برطانیہ سمیت یورپی یونین میں اب 16 برس سے کم عمر افراد واٹس ایپ استعمال نہیں کرسکیں گے، اس سے قبل واٹس ایپ استعمال کرنے کے لئے کم سے کم 13 برس کا ہونا لازمی تھا تاہم سخت یورپین ڈیٹا پرائیویسی قوانین متعارف کرائے جانے کے بعد اس حد کو بڑھا دیا گیا ہے۔

رپورٹ کے مطابق اب واٹس ایپ اپنے صارفین کو نئی پرائیویسی پالیسی کی تصدیق کرتے ہوئے 16 سال یا اس سے زائد عمر ہونے کا اقرار کرنے کو کہے گا۔

اس سلسلے میں اب تک یہ بات معلوم نہیں ہوسکی ہے کہ واٹس ایپ اپنے صارفین سے پرائیویسی ایگریمنٹ پر ہی اقرار کروائے گا یا اس کے لئے کسی کاغذی کارروائی کی بھی ضرورت ہوگی۔

رواں ماہ 25 مئی کو نافذ ہونے والے نئے جنرل ڈیٹا پروٹیکشن ریگولیشن (جی ڈی پی آر) کے تحت اب یورپی صارفین کو اس بات کا حق حاصل ہوگیا ہے کہ کمپنیاں ان کا کونسا ڈیٹا محفوظ کریں اور کونسا ڈیلیٹ کریں۔

سنہ 2009 میں قائم ہونے والی واٹس ایپ کمپنی کے جنوری 2018 تک صارفین کی تعداد ڈیڑھ ارب تک پہنچ چکی تھی تاہم یورپی یونین کے اس اقدام سے واٹس ایپ کو ایک بار پھر مشکلات کا سامنا ہے۔