آج کے اسمارٹ فونز کا سب سے بڑا مسئلہ بیٹری لائف ہی ہوتا ہے اور ڈیوائسز کو اکثر بہت جلد چارج کرنے کی ضرورت ہوتی ہے۔

مگر ایک چینی کمپنی نے 10 ہزار ایم اے ایچ بیٹری سے لیس فون متعارف کرادیا ہے جو بہت زیادہ سخت جان بھی ہے۔

ڈوجی ایس 88 نامی اسمارٹ فون کا ڈیزائن آئرن مین کے ہیلمٹ سے متاثر ہے جبکہ سخت جان فریم کے اندر 10 ہزار ایم اے ایچ بیٹری موجود ہے۔

اس کے بیک پر آئرن مین کے ڈیزائن میں 2 آنکھوں جیسی ایل ای ڈیز موجود ہیں جو کہ شوخ نوٹیفکیشن لائٹس کے لیے استعمال ہوتی ہیں، جبکہ اسٹاک اینڈرائیڈ 10 آپریٹنگ سسٹم دیا گیا ہے۔

فون میں 2 کسٹمائز بٹن بھی سائیڈ میں دیئے گئے ہیں جو مختلف کاموں میں مدد دیتے ہیں۔

دوسری جانب ایک فنگرپرنٹ ریڈر موجود ہے جبکہ این ایف سی سپورٹ بھی دی گئی ہے۔

مگر خاص بات 10 ایم اے ایچ بیٹری ہی ہے جو اسٹینڈ بائی پر ایک ماہ تک کام کرسکتی ہے یا تھری ڈی گیمز بھی مسلسل 19 گھنٹے تک کھیلی جاسکتی ہیں۔

کمپنی کا دعویٰ ہے کہ عام استعمال پر فون کو 7 سے 8 دن تک چارج کرنے کی ضرورت نہیں پڑتی جبکہ 10 واٹ وائرلیس چارجنگ سپورٹ بھی دی گئی ہے۔

فون ایک اور خاص بات اس کا سخت جان ہونا ہے اور ایک ہزار بار گرا کر دیکھا گیا اور سخت سطح پر ڈیڑھ میٹر اور ہموار سطح پر 2 میٹر بلندی سے گرنے پر اسے کچھ نہیں ہوا۔

اگر اسے پانی میں گریا جائے تو یہ ڈیڑھ میٹر گہرائی میں 2 گھنٹے رکھا جاسکتا ہے یا ایک میٹر پانی میں تو پورا دن بھی چھوڑا جاسکتا ہے۔

اسے آئی پی 69 کے ریٹڈ قرار دیا گیا ہے یعنی پانی کے شدید دباؤ اور درجہ حرارت سے بھی محفوظ رہتا ہے۔

اس کے ساتھ ساتھ یہ منفی 55 درجہ حرارت میں بھی 4 گھنٹے تک ٹھیک رہ سکتا ہے اور اگر اسے سورج کی تپش میں چھوڑ دیا جائے یا زیادہ مرطوب آب و ہوا یا تیزابی ماحول میں بھی محفوظ رہتا ہے، جس کی وجہ اس کی مضبوط سیل اور شاک پروف فریم ہے۔

یہ 6.3 انچ ڈسپلے سے لیس ہے جس کے ساتھ میڈیا ٹیک ہیلیو پی 70 پراسیسر دیا گیا ہے۔

اس کے علاوہ 6 جی بی ریم اور 128 جی بی اسٹوریج دی گئی ہے جس میں مائیکرو ایس ڈی کارڈ سے مزید اضافہ کیا جاسکتا ہے۔

فون کے بیک پر 3 کیمروں کا سیٹ اپ موجود ہے جس میں 21 میگا پکسل مین کیمرا ہے، جو 4 کے ویڈیو 30 فریم فی سیکنڈ پر ریکارڈ کرسکتا ہے۔

اس کے علاوہ 8 میگا پکسل الٹرا وائیڈ اور 8 میگا پکسل ڈیپتھ کیمرا بھی فون کا حصہ ہے۔

فون کے فرنٹ پر 8 میگا پکسل کیمرا ٹیئر ڈراپ نوچ میں دیا گیا ہے۔

اس فون کو فی الحال پری آرڈر میں فروخت کے لیے پیش کیا گیا اور 21 جون کو صارفین کو دستیاب ہوگا۔

اس کی قیمت 250 ڈالرز (41 ہزار پاکستانی روپے سے زائد) رکھی گئی ہے مگر پری آرڈر میں 200 ڈالرز (لگ بھگ 33 ہزار پاکستانی روپے) میں فروخت کیا جائے گا۔