لاہور چیمبر آف کامرس نے حکومت سے گراسری سٹورز اور بیکریز کے اوقات کار رات دس بجے تک بڑھانے کا مطالبہ کر دیا۔ ایل سی سی آئی کے صدر طارق مصباح نے کہا ہے کہ اضافی اوقات کار سے کاروباری طبقے پر پریشر کم ہو گا۔

اپنے ایک بیان میں صدر ایل سی سی آئی نے کہا ہے کہ گراسری سٹورز، بیکریز اور کنفیکشنریز کو رات دس بجے تک کام کرنے کی اجازت دی جائے، یہ کاروبار براہ راست عوام سے جڑے ہوئے ہیں، اور ان کے اوقات کار میں اضافے سے عوام کو بھی بڑا ریلیف ملے گا۔

انہوں نے مزیدکہا کہ کورونا کی وجہ سے پیداشدہ صورتحال اور محدود اوقات کار کی وجہ سے کاروباری شعبے میں بہت تشویش پائی جاتی ہے، اوقات کار میں اضافے سے تاجروں پر مالی دباﺅ کچھ کم ہو گا۔

انھوں نے کہا کہ گروسری اسٹورز اور بیکریوں کو ایس او پیز کے ساتھ کام کرنے کیلئے اضافی اوقات کار کا اعلان کیا جائے۔ کاروباری برادری معیشت میں ریڑھ کی ہڈی ہے جو حکومت کو محاصل اور لوگوں کو روزگار مہیا کر رہی ہے۔