اگرچہ کئی پاکستانی فلم اسٹارز بولی وڈ کی طرف رخ کرنے کی کوشش کررہے ہیں اور فواد خان، ماورا، ماہرا خان انہیں اسٹارز میں شامل ہیں تاہم بعض پاکستانی ستارے ایسے بھی ہیں جنہوں نے بھارت کی جانب سے کی گئی فلموں کی آفرز کو ٹھکرادیا ۔ ذیل میں ایسے ستارے بیان کیے گئے ہیں۔

شان شاہد

شان شاہد کا شمار بھی ایسے ہی اداکاروں میں ہوتا ہے جنہوں نے بولی وڈ میں کام کرنے کی پیشکش ٹھکرادیا۔ شان کا اپنے ایک انٹرویو میں کہنا تھا کہ ان کو بھی بولی وڈ کی ایک فلم میں کام کی پیشکش کی گئی تھی تاہم اس میں ان کا کردار منفی تھا، جس سے یہ تاثرمل رہا تھا کہ بولی وڈ کو ایک اور دہشت گرد چہرہ دکھانے کیلئے چاہیئے اور وہ پاکستانی ہیں جبکہ پاکستان میں لوگ ان کو بہت پسند کرتے ہیں، اسلئے انہوں نے اس کردار کو ٹھکرادیا۔

حمزہ علی عباسی

حمزہ علی عباسی کا شمار بھی انہیں ستاروں میں ہوتا ہے جنہوں نے بولی ڈ میں کام کرنے کی پیشکش کو ٹھکرادیا۔ حمزہ کا کہنا تھا کہ یہ فلم پاکستان مخالف تھی۔ بے بی نامی فلم میں اسلئے انہوں نے کام کرنا پسند نہیں کیا۔ حمزہ کا مزید کہنا تھا کہ وہ پاکستان میں ہی رہنا چاہتے ہیں اور انہیں بولی وڈ کی کسی پیشکش کا انتظار نہیں ہے۔

ہمایوں سعید

ہمایوں سعید کا شمار بھی پاکستان کے معروف فنکاروں میں ہوتا ہے اور کئی ڈراموں میں قسمت آزمائی کرنے کے بعد اب وہ فلموں میں اپنا جلوہ دکھارہے ہیں۔ تاہم ان کی گنتی بھی ان فنکاروں میں آتی ہے جنہوں نے ایک نہیں کئی بولی وڈ کی پیشکشوں کو ٹھکرادیا ہے۔ ہمایوں سعید کا کہنا ہے کہ ان کو ملک میں اتنا کام کرنا ہے ، جس کی وجہ سے بولی وڈ کیلئے ان کے پاس وقت بالکل نہیں ہے۔

فیصل قریشی

فیصل قریشی بھی بولی وڈ کی فلموں میں پیشکش کو ٹھکراچکے ہیں۔ فیصل قریشی کا کہنا تھا کہ انہوں نے یہ فلمیں اسلئے ٹھکرائی تھیں کیونکہ وہ سمجھتے تھے ، ان پراجیکٹس کا اسکرپٹ اتنا اچھا نہیں جتنا ہونا چاہیئے تھا۔ تاہم فیصل کا ماننا ہے اگر ان کو اچھا کام ملا تو ضرور وہ کسی فلم میں کام کرنا چاہیں گے۔

فہد مصطفی

فہد مصطفی کا شمار بھی پاکستان کے مشہور ٹی میزبانوں میں ہوتا ہے۔ فہد نے ایک شو میں بات چیت میں بتایا تھا کہ ان کو مہیش بھٹ کی جانب سے بولی وڈ میں کام کی آفر کی گئی تھی تاہم انہوں نے اس پر غور کرنا بھی مناسب نہیں سمجھا کیونکہ پہلے ہی ان کے پاس پاکستان میں بہت کام موجود ہے۔

صنم جنگ

صنم جنگ نے بولی وڈ کی پیشکش یہ کہہ کر ٹھکرادی کہ وہ فلم میں کسی بھی قسم کا بولڈ کردار ادا کرنا نہیں چاہیں گی۔ اور یہی وجہ تھی کہ انہوں نے بولی وڈ سے اجتناب کیا۔

فاطمہ آفندی

فاطمہ آفندی بھی پاکستان میں کئی ڈراموں میں کام کرچکی ہیں اور اب ملک میں ان کے کئی مداح ہیں۔ فاطمہ نے بھی بتایا کہ انہیں انیس بزمی کی جانب سے بولی وڈ میں فلم کی آفر کی گئی تھی لیکن انہوں نے یہ کردار یا فلم اس لئے ٹھکرادی کیونکہ اس میں ان کو بولڈ اداکاری کرنی تھی۔