پتلے بال آپ کی شخصیت میں نکھار پیدا کرنے کے بجائے اس کو دیدہ زیب بنانے میں ناکام ہوجاتے ہیں۔ پتلے بالوں میں نہ ہیر اسٹائلنگ ہوسکتی ہے اور نہ ہی کوئی ہیر کٹ ان بالوں میں اچھا لگتا ہے۔

ذہنی دباؤ، غیر معیاری ہیر پروڈکٹس، ضرور ت سے زیادہ بال دھونے سے آپ کے بال پتلے ہوتے چلے جاتے ہیں۔

ذیل میں چند قدرتی ٹوٹکے بیان کیے جارہے ہیں، جن کے ذریعے آپ اپنے بالوں کو پھر سے گھنا اور مضبوط بناسکتے ہیں۔

انڈہ

انڈے چونکہ پروٹین سے مالامال ہوتے ہیں لہذا اس سے بہت کم وقت میں بال گھنے اور مضبوط ہوجاتے ہیں۔ اپنے بالوں کے حساب سے انڈوں کو لے کر اچھی طرح پھینٹ پھر گیلے بال کرکے جڑوں میں انڈہ لگاکر مساج کریں۔ پھر 30 منٹ بعد اپنے بالوں کو دھو لیں۔

ایواکاڈو

ایواکاڈو میں وٹامن ای موجود ہوتا ہے جوکہ بالوں کو لمبا کرنے میں اہم کردار ادا کرنا ہے۔ ایک پیالے میں 1  عدد ایواکاڈو میں ایک کچلا ہوا کیلا اور 1 کھانے کا چمچہ زیتون کا تیل شامل کرکے گاڑھا پیسٹ بنا لیں۔پھر اس پیسٹ کو بالوں کی جڑوں میں لگاکر مساج کریں اور 30 منٹ بعد بالوں کو دھولیں۔

پیاز

پیاز بھی بالوں کے لیے بے حد مفید ہے۔ پیاز میں سلفر بڑی تعداد میں موجود ہوتا ہے اور یہ بالوں کو گرنے سے روکنے میں مددگار ثابت ہوتا ہے۔ بالوں کی جڑوں میں کچی پیاز کا مساج کریں اور 30 منٹ بعد بالوں کو دھولیں،خیال رہے کہ بالوں کو شیمپو سے اچھی طرح دھوئیں۔

زیتون کا تیل

زیتون کا تیل آپ کے بالوں کی جڑوں کو مضبوط بنانےمیں اہم کردار ادا کرتا ہے۔ زیتون کے تیل کا بالوں کی جڑوں میں اچھی طرح مساج کریں۔ پھر 30 یا 45 منٹ چھوڑ دیں یا پوری رات کے لیے چھوڑ دیں۔ پھر شیمپو سے بالوں کودھو لیں۔

ناریل کا تیل

اوپر دیئے گئے طریقوں پر عمل کرکے  جب آپ کے نئے بال آجائیں تو ان بالوں کا خیال رکھنے کے لیے نیم گرم ناریل کے تیل کا سر پر مساج کریں اور 30 منٹ تک لگا رہنے دیں۔ پھر اپنے بالوں کو شیمپو سے دھولیں۔

نوٹ: یہ مضمون محض عام معلومات کے لیے ہے، اس پر عمل کرنے سے قبل اپنے معالج سے ضرور مشورہ کرلیں۔