قومی کرکٹ ٹیم کے دورہ انگلینڈ کے حوالے سے پی سی بی اور انگلش کرکٹ بورڈ کے درمیان رابطے جاری ہیں، پی سی بی قومی ٹیم کی قبل از وقت انگلینڈ روانگی کے معاملے پر انگلش بورڈ کے جواب کا منتظر ہے۔

پی سی بی نے کورونا وائرس کے باعث ٹیم کی انگلینڈ روانگی سے قبل ٹریننگ کیمپ پاکستان میں نہ لگانے کا فیصلہ کیا، اضافی پریکٹس میچز اور ٹریننگ سیشنز کیلئے انگلش کرکٹ بورڈ سے بات چیت جاری ہے، انگلش بورڈ کے جواب کے بعد سلیکشن کمیٹی ٹیم کا انتخاب کرے گی۔

ٹیم کے انتخاب پرابتدائی مشاورت مکمل ہوچکی ہے، سیریز کا حتمی شیڈول طے ہونے کے بعد اسکواڈ کا اعلان کیا جائے گا۔

ٹیسٹ اور ٹی ٹوئنٹی سیریز کیلئے 25 کھلاڑی انگلینڈ جائیں گے، سینٹرل کنٹریکٹ اور ایمرجنگ کٹیگری کے 21 کھلاڑیوں کےعلاوہ دیگر آپشنز بھی زیرغور ہیں۔

پاکستان ٹیم اگست میں انگلینڈ کیخلاف 3 ٹیسٹ اور 3 ٹی ٹوئنٹی میچز کھیلے گی۔