کہتے ہیں جوڑے آسمان پر بنتے لیکن اس محاورے میں کتنی حقیقت ہے یہ تو خدا ہی جانے۔۔ تاہم ہم زمین پر رہنے والے جوڑے بناتے بھی ہیں اور مختلف وجوہات کی بناء پر جوڑوں میں علیحدگی بھی ہوجاتی ہے۔ شادی شدہ زندگی میں علیحدگی واقعی ایک بے حد پیچیدہ معاملہ ہے لیکن اس کے باوجود طلاق کی شرح میں دن بدن اضافہ ہی ہوتا جارہا ہے۔

آج ہم آپ کو سال 2017 میں علیحدگی اختیار کرنے والے مشہور جوڑوں کے بارے میں بتانے جارہے ہیں۔ یہ مشہور جوڑے اپنے کامیاب کیریئر کی طرح کامیاب شادی شدہ زندگی نہ گزار سکے۔ تو آئیے ملاحظہ کیجیئے اس سال کس کس نے راہیں جدا کیں۔

نور بخاری اور ولی حامد

اداکارہ نور اپنے کامیاب کیریئر کی طرح شادی شدہ زندگی کو کامیاب بنانے میں ناکام رہی ہیں۔ ان کی 4 شادیاں ہوچکی ہیں اور چاروں میں ہی ناکامی رہی۔ ان کی چوتھی شادی ولی حامد ہوئی تھی جو رواں برس اختتام پذیر ہوئی۔

میکال ذوالفقار اور سارا بھٹی

میکال اور سارا کی شادی 2010 میں ہوئی لیکن 7 سال جاری رہنے والی شادی کا اختتام رواں برس ایک انتہائی افسوس ناک طریقے سے ہوا۔ دونوں نے علیحدگی کا اعلان سوشل میڈیا پر کیا۔

نعمان جاوید اور جانا ملک

جانا ملک، نعمان جاوید کی دوسری اہلیہ تھیں۔ دونوں نے کئی مختلف مارننگ شوز میں شرکت کی اور ایک دوسرے سے مطمئن نظر آتے تھے۔ تاہم شادی کے محض 2 ماہ بعد ہی دونوں نے اپنی راہیں جدا کرلیں۔

اسد صدیق اور ماہم

اسد صدیق نے ماہم سے سال 2014 میں شادی کی۔ تاہم اب انہوں نے دوسری جگہ منگنی کرلی ہے لیکن جب لوگوں نے ان سے پہلی شادی کے حوالے سے سوالات پوچھے تو انہوں نے اپنی طلاق کے بارے میں سب کو بتادیا۔

زارا نور عباس

ان کی شادی سال 2016 میں ہوئی تھی جو کہ ناکام رہی۔ اب زارا کی منگنی اسد صدیق سے ہوگئی ہے۔

عفّان وحید

عفّان وحید نے رواں برس اپنی طلاق کی تصدیق کی ہے۔ لیکن انہوں نے لوگوں کو اس کی وجہ پوچھنے سے منع کردیا ان کا کہنا تھا کہ یہ ہمارا نجی معاملہ ہے۔