مسلم لیگ ن کے صدر شہباز شریف کہتے ہیں کہ تحریکِ انصاف نے قومی سیاست میں زہر گھول دیا ہے۔اب تو بات گالی سے شروع ہوتی ہے اور گالی پر ختم ہوتی ہے۔ ملکی حالات جس نہج پر پہنچ چکے ہیں کہ نیشنل ڈائیلاگ کی ضرورت ہے۔

جاتی امرا میں مسلم لیگ کے سربراہ شہباز شریف سے سینئر صحافیوں کی ملاقات ہوئی۔صحافیوں نے شہباز شریف سے انکی والدہ بیگم شمیم اختر کے انتقال پر اظہار تعزیت کیا اور مرحومہ کے درجات کی بلندی کے لئے دعا کی۔

غیر رسمی گفتگو کرتے ہوئے شہباز شریف کا کہنا تھا کہ ماں سے خالص دنیا میں کوئی رشتہ نہیں۔ دعاؤں کی چھتری چلی جائے تو واپس نہیں آتی۔

شہباز شریف نے کہا کہ حکومت نے معیشت سمیت ہر شعبے کو تباہ کر کے رکھ دیا ہے۔تاہم ملکی حالات اسقدر خراب ہو چکے ہیں کہ جو صرف اجتماعی کاوش سے ہی ٹھیک ہو سکتے ہیں۔ اس کےلئےتمام سیاسی جماعتوں کو قومی سطح پر مکالمہ کرنا ہو گا۔

مسلم لیگ ن کے سربراہ کا مزید کہنا تھا جیل میں والدہ کے انتقال کی اطلاع ملی لیکن بے بسی کے عالم میں بندہ کر بھی کیا سکتا ہے۔ والدہ خاندان کے تمام افراد سے انتہائی پیار کرتی تھیں۔