سائنسدانوں کا کہنا ہے جذباتی  فلم دیکھنے سے سماجی ہم آہنگی اور آپس میں لگاؤ پیدا ہونے میں مدد ملتی ہے۔

آکسفورڈ یونیورسٹی کی ایک ٹیم کے تجربے میں یہ بات سامنے آئی ہے کہ المیہ(جذباتی) فلمیں یا دوسرے ڈرامائی فن پارے ہمارے اندر انڈورفنز نامی کیمیائی مادے کی گردش بڑھا دیتے ہیں اور یہ مادہ بہتر محسوس کرنے میں معاون ثابت ہوتا ہے۔

تحقیق کے مطابق یہ عمل قدرتی درد کش کے طور پر کام کرتا ہے اور اپنے آس پاس کے لوگوں کے درمیان قربت پیدا کرتا ہے۔

یہ تحقیق رائل سوسائٹی کے جرنل اوپن سائنس میں شائع ہوئی ہے۔

اس تحقیق کے سربراہ محقق پروفیسر روبن ڈنبر کا کہنا ہے کہ جب ہم شکاری برادریوں کی طرح ایک ساتھ رہنے لگے اس وقت سے قصہ گوئی انسانی دلچسپی کا باعث رہی ہے۔

پروفیسر ڈنبر نے کہا: فکشن کی عمرانیات کے تحت وسیع پیمانے پر تعلیم دی جاتی ہے اور اسے انسانی سماج کا خاصا کہا جاتا ہے اور یہ تمام تہذیب میں یکساں ہے۔ تاہم ابھی تک فکشن سے اس وابستگی اور اس کے اثرات کی وسیع پیمانے پر ماہر نفسیات یا ماہر حیاتیات نے وجوہات جاننے کی کوشش نہیں کی۔

اس کی سماجی وجوہات تو ہیں، جیسے اس سے ہم اپنی معلومات اور اقدار کو دوسری نسل تک پہنچاتے ہیں اور یہ ہمیں ایک دوسرے کے قریب لاتے ہیں۔ لیکن یہ پوری طرح اس بات کی وضاحت نہیں کرتا کہ ہم بار بار اس کی جانب کیوں رجوع کرتے ہیں اور محظوظ ہوتے ہیں۔

آکسفورڈ کی ٹیم نے رضاکاروں کو ایک بے گھر شخص اور اس کے پریشان کن بچپن پر مبنی فلم 'سٹوارٹ: اے لائف بیک ورڈ' دکھائی جبکہ دوسرے گروپ کو عام موضوعات پر دستاویزی دکھائی گئی پھر جانچ کرنے والی ٹیم نے فلم دیکھنے سے قبل اور بعد میں درد کی سطح کی جانچ کی جو کہ وہ انڈورفن کی جانچ کے لئے کرتے ہیں۔

پروفیسر ڈنبر نے کہا جن میں سب سے زیادہ جذباتی اثرات نظر آئے ان میں درد میں کمی کی سطح بھی زیادہ دیکھی گئی اور اپنے گروپ سے لگاؤ کا احساس بھی زیادہ تھا۔

بشکریہ:بی بی سی اردو