ممبئی : انڈر ورلڈ ڈان داود ابراہیم کی بہن حسینہ پر بولی وڈ میں بنائی جانیوالی فلم کا پہلا پوسٹر جاری کردیا گیا ہے۔ اداکارہ شردھا کپور نے پیر کو ٹوئٹر پر ایک فلم کا پوسٹر جاری کیا جو سوشل میڈیا پر بحث کا موضوع بن گیا ہے۔

انھوں نے فلم 'حسینہ' کا پوسٹر پوسٹ کیا تھا اور وہ اس فلم میں اہم کردار ادا کر رہی ہیں۔فلم کی شوٹنگ گذشتہ سال اکتوبر میں شروع ہوئی تھی اور پوسٹر سامنے آنے کے ساتھ اس کے پروموشن کا آغاز ہو گیا ہے۔

بائیوپک فلموں کے دور میں حسینہ پر فلم کے امکانات پہلے سے ظاہر کیے جا رہے تھے اور ادکار شکتی کپور کی بیٹی شردھا کپور نے پیر کو اس راز سے پردہ اٹھا دیا ہے۔

حسینہ پارکر کا انتقال سنہ  دوہزار چودہ میں جولائی میں دل کا دورہ پڑنے سے ہوا تھا۔ اکیاون سالہ حسینہ کو عرف عام میں حسینہ آپا اور انڈر ورلڈ 'ملکہ' کے نام سے پکارتی تھی۔

وہ اپنے بیٹے علی شاہ اور بیٹی کے ساتھ ناگپاڑہ کی گارڈن ہاؤس بلڈنگ میں رہتی تھیں اور یہ عمارت ٹھیک پولیس تھانے کے سامنے تھی۔

حسینہ کے انتقال کے وقت کچھ لوگوں نے داؤد ابراہیم کے بھارت آنے کا امکان ظاہر کیا تھا لیکن پولیس کو ایسی کوئی امید نہیں تھی۔

سن انیس سو اکانوے میں حسینہ پارکر کے شوہر ابراہیم پارکر قتل کر دیے گئے تھے۔

ممبئی پولیس نے ایک بار حسینہ کے خلاف تاوان وصول کرنے کا معاملہ درج کیا تھا۔ اس وقت حسینہ نے پولیس اور عدالت کو بتایا تھا کہ ابراہیم کے قتل کے بعد انھوں نے داؤد سے کبھی بات نہیں کی۔

این ڈی ٹی وی کے مطابق پولیس حکام کا کہنا ہے کہ یہ سچ نہیں ہے۔ داؤد نے جے جے ہسپتال میں گاؤلی کے شوٹرس پر حملہ کر کے بدلہ لیا تھا اور یہاں سے ہی حسینہ کا قد بڑھنا شروع ہوا تھا۔

یہ بھی کہا جاتا ہے کہ داؤد ابراہیم کے بھارت چھوڑنے کے بعد حسینہ ہی 'ڈان' کی پراپرٹی اور دوسرے کام کاج کا خیال رکھتی تھیں۔

پولیس حکام کے مطابق وہ بلڈروں سے کمیشن لیا کرتی تھیں۔ ان کا خیال ہے کہ وہ داؤد سے باقاعدہ رابطے میں تھیں۔

اپنے متنازع بیانات کے لیے بحث میں رہنے والے سماج وادی پارٹی کے رکن اسمبلی ابو عاصم اعظمی بھی حسینہ کے انتقال میں شامل ہوئے تھے۔

فلم میں حسینہ کا کردار شردھا کپور ادا کر رہی ہے جبکہ ان کے سگے بھائی سدھانت کپور فلم میں داؤد ابراہیم بنے ہیں۔ ان کے علاوہ شرمن جوشی پولیس انسپکٹر اور انکر بھاٹیہ حسینہ کے شوہر کے کردار میں نظر آئیں گے۔

Courtesy : BBC Urdu