وزیراعلیٰ پنجاب عثمان بزدار نے والڈ سٹی آف لاہور اتھارٹی کے ملازمین کو مستقل کرنے کی منظوری دے دی۔

 وزیراعلیٰ پنجاب عثمان بزدار نے ملازمین کو مستقل کرنے کے حوالے سے کہا ہے کہ اس اقدام سے ملازمین میں عدم تحفظ کا احساس ختم ہوگا،والڈ سٹی آف لاہور اتھارٹی کا دائرہ کار پنجاب کے دیگر شہروں تک بڑھانے کا فیصلہ کیا گیا ہے جس کیلئے ضروری اقدامات کئے جا رہے ہیں۔

ان کا کہنا تھا کہ اتھارٹی کا دائرہ کار بڑھنے سے دیگر شہروں میں تاریخی عمارتوں کو اصل حالت میں بحال کرنے میں مدد ملے گی۔

عثمان بزدار کا کہنا تھا کہ تاریخی عمارتوں کی بحالی سے شہروں کی خوبصورتی میں بھی اضافہ ہوگا، یہ اقدام سیاحت کے فروغ کا باعث بنے گا۔ تحریک انصاف کی حکومت سیاحت کے شعبہ کو پائیدار بنیادوں پر ترقی دینے کیلئے کام کر رہی ہے۔