کارکردگی بہتر کرنی ہے تو بجلی1روپیہ 54 پیسے فی یونٹ مہنگی کی جائے۔ کے الیکٹرک کی درخواست پر نیپرا میں سماعت ہوئی۔کے الیکٹرک حکام نے 2022 تک شارٹ فال ختم کرنے کا دعویٰ بھی کر ڈالا۔

کے الیکٹرک کی بجلی1روپیہ 54 پیسے فی یونٹ مہنگی کرنے کی درخواست پر نیپرا میں سماعت ہوئی۔کے الیکٹرک نے منافع کی شرح میں بھی 24.89فیصد اضافے کی درخواست کی ہے۔

نیپرا حکام نے کہا کہ کے الیکٹرک کو 2017 سے 2023 تک298 ارب روپے کی سرمایہ کرنی تھی۔کمپنی نے جون 2019 تک 227ارب کے مقابلے میں صرف 116ارب خرچ کئے۔

جس پر کے الیکٹرک حکام نے کہا کہ نیپرا کی ہدایات کے مطابق تمام سرمایہ کاری کریں گے۔گزشتہ تین سال کے دوران روپے کی قدر میں غیر معمولی کمی ہوئی، بجلی کی قیمت میں اضافے کی درخواست منظور کی جائے۔ بجلی مہنگی ہونے سے کے الیکٹرک کی کارکردگی میں بہتری آئے گی۔

کے الیکٹرک حکام نے 2022 تک شارٹ فال ختم کرنے کا دعویٰ کرتے ہوئے کہاکہ 2022 تک کراچی میں بجلی کی قلت ختم ہو جائے گی، طلب 4050 میگاواٹ اور پیداوار 4140 میگاواٹ ہو گی۔