کراچی: انٹربینک میں امریکی کرنسی کی قدر میں مسلسل کمی کے بعد اب معمولی اضافہ دیکھا گیا ہے۔ گزشتہ روز ایک پیسے کے اضافے کے بعد آج کاروباری ہفتے کے دوسرے روز بھی ڈالر 14 پیسے مہنگا ہوا ہے۔

اسٹیٹ بینک آف پاکستان کی جانب سے جاری کردہ اعداد و شمار کے مطابق منگل کے روز انٹربینک میں ڈالر 14 پیسے مزید مہنگا ہوا ہے جس سے اس کی قدر 158 روپے 17 پیسے سے بڑھ کر 158 روپے 31 پیسے ہوگئی ہے۔

واضح رہے کہ انٹربینک میں ڈالر کی قدر میں گزشتہ کئی دنوں سے مسلسل کمی کا رجحان دیکھا جارہا تھا، 14 اکتوبر سے اب تک امریکی کرنسی کی قدر 5 روپے 56 پیسے کم ہوچکی ہے۔

13 اکتوبر کو انٹربینک میں ڈالر 163 روپے 87 پیسے جبکہ آج 158 روپے 31 پیسے پر بند ہوا ہے۔ اس عرصے کے دوران امریکی کرنسی کی قدر 5 روپے 56 پیسے کم ہوچکی ہے۔