سردی کا موسم شروع ہوتے ہی بہت سے لوگ ذہنی تناو کاشکار ہوجاتے ہیں. دنیا میں بہت سارے اور لوگ موسم سرما میں اسی کیفیت کاشکار ہو جاتے ہیں لیکن کیاکبھی آپ نے اس کی وجہ تلاش کرنے کی کوشش کی ہے۔

دراصل اس اداسی کی وجہ موسمی تناو کے احساسات کی موجودگی ہے جس سے ہم شعوری طور پر لاعلم ہوتے ہیں۔ موسمی تناو ذہنی دباوہی کی ایک قسم ہوتی ہے جس کاتعلق موسم کے تبدیلی سے ہے۔ یہاں یہ بات بھی قابل ذکر ہے کہ اس تناو کااظہار سال کے مخصوص اوقات میں ہوتاہے۔ موسم سرماکے آغاز کے ساتھ ہی اس کے اثرات نمایاں ہونے لگتے ہیں جبکہ جنوری اور فروری کے مہینوں میں یہ بیماری شدت اختیارکرجاتی ہے۔

اس بیماری کی علامات میں ناامیدی، معمول کے کاموں میں عدم دلچسپی، اداسی کی کیفیت، غم وغصہ کے جذبات ذہنی دباو،رات کونیندکانہ آنا، دن بھرنیند کاغلبہ رہنااور بے چینی سرفہرست ہیں۔ اس سے جان چھڑانے کیلئے اپنی غذاکاخاص خیال رکھیں۔ میٹھا کھانے سے جس قدرممکن ہوا، اجتناب کریں‘ خصوصاََ چینی سے مکمل پرہیز کریں۔ ایسی غذائیں کھائیں جن میں پروٹین کی وافرمقدار پائی جاتی ہو۔ سردیوں میں خشک میوہ جات اس کابہترین ذریعہ ہوتے ہیں۔ اگرہوسکے تو کسی ماہرنفسیات سے ملیں کیونکہ اس کیفیت سے نکلنے کیلئے ٹاک تھراپی یعنی باتوں کے ذریعے علاج کوممکن بنایاجاسکتا ہے۔ ہمیشہ کمرے میں اندھیرا اور گھٹے ہوئے ماحول میں رہنے کی بجائے کچھ تبدیلیاں کیجئے۔

کھڑکیوں اور دروازوں کوکھول کر رکھیں۔ پردوں کوہٹاکررکھیں تاکہ باہرکی روشنی اندر آسکے۔ کوشش کیجئے پردوں کے انتخاب میں روشن اور گہرے رنگوں کا انتخاب کیاجائے۔ ہر وقت مایوسی کی کیفیت میں گھرے رہنے کی بجائے گھرسے باہر نکلیے دوستوں سے ملئے گپ شپ لگایئے اگرممکن ہوسکے تو صبح کے وقت اٹھ کر کم ازکم دوگھنٹے کسی پارک میں گزارئیے صبح کی تازہ ہوا میں سانس لینے سے بھی انسان فریش محسوس کرتاہے۔ ورزش کواپنا معمول بنایئے ورزش اور جسمانی سرگرمیاں مایوسی اور ذہنی تناو کی علامات کوکم کرنے کاسبب بنتی ہیں۔ اللہ کے ذکر سے بھی دل کوسکون ملتاہے۔ عبادات میں بھی دل لگانے کی کوشش کیجیے اور خوش رہیں۔اس طرح آپ سردی میں آ نے والے بہت سے مسائل سے محفوظ رہیں گے۔