اضافی مالی بوجھ پڑے گا۔

وزیر پیٹرولیم علی پرویز ملک نے فیصلے کا دفاع کرتے ہوئے کہا کہ پیٹرولیم مصنوعات کی قیمتوں کا تعین اب اوگرا سات روزہ اوسط قیمت کی بنیاد پر کرے گا۔ ان کے مطابق یہ فیصلہ عالمی منڈی میں تیل کی قیمتوں میں اضافے کے باعث کیا گیا ہے اور معاشی استحکام کے لیے ضروری ہے۔

وفاقی وزیر اطلاعات عطا تارڑ نے کہا کہ حکومت نے عوام پر اضافی بوجھ کم رکھنے کے لیے پیٹرولیم لیوی میں کمی کی ہے، جبکہ ذخیرہ اندوزی کسی صورت برداشت نہیں کی جائے گی۔

ادھر شہریوں، ٹرانسپورٹرز اور پیٹرول پمپ مالکان نے نئی قیمتوں اور روزانہ کی بنیاد پر نرخ مقرر کرنے کی پالیسی پر تحفظات کا اظہار کیا ہے۔

پیٹرول پمپ ایسوسی ایشن کے چیئرمین نعمان علی بٹ نے کہا کہ اگر حکومت نے فیصلہ واپس نہ لیا تو آئندہ ہفتے احتجاج اور ہڑتال پر غور کیا جائے گا۔

انہوں نے مطالبہ کیا کہ نئی قیمتوں کے تعین سے قبل تمام متعلقہ اسٹیک ہولڈرز کو اعتماد میں لیا جائے۔

حال ہی میں سوشل میڈیا پر وائرل ہونے والے ایک پوڈکاسٹ میں نورین نیازی نے پاکستان اور بھارت کے درمیان مئی 2025 میں ہونے والی مختصر جنگ کے حوالے سے متنازع دعوے کیے ہیں۔ انہوں نے الزام عائد کیا ہے کہ یہ سب ایک خفیہ منصوبے کا حصہ تھا، جس کا مقصد پاکستان کو اسرائیل کو تسلیم کرنے پر آمادہ کرنا تھا۔

پوڈکاسٹ کے میزبان کی جانب سے آپریشن معرکہ حق کو پاکستان کے لیے فخریہ لمحہ قرار دینے پر نورین نیازی نے فوراً سے انہیں ٹوکا اور کہا کہ ’یہ کوئی فخریہ لمحہ نہیں بلکہ مودی کے ساتھ مل کر کیا گیا ایک ڈرامہ تھا‘۔

انہوں نے ایک اور مضحکہ خیز الزام عائد کیا جس پر میزبان بھی ہکا بکا رہ گیا۔ نورین نیازی کا کہنا تھا کہ ’مودی چاہتا تو انہیں دو منٹ میں فِکس کردیتا لیکن اسرائیل بیچ میں آگیا تھا‘۔ میزبان انہیں ٹوکتے رہے کہ پاکستان فوج کی شاندار کامیابی کی تو پوری دنیا مثالیں دے رہی ہے۔ جس انہوں نے پھر الزام عائد کیا کہ ’مودی اسرائیل کے کہنے پر جنگ سے پیچھے ہٹا تھا‘۔ اپنے اس مؤقف کی مزید توثیق کرتے ہوئے انہوں نے مزید دعویٰ کیا کہ اگر ایران جنگ شروع نہ ہوتی تو پاکستان اسرائیل کو تسلیم کرنے جا رہا تھا۔

اسی تسلسل میں انہوں نے امریکی صدر ڈونلڈ ٹرمپ کی جانب سے پاکستانی سیاسی اور عسکری قیادت کی تعریف کو بھی اسرائیل کو تسلیم کرانے کی مبینہ کوششوں سے جوڑنے کی کوشش کی اور اسرائیلی شخصیات سے ملاقاتوں کے الزامات بھی عائد کیے۔

گفتگو کے دوران نورین نیازی نے یہ بھی تسلیم کیا کہ ان کے یہ دعوے کسی مستند معلومات یا شواہد پر مبنی نہیں، بلکہ یہ ان کی ذاتی رائے اوراپنی سوچ ہے۔

نورین نیازی کے پوڈ کاسٹ کے کلپ منظر عام پر آنے کے بعد سوشل میڈیا پر نورین خان نیازی کے بیان پر شدید تنقید کی جارہی ہے اور سخت ردعمل کا اظہار کیا جارہا ہے۔

وزیرِ اطلاعات پنجاب عظمیٰ بخاری نے نورین نیازی کے وائرل بیان پر ردعمل دیتے ہوئے کہا کہ اس خاندان کو پاکستان کی ہر کامیابی سے تکلیف ہوتی ہے، نورین نیازی کا بیان ان کے بھائی کی سوچ کی عکاسی کرتا ہے۔

عظمیٰ بخاری کا کہنا تھا کہ پوری دنیا نے تسلیم کیا کہ پاکستان نے معرکہ حق میں بھارت کو عبرت ناک شکست دی جب کہ نورین نیازی کا بھارتی وزیراعظم نریندر مودی کے حق میں بات کرنا شرمناک اور قابلِ مذمت ہے۔

ان کا مزید کہنا تھا کہ معرکۂ حق میں پاک افواج اور فضائیہ کے شاہینوں نے تاریخی کارنامے سرانجام دیے، جن پر پوری قوم کو فخر ہے۔ بانی پی ٹی آئی اور ان کے خاندان کی جانب سے پاکستان کے لئے کوئی خیر کی توقع نہیں کی جا سکتی۔

سوشل میڈیا پر صارفین اس بیان پر شدید تنقید کرتے ہوئے نظر آرہے ہیں۔ ایک صارف وقار ستی نے اس بیان کو سیاسی اختلاف کے بجائے قومی مفادات پر حملہ قرار دیا۔ ان کا کہنا تھا کہ یہ بیان دراصل دشمن کے پروپیگنڈے کو تقویت دینے کی ایک کوشش ہے۔

فرحان ورک نامی صارف نے اس بیان پر تنقید کرتے ہوئے کہا کہ اس طرح کی زبان تو ارناب گوسوامی اور دیگر بھارتی اینکرز نے بھی پاکستان کے لیے استعمال نہیں کی جو عمران نیازی کے گھرانے کی جانب سے استعمال کی جاری ہے۔

ایک اور صارف کا کہنا تھا کہ پی ٹی آئی رہنماؤں کو اس بیان کی مذمت کرنی چاہیے اور نورین نیازی سے بھی پوچھنا چاہئے کہ وہ چاہتی کیا ہیں؟

ماہرین کے مطابق نورین نیازی کا گمراہ کُن بیان بھارتی بیانیے کو تقویت دیتا ہے، جسے اب بھارتی میڈیا پاکستان کے خلاف استعمال کرسکتا ہے۔

محکمہ موسمیات نے اسلام آباد میں آج شام یا رات کے اوقات میں اسلام آباد میں ہلکی بارش کا امکان ظاہر کیا تھا۔ ہفتے کے روز اسلام آباد میں موسم خشک اور مطلع جزوی طور پر ابر آلود نظر آیا، جس کی وجہ سے حبس میں بھی اضافہ ہوگیا تھا۔

دن کے وقت اسلام آباد کے مختلف علاقوں میں اچانک بارش سے شہر میں حبس کا زور ٹوٹا اور موسم خوش گوار ہو گیا ہے۔

پنجاب ڈیزاسٹر مینجمنٹ اتھارٹی (پی ڈی ایم اے) کے مطابق 19 سے 24 جولائی تک جاری رہنے والے مون سون بارشوں کے دوسرے اسپیل میں کم وقت میں زیادہ بارش ہونے کا امکان ہے، جس سے مختلف علاقوں میں سیلاب کا خطرہ بھی پیدا سکتا ہے۔

پی ڈی ایم اے نے خبردار کیا ہے کہ لاہور، راولپنڈی، فیصل آباد، گوجرانوالہ، سیالکوٹ اور ملتان سمیت بڑے شہروں میں اربن فلڈنگ کا خدشہ ہے۔

ادارے کے مطابق شدید بارشوں کے باعث سڑکوں، گلیوں اور نشیبی علاقوں میں پانی جمع ہونے کے مسائل پیدا ہو سکتے ہیں۔

پی ڈی ایم اے نے مزید بتایا کہ مری، گلیات اور نالہ لئی کے علاقوں میں برساتی نالوں میں طغیانی اور فلیش فلڈنگ کا خطرہ موجود ہے، جس کے پیش نظر متعلقہ اداروں کو تیار رہنے کی ہدایت جاری کر دی گئی ہے۔

وزیراعلیٰ پنجاب کی ہدایت پر ضلعی انتظامیہ، کمشنرز اور ڈپٹی کمشنرز سمیت تمام متعلقہ محکموں کو ہائی الرٹ رہنے کا حکم دیا گیا ہے تاکہ کسی بھی ہنگامی صورتِ حال سے بروقت نمٹا جا سکے۔

پی ڈی ایم اے نے شہریوں کو احتیاطی تدابیر اختیار کرنے کی اپیل کرتے ہوئے کہا ہے کہ خراب موسم کے دوران غیر ضروری سفر سے گریز کریں۔

ادارے کے مطابق آندھی، طوفان اور آسمانی بجلی گرنے کے دوران شہری محفوظ مقامات پر رہیں اور کھلے علاقوں میں جانے سے پرہیز کریں۔

پی ڈی ایم اے نے والدین کو بھی خبردار کیا ہے کہ وہ بچوں کو نشیبی علاقوں، جمع شدہ برساتی پانی، بجلی کی تاروں اور کھمبوں سے دور رکھیں تاکہ کسی حادثے سے بچا جا سکے۔

ادارے نے کہا ہے کہ کسی بھی ہنگامی صورتحال میں شہری پی ڈی ایم اے کی ہیلپ لائن 1129 پر فوری رابطہ کر سکتے ہیں۔

حکام کا کہنا ہے کہ بارشوں کے دوران عوام کی حفاظت کے لیے تمام متعلقہ اداروں کو ضروری اقدامات مکمل رکھنے کی ہدایت کر دی گئی ہے۔

سیکیورٹی فورسز نے بارودی مواد سے بھری ایک گاڑی کو خودکش حملے سے پہلے ہی نشانہ بنا کر تباہ کردیا، جس کے نتیجے میں ایک خارجی دہشت گرد ہلاک ہوگیا جبکہ پانچ دیگر زخمی ہوئے۔

سیکیورٹی ذرائع کے مطابق خفیہ اطلاعات کی بنیاد پر وانا اور گردونواح میں انٹیلیجنس بیسڈ آپریشن کیا گیا، جس دوران دہشت گردوں کی جانب سے تیار کی گئی بارودی مواد سے بھری گاڑی کا سراغ لگایا گیا۔

ذرائع کے مطابق سیکیورٹی فورسز نے اس گاڑی کی مسلسل تین روز تک نگرانی کی اور انتہائی احتیاط سے کارروائی کا وقت مقرر کیا۔

گاڑی کو اس وقت نشانہ بنایا گیا جب اسے آبادی سے دور لے جایا گیا تاکہ شہریوں کی جان و مال کو کسی قسم کا نقصان نہ پہنچے۔

سیکیورٹی ذرائع کا کہنا ہے کہ گاڑی میں موجود بھاری مقدار میں دھماکا خیز مواد کسی بڑے دہشت گرد حملے کے لیے استعمال کیا جانا تھا، تاہم بروقت کارروائی کے باعث وانا کی شہری آبادی کو ممکنہ تباہی سے بچا لیا گیا ہے۔

ذرائع کے مطابق کارروائی کے دوران سیکیورٹی فورسز نے پیشہ ورانہ مہارت کا مظاہرہ کرتے ہوئے نہ صرف دہشت گرد منصوبہ ناکام بنایا بلکہ معصوم شہریوں کے تحفظ کو بھی یقینی بنایا۔

سیکیورٹی حکام کا کہنا ہے کہ ملک سے دہشت گردی کے خاتمے کے لیے کارروائیاں جاری رہیں گی اور امن و امان کو نقصان پہنچانے کی کسی بھی کوشش کو ناکام بنایا جائے گا۔

ریسکیو ٹیم کے مطابق کوہ پیما چھوٹا کے ٹو کے بیس کیمپ جا رہے تھے کہ راستے میں حادثہ پیش آگیا۔

ریسکیو حکام کا کہنا ہے کہ راولپنڈی سے تعلق رکھنے والے 3 کوہ پیما زخمی ہوئے ہیں، جنہیں سیدو شریف اسپتال منتقل کردیا گیا ہے۔

ریسکیو حکام نے بتایا کہ ضلعی ایمرجنسی افسر سید شعیب منصور کی ہدایت پر فوری طور پر طبی ٹیم روانہ کی گئی ہیں، جس نے زخمیوں کو ابتدائی طبی امداد فراہم کرنے کے بعد سیدو شریف منتقل کیا۔

ریسکیو حکام کا کہنا ہے کہ لاپتا شخص کی تلاش جاری ہے، تاہم یہ واقعہ ایک دور افتادہ اور دشوار گزار پہاڑی علاقے میں پیش آیا ہے، جس کے باعث امدادی کارروائیوں میں مشکلات کا سامنا ہے۔

حکام کے مطابق سرچ آپریشن جاری ہے اور مزید پیش رفت سامنے آنے پر معلومات فراہم کی جائیں گی۔

ریسکیو ٹیم کے مطابق حادثے میں 3 کوہ پیما محفوظ رہے، جبکہ خوازہ خیلہ سے تعلق رکھنے والے کوہ پیما سید علی شاہ لاپتا ہیں، جن کی تلاش جاری ہے۔

حکومت نے پیٹرول کی قیمت میں 5 روپے 44 پیسے فی لیٹر اضافہ کر دیا ہے، جس کے بعد پٹرول کی نئی قیمت 316 روپے 15 پیسے فی لیٹر مقرر کر دی گئی ہے۔

اسی طرح ہائی اسپیڈ ڈیزل کی قیمت میں 31 روپے فی لیٹر کا بڑا اضافہ کیا گیا ہے، جس کے بعد ڈیزل کی نئی قیمت 354 روپے 35 پیسے فی لیٹر ہو گئی ہے۔ وزارت خزانہ کی جانب سے جاری نوٹیفکیشن کے مطابق نئی قیمتوں کا اطلاق فوری طور پر کر دیا گیا ہے۔

خیال رہے کہ 10 جولائی کو حکومت نے پٹرولیم مصنوعات کی قیمتوں میں اضافہ کرتے ہوئے نئی قیمتوں کا اعلان کیا تھا جس کے مطابق پٹرول 13 روپے 18 پیسے اور ڈیزل 13 روپے 80 پسے فی لیٹر مہنگا ہوا تھا۔

اس سے قبل وفاقی وزیرِ پٹرولیم علی پرویز ملک نے وزیرِ اطلاعات عطا تارڑ کے ہمراہ اسلام آباد میں پریس کانفرنس کرتے ہوئے کہا کہ حکومت پٹرولیم مصنوعات کی قیمتوں کے نظام کو ڈی ریگولیشن کی طرف لے جا رہی ہے۔ اسی پالیسی کے تحت پٹرولیم مصنوعات کی قیمتوں کے تعین کا اختیار اوگرا کو سونپ دیا گیا ہے۔

وفاقی وزیرِ پٹرولیم نے کہا کہ مشرقِ وسطیٰ کی موجودہ صورت حال کے باعث عالمی منڈی میں خام تیل کی قیمتوں میں دوبارہ شدید بھونچال دیکھنے میں آیا ہے اور ڈیزل کی عالمی قیمت 110 ڈالر سے بڑھ کر 140 ڈالر فی بیرل تک پہنچ چکی ہے۔

انہوں نے کہا کہ اوگرا اب روزانہ کی بنیاد پر پٹرول اور ڈیزل کی قیمتوں کا تعین کرے گی اور نئی قیمتیں اپنی ویب سائٹ پر جاری کرے گی۔ انہوں نے کہا کہ ویب سائٹ پر صرف نئی قیمتیں جاری نہیں کرے گی بلکہ یہ بھی واضح کیا جائے گا کہ پٹرول پمپ پر نظر آنے والی قیمت کن عوامل کی بنیاد پر مقرر کی گئی ہے۔

علی پرویز ملک نے کہا کہ روزانہ قیمتوں کے تعین کے لیے عالمی منڈی کی سات روزہ اوسط قیمت کو بنیاد بنایا جائے گا۔ اس فیصلے سے عوام پر بوجھ ضرور پڑ سکتا ہے، تاہم اس نظام کے ذریعے شہریوں کو یہ سمجھنے میں مدد ملے گی کہ پٹرولیم مصنوعات کی قیمتوں میں اضافہ کن ناگزیر وجوہات کے باعث ہوتا ہے۔

علی پرویز ملک نے کہا کہ عوام نے مشکل معاشی حالات میں تحمل کا مظاہرہ کیا، وزیراعظم شہباز شریف نے وعدہ کیا تھا کہ عالمی سطح پر قیمتوں میں کمی کا فائدہ براہِ راست عوام کو منتقل کیا جائے گا اور حکومت اس وعدے پر آج بھی قائم ہے۔

وفاقی وزیر نے کہا کہ عالمی مارکیٹ میں قیمتوں میں کمی کے باعث ڈیزل کی قیمت 520 روپے سے کم ہو کر تقریباً 300 روپے تک آئی، جبکہ پٹرول کی قیمت میں بھی 70 سے 80 روپے تک نمایاں کمی دیکھی گئی۔

انہوں نے کہا کہ ملک میں اس وقت ڈیڑھ سے دو ماہ کی ضرورت کے برابر پٹرولیم مصنوعات کا ذخیرہ موجود ہےجب کہ وزیراعظم نے پٹرولیم مصنوعات کی ذخیرہ اندوزی اور ناجائز منافع خوری کے خلاف سخت کارروائی کی بھی ہدایت کی ہے۔

وفاقی وزیرِ اطلاعات عطا تارڑ نے کہا کہ امریکا اور ایران کے درمیان کشیدگی کے باعث عالمی سطح پر پٹرولیم مصنوعات کی قیمتوں میں اضافہ ہوا ہے۔ ان کا کہنا تھا کہ سب کی یہی خواہش ہے کہ جنگ کے شعلے جلد ٹھنڈے ہوں اور خطے میں کشیدگی کے خاتمے اور استحکام کے لیے پاکستان اپنا کردار ادا کر رہا ہے۔

عطا تارڑ نے مزید کہا کہ جنگ سے پہلے کے مقابلے میں اس وقت پٹرولیم لیوی کی شرح کم ہے۔ انوہں نے کہا کہ مطابق پٹرولیم مصنوعات کی قیمتوں کا روزانہ تعین کرنے سے قیمتوں کے نظام میں مزید شفافیت آئے گی۔

انہوں نے مزید کہا کہ حکومت کسی بھی فرد یا گروہ کو ذخیرہ اندوزی یا مصنوعی بحران پیدا کر کے ناجائز منافع کمانے کی اجازت نہیں دے گی اور ایسے عناصر کے خلاف سخت کارروائی کی جائے گی۔

دوسری جانب پاکستان پیٹرولیم ڈیلرز ایسوسی ایشن کے وائس چیئرمین طارق حسن نے حکومت پر شدید تنقید کرتے ہوئے کہا ہے کہ موجودہ پالیسیوں کے باعث پیٹرول پمپ مالکان کے لیے کاروبار جاری رکھنا انتہائی مشکل ہو گیا ہے۔ ان کے مطابق ملک بھر میں تقریباً 14 ہزار پیٹرول ڈیلرز اس صورتِ حال سے متاثر ہو رہے ہیں۔

طارق حسن نے شکوہ کیا کہ وزیرِ پیٹرولیم ڈیلرز سے ملاقات تک کرنے کو تیار نہیں، جب کہ ان کا بنیادی مطالبہ پیٹرولیم ڈیلرز کا مارجن بڑھا کر 8 فی صد کرنا ہے تاکہ بڑھتے ہوئے اخراجات کے باوجود کاروبار کو جاری رکھا جا سکے۔

آل پاکستان پٹرول پمپ اونرز ایسوسی ایشن کے چیئرمین نعمان علی بٹ نے بھی حکومت کی مجوزہ پٹرولیم پرائس ڈی ریگولیشن پالیسی مسترد کرتے ہوئے خبردار کیا ہے کہ فیصلہ واپس نہ لیا گیا تو آئندہ ہفتے احتجاج اور ہڑتال پر غور کیا جائے گا۔

انہوں نے مطالبہ کیا کہ حکومت نئی پالیسی پر نظرثانی کرے اور پٹرول پمپ مالکان سمیت تمام اسٹیک ہولڈرز کو اعتماد میں لے، کیونکہ ان کے بقول مجوزہ نظام سے 15 ہزار پٹرول پمپ مالکان اور تیل کی ترسیل کا نظام متاثر ہوگا۔

پیٹرولیم ڈیلرز ایسوسی ایشن سندھ کے صدر امیر خان نے بھی حکومت کے مجوزہ ڈی ریگولیشن اور پیٹرولیم مصنوعات کی قیمتوں میں روزانہ تبدیلی کے فیصلے کو مسترد کرتے ہوئے کہا ہے کہ ڈیلرز کو اس پالیسی پر شدید تحفظات ہیں۔

انہوں نے خبردار کیا کہ یک طرفہ فیصلوں سے ملک میں افرا تفری پھیل سکتی ہے، جب کہ مطالبات تسلیم نہ کیے گئے تو پیٹرول پمپ مالکان کاروبار بند کرنے پر مجبور ہوں گے۔

ڈڈیال میں جلسہ عام سے خطاب کرتے ہوئے بلاول بھٹو زرداری نے کہا کہ آزاد کشمیر میں اس نوعیت کے حالات انہوں نے پہلے کبھی نہیں دیکھے۔ انھوں نے کہا کہ یہ صرف کشمیری عوام ہی نہیں بل کہ ریاست پاکستان اور سیاست دانوں کے لیے بھی ایک بڑا امتحان ہے، کیونکہ سیاست صرف اقتدار حاصل کرنے کا نام نہیں بل کہ عوام کی نمائندگی اور ان کے مسائل حل کرنے کا ذریعہ ہے۔

چیئرمین پیپلز پارٹی نے کہا کہ سیاست دانوں کی ذمہ داری ہے کہ وہ کشمیر کی آواز اسلام آباد تک پہنچائیں۔ ان کے مطابق یہ مسئلہ صرف آزاد کشمیر تک محدود نہیں بل کہ گلگت بلتستان کو بھی اسی نوعیت کے چیلنجز کا سامنا ہے، جب کہ ہر مسئلے کا حل سیاسی طریقے سے نکالا جا سکتا ہے۔

بلاول بھٹو نے کہا کہ جہاں کشمیریوں کا پسینہ گرے گا وہاں ہمارا خون گرے گا اور اگر کسی کشمیری کی آنکھ میں آنسو ہوگا تو ہماری آنکھوں میں بھی خون کے آنسو ہوں گے۔

چیئرمین پیپلز پارٹی نے آزاد کشمیر کے مسئلے کے حل کے لیے مصالحتی کمیشن قائم کرنے کی تجویز دیتے ہوئے کہا کہ حکومت اور احتجاج کرنے والے دونوں کمیشن کی رپورٹ آنے تک اپنے اپنے اقدامات روک دیں۔ انہوں نے افسوس کا اظہار کیا کہ اب تک نہ حکومت اور نہ ہی احتجاج کرنے والوں نے ان کی تجویز کا جواب دیا ہے۔ اگر ان کی تجویز قبول نہیں تو پھر بتایا جائے کہ اس بحران کا متبادل حل کیا ہے۔

ان کا کہنا تھا کہ احتجاج کرنا ہر شہری کا جمہوری حق ہے، مگر ایسا احتجاج جس کے نتیجے میں خوراک، ایندھن اور ادویات جیسی بنیادی ضروریات آزاد جموں و کشمیر تک نہ پہنچ سکیں، کسی بھی طور عوام کے مفاد میں نہیں۔ اس کا نقصان نہ حکومتِ آزاد جموں و کشمیر کو ہوتا ہے، نہ ریاستِ پاکستان کو، بل کہ اس کی قیمت صرف اور صرف کشمیری عوام ادا کرتے ہیں، جنہیں روزمرہ زندگی میں شدید مشکلات اور تکالیف کا سامنا کرنا پڑتا ہے۔

بلاول بھٹو نے کہا کہ کشمیر کا فیصلہ نہ اسلام آباد کی جیب میں ہے اور نہ ہی پنڈی کی، بل کہ کشمیر کے مستقبل کا فیصلہ صرف کشمیری عوام کے ہاتھ میں ہے۔ انہوں نے کہا کہ پیپلز پارٹی آزاد کشمیر میں بھی نفرت اور تقسیم کی سیاست کو شکست دے گی اور 27 جولائی کے انتخابات میں عوام اس کا عملی ثبوت دیں گے۔

انہوں نے خطاب میں کہا کہ وہ میرپور، کوٹلی، ڈڈیال اور راولاکوٹ سمیت پورے آزاد کشمیر کے عوام کو کشمیری مانتے ہیں، جب کہ مہاجرین کی نشستوں پر بھی پیپلز پارٹی بھرپور کامیابی حاصل کرے گی۔

بلاول بھٹو نے وفاقی وزیر خواجہ آصف کا نام لیے بغیر ان پر شدید تنقید کرتے ہوئے کہا کہ ایک وفاقی وزیر نے متنازع بیان دیا، انہیں وضاحت کا موقع بھی ملا، لیکن تیس دن گزرنے کے بعد بھی وہ آج تک اپنے مؤقف پر قائم ہیں۔ انہوں نے کہا کہ اگر کوئی وزیر آج بھی یہ سمجھتا ہے کہ میرپور، کوٹلی اور راولاکوٹ کشمیر کا حصہ نہیں تو پھر اسے وزارت چھوڑ دینی چاہیے۔

بلاول نے سوال اٹھایا کہ وزیراعظم قوم کو بتائیں کہ آیا یہ وفاقی وزیر کا ذاتی مؤقف ہے یا وفاقی حکومت کی سرکاری پالیسی؟ ان کے بقول دونوں باتیں ایک ساتھ نہیں چل سکتیں۔ اگر یہ حکومتی مؤقف نہیں تو ایسے وزیر کو کابینہ میں رکھنے کا کوئی جواز نہیں، بل کہ اسے فوری عہدے سے ہٹا دینا چاہیے۔

بلاول بھٹو نے کہا کہ کشمیر کے عوام کے ساتھ ایسی ناانصافی برداشت نہیں کی جا سکتی۔ انہوں نے ایک اور وفاقی وزیر کے اس بیان پر بھی تنقید کی کہ ”آزاد کشمیر کی 12 نشستیں ہماری جیب میں ہیں“، اور کہا کہ ایسی ذہنیت رکھنے والوں کو کشمیر کے عوام کے جذبات اور مسائل کی کوئی پروا نہیں۔

بلاول بھٹو نے مزید کہا کہ پیپلز پارٹی ہی آزاد کشمیر کے حقِ حاکمیت کی جدوجہد کر رہی ہے اور انتخابات کے بعد آئینی کنونشن بلا کر تمام سیاسی قوتوں کو ساتھ لے کر مسئلے کا مستقل حل نکالا جائے گا۔

واضح رہے کہ ’بی بی سی‘ اردو کے مطابق وزیر دفاع خواجہ آصف نے 22 جون کو نجی ٹی وی چینل ’سما‘ کو دیے گئے ایک انٹرویو کے دوران کہا تھا کہ ’راولاکوٹ، دھیر کوٹ اور۔۔۔ میں تو ویسے بھی راولاکوٹ والوں کو اتنا لمبا چوڑا کشمیری مانتا بھی نہیں ہوں۔ وہ اپر پوٹھوہار والی زبان ہی بولتے ہیں اور یہی حال میرپور والوں کا بھی ہے۔‘

پروگرام میں آزاد کشمیر میں گذشتہ کئی ہفتوں سے جاری کشیدگی اور کالعدم قرار دی گئی عوامی جوائنٹ ایکشن کمیٹی کے احتجاج پر بات ہو رہی تھی۔

خواجہ آصف نے ٹی وی انٹرویو کے دوران دیے گئے اپنے متنازع بیان سے متعلق بعدازاں سوشل میڈیا ’ایکس‘ پر ایک وضاحت بھی جاری کرتے ہوئے کہا تھا کہ وہ آج بھی اپنے مؤقف پر قائم ہیں۔ انہوں نے کہا کہ کشمیری شناخت کا تعین محض ”پیدائشی سرٹیفکیٹ“ سے نہیں بل کہ گزشتہ کئی دہائیوں کی جدوجہد اور قربانیوں سے ہوتا ہے اور آزاد کشمیر میں رہنے والوں کو مقبوضہ کشمیر کے عوام اور 1947 کے مہاجر کشمیریوں کی قربانیوں کو تسلیم کرنا چاہیے۔

واضح رہے کہ پاکستان پیپلز پارٹی کے چیئرمین بلاول بھٹو زرداری نے ڈدیال میں خطاب کے دوران خواجہ آصف کا نام لیے بغیر ان پر تنقید کی اور وفاقی کابینہ میں موجودگی پر بھی سوال اٹھایا۔ انھوں نے کہا کہ 27 جولائی کو نا صرف ہم پورے آزاد جموں و کشمیر سے شیر کا شکار کریں گے، بل کہ جو مہاجرین کی نشستیں پورے پاکستان میں ہیں جن کا آخری الیکشن ہے وہاں بھی عوام پاکستان پیپلز پارٹی کو کامیاب کریں گے۔

پولیس کے مطابق ناصر ڈوگر چند روز قبل بیرون ملک سے پاکستان واپس آیا تھا۔ واقعے کے وقت وہ گھر سے گراسری لینے مارکیٹ گیا ہوا تھا، تاہم واپسی پر اس نے اپنے تین بچوں کو مردہ حالت میں پایا، جب کہ اہلیہ کو تشویش ناک حالت میں اسپتال منتقل کیا گیا، جہاں وہ جانبر نہ ہو سکیں۔

جاں بحق ہونے والوں کی شناخت 40 سالہ علینہ، 16 سالہ ریحان، 11 سالہ عرشیہ اور 9 سالہ ارسل کے نام سے ہوئی ہے۔

ابتدائی تحقیقات میں پولیس کو شبہ ہے کہ بچوں کو زہر ملا کھانا کھلایا گیا، جب کہ خاتون نے بعد ازاں خود بھی وہی زہریلا کھانا کھایا۔

واقعے کے بعد پولیس، تفتیشی حکام اور فرانزک ٹیمیں جائے وقوعہ پر موجود ہیں اور شواہد اکٹھے کیے جا رہے ہیں، جب کہ چاروں لاشیں پوسٹ مارٹم کے لیے مردہ خانے منتقل کر دی گئی ہیں۔

پولیس کا کہنا ہے کہ ناصر ڈوگر کو مزید تفتیش کے لیے حراست میں لیا گیا ہے، جب کہ واقعے کی تمام پہلوؤں سے تحقیقات جاری ہیں اور حتمی حقائق پوسٹ مارٹم اور فرانزک رپورٹس کے بعد سامنے آئیں گے۔