ممبئی: پاکستانی فلم ماہ میر نے دہلی میں ہونے والے دادا صاحب فلم فیسٹیول میں بہترین فلم اور بہترین موسیقی کے ایوارڈ جیت لیے ہیں۔

بھارت میں پاکستان اور بھارت کے درمیان امن کیلئے کام کر نے والے ہرش نارائن نے ماہ میر کی ٹیم کی جانب سے یہ ایوارڈز وصول کیے۔

فلم کے ہدایت کار انجم شہزاد نے بی بی سی سے گفتگو کر تے ہوئے بتایا کہ انہیں ایوارڈ حاصل کرنے بہت خوشی  حاصل ہوئی ہے اور ’یہ ہم سب کے لیے فخر کی بات ہے۔‘

انجم شہزاد نے مزید کہا کہ آج تک میر تقی میر پر فلم نہیں بنی تھی۔ ’اس فلم کا مقصد پیسے کمانا نہیں تھا بلکہ پاکستانی کام دنیا کو دکھانا تھا اور یہ مقصد پورا ہو گیا ہے۔‘

'بھارت میں ان حالات میں پاکستانی فلم کو ایوارڈ ملنا اس بات کا ثبوت ہے کہ فن روکا نہیں جاسکتا ۔ یہ کامیابی فن کی کامیابی ہے۔'

ماہ میر ایک نوجوان جمال کی کہانی ہے جو موجودہ دور میں میر کی وحشت کو سمجھنے کی کوشش میں خود اس کا شکار ہو جاتا ہے۔ یہ عشق ، جدائی ، روایت اور غریت سے بغاوت کی کہانی ہے۔

ماہ میر گذشتہ سال مئی میں ریلیز کی گئی تھی اور اسے ناقدین کی جانب سے بہت پزیرائی ملی تھی ۔ یہ فلم پاکستان کی جانب سے بہترین غیر ملکی فلم کے شعبے میں آسکر ایوارڈ کیلئے بھی نامزد کی گئی تھی ۔فلم نے گذشتہ برس گوام انٹرنیشنل ایوارڈ بھی اپنے نام کیا تھا۔