دہلی:بھارت کی دہلی یونیورسٹی نے حال ہی میں بولی وڈ کنگ شاہ رخ خان  کا  ہنس راج کالج کا ایڈ مشن فارم   جاری کیا ہے جو دیکھتے ہی دیکھتے سوشل میڈیا پر وائرل ہوگیا ،وائرل ہونے کی وجہ اس میں کنگ خان کے انگلش کے مضمون کے مارکس ہیں جس نے سب کو گھما کر رکھ دیا۔

انڈین ایکسپریس کے مطابق  یہ فارم دہلی یونیورسٹی کے فیس بک پیج پر شیئر کیا گیا ہےجسے   متعدد  طلباء کی جانب سے ٹریک کیا گیا،فارم میں شاہ رخ خان کے انگلش کے مضمون میں   51 مارکس درج ہیں،اداکارکےکم نمبرز نے   ایک نئی بحث چھیڑ دی ہے کہ  کمزور انگلش ہونے کے باوجود خان عوامی مقامات پر اور تقریر کے دوران اتنی اچھی اور سلجھی ہوئی انگلش کیسے بول لیتے ہیں۔

حال ہی میں شاہ رخ کے بارے میں  کینیڈا میں  ٹیکنا لوجی ،انٹر ٹینمنٹ اور ڈیزائن (ٹی ای ڈی ٹاکس2017) میں کہا گیا تھا  کہ انہیں  اپنی زبان پر مہارت حاصل ہے  وہ  عقل مندی کے ساتھ   الفاظ کا چناؤ کرتے ہوئے انہیں اد اکرتے ہیں۔

پنک ولاکے مطابق   فارم کو سوشل میڈیا پر شیئر کرنے والے کا نام ابھی تک سامنے نہیں آسکا ہے لیکن   ہنس راج کالج کے  ایڈمن  ملہاج حسین نے فارم کے مستند ہونے تصدیق کی ہے۔

انہوں نے  شاہ رخ خان کی تعریف کرتے ہوئےکہا کہ  اگر آپ محنتی ہیں اور جانتے ہیں کہ آپ کو زندگی میں کیا حاصل کرنا ہے ،آپ کے مقاصد کیا ہیں  تو کوئی فرق نہیں پڑتا کہ آپ کے  نمبرز کیسے آئے  ، شاہ رخ کے علاوہ اس کی بہترین مثال اور کون پیش کرسکتا ہے؟

فیس بک پر شیئر کیا جانے والا یہ فارم اب تک ہزاروں طلباء کی توجہ اپنی جانب کھینچ چکاہے،اور جب بات کنگ خان کی ہو تولوگ  خود بخودکھنچے چلے آتے ہیں۔

خیال رہے کہ یہ پہلی بار  نہیں ہے کہ  جب خان  کا ایڈمشن فارم آن لائن لیک کیا گیا ہو ،گزشتہ چند ماہ قبل بھی  یہ فارم سوشل میڈیا پر شیئر کیا گیا تھا،لوگوں کی جانب سے اس فارم کو لے کر ہر طرح کا ردعمل ظاہر کیا جارہا ہے   ایک  طالبعلم کا اس حوالے سے کہنا تھا کہ "انگلش کے مضمون میں میرے نمبرز   شاہ رخ خان کے نمبرز سے  بہتر ہیں"۔

جبکہ ایک اور طالبعلم نے لکھا کہ "اس فارم کے ذریعے انگلش،پروفیشنلزم اور گریڈز کے درمیان رابطہ ظاہر ہوتا ہے"۔