قومی کرکٹ ٹیم کے مایہ ناز فاسٹ بولر وہاب ریاض کے ہاں دوسری بیٹی کی پیدائش ہوئی ہے جس کی خبر انہوں نے گزشتہ روز اپنے ٹوئٹر پر مداحوں کے ساتھ شیئر کی تھی۔

وہاب ریاض نے جیسے ہی ٹوئٹر پر اپنی دوسری بیٹی کی پیدائش سے متعلق بتایا تو مداحوں کی جانب سے انہیں مبارکبادوں اور نیک خواہشات کا سلسلہ شروع ہوگیا۔

انہوں نے ٹویٹ میں لکھا کہ 'میں نے اور میری فیملی نے آج حورین سکندر کو اپنی دنیا میں خوش آمدید کہا ہے، انہوں نے اللہ کا شکر ادا کرتے ہوئے بتایا کہیہ میری دوسری بیٹی ہے'۔

My family n I just welcomed Hoorain Sikandar in to our world, my second daughter Alhumdulilah
She’s in my arms as I write this tweet n my wife is smiling at me n well right next to me
there is no joy comparable to blessing n mercy a beti
Wish dad was around to hold her #happy🙏🏼☝🏼

— Wahab Riaz (@WahabViki) May 19, 2020

ٹویٹ میں انہوں نے مزید لکھا کہ 'میں اس وقت یہ ٹویٹ لکھ رہا ہوں اور میری بیٹی میرے ہاتھوں میں ہے جبکہ میری اہلیہ میرے برابر میں مجھے دیکھ کر مسکرا رہی ہیں'۔

انہوں نے مزید لکھا کہ 'دنیا کی کوئی خوشی بیٹی کی پیدائش کی خوشی کے مقابلے کے لائق نہیں ہے کیونکہ بیٹی اللہ کی رحمت ہوتی ہے اور اللہ تعالیٰ ایسے والدین پر رحم فرماتا ہے جن کے پاس بیٹیاں ہوں'۔

وہاب ریاض نے اس خواہش کا اظہار بھی کیا کہ 'کاش میرے والد میرے ساتھ ہوتے اور اسے اپنی گود میں اٹھاتے'۔

قومی کرکٹر کو بیٹی کی پیدائش پر ساتھی کھلاڑیوں سمیت متعدد معروف شخصیات کی جانب سے مبارکباد دینے کا سلسلہ جاری ہے۔

وہاب ریاض کی شادی 30 نومبر 2013 کو زینب چوہدری سے ہوئی تھی، اس سے قبل ان کی بیٹی عیشال ریاض بھی ہے۔