اسلام آباد میں اسپیکر ہاؤس میں حکومت اور پیپلز پارٹی کے وفود کے درمیان اہم ملاقات ہوئی۔ ذرائع کے مطابق اجلاس میں آئندہ مالی سال کے بجٹ اور سندھ کے ترقیاتی منصوبوں کے لیے فنڈز کے اجراء پر بات چیت کی گئی۔

ذرائع کے مطابق حکومت کی جانب سے اجلاس میں وزیر خزانہ محمد اورنگزیب، اعظم نزیر تارڑ، احسن اقبال اور احد چیمہ شریک ہوئے جبکہ پیپلزپارٹی کی نمائندگی شیری رحمان، نوید قمر، حنا ربانی کھر اور سلیم مانڈوی والا نے کی۔

اجلاس میں پبلک سیکٹر ڈیولپمنٹ پروگرام (PSDP) کے تحت سندھ کے منصوبوں پر خصوصی غور کیا گیا، تاہم ذرائع کے مطابق حکومت نے پیپلز پارٹی کے تحفظات کا کوئی مناسب جواب نہیں دیا۔

پیپلزپارٹی ذرائع کا کہنا ہے کہ حکومتی ارکان منصوبہ بندی اور فنانس سے متعلق تیاری کے بغیر اجلاس میں شریک ہوئے۔ پیپلز پارٹی سے کہا گیا کہ وہ اپنے تحفظات اور تجاویز پیش کرے تاکہ ان کی روشنی میں آئندہ منصوبہ بندی اور عملدرآمد کیا جا سکے۔

ذرائع نے مزید بتایا کہ حکومت اور پیپلزپارٹی کے درمیان اس معاملے پر اگلے مذاکرات مئی کے پہلے ہفتے میں متوقع ہیں۔