سابق مشیر وزیراعلیٰ پنجاب زبیراحمد خان کو نامعلوم افراد نے مبینہ طور پر اغوا کرلیا جس کی سی سی ٹی وی فوٹیج سامنے آگئی ہے۔

زبیراحمد خان کو نامعلوم افراد کی گھر کے باہر سے اغوا کرنے کی سی سی ٹی وی فوٹیج سامنے آگئی جس میں دیکھا جاسکتا ان کو سادہ کپڑوں میں ملبوس افراد نے اغوا کیا۔

تحریک انصاف کی رہنما مسرت جمشید چیمہ نے زبیر احمد خان کے اغوا سے متعلق ٹوئٹ کردی ہے۔

زبیراحمد خان کے مبینہ اغواء کا مقدمہ راولپنڈی کے تھانہ ریس کورس پولیس نے نامعلوم ملزمان کے خلاف زبیراحمد خان کے ڈرائیور کی مدعیت میں درج کرلیا گیا ہے۔

ایف آئی آر کے مطابق زبیراحمد خان آفس سے گھر آرہے تھے کہ11 نامعلوم افراد 2 گاڑیوں اور تین موٹرسائیکلوں پر آئے اور انہوں نے زبیراحمد خان کو اغواء کرلیا۔

مقدمہ میں بتایا کہ ملزمان انہیں اسلحے کی نوک پرنامعلوم مقام پرلے گئے جبکہ جان سے مارنے کی دھمکیاں دیتے ہوئے گئے انہیں جان کا خطرہ ہے۔

پاکستان تحریک انصاف (پی ٹی آئی) کا اعلیٰ سطحی وفد آج الیکشن کمیشن آفس جائے گا۔

پی ٹی آئی رہنما شاہ محمود قریشی، اسد عمر اور دیگر چیف الیکشن کمشنر سکندر سلطان راجہ سے ملاقات کریں گے۔

ملاقات صبح ساڑھے 11 بجے الیکشن کمیشن کے ہیڈ کوارٹر میں ہوگی۔

پی ٹی آئی وفد ملاقات کے بعد میڈیا سے گفتگو بھی کرے گا۔

پی ٹی آئی قائدین ملاقات کے ایجنڈے پر تفصیل سے روشنی ڈالیں گے۔

پاکستان تحریک انصاف کے رہنماؤں نے کارکنوں کو زمان پارک پہنچنے کی ہدایت کردی۔

سماجی رابطے کی ویب سائٹ ٹوئٹر پر اپنے ٹویٹ میں پی ٹی آئی رہنما فواد چوہدری نے کہا کہ ‏حکومت مکمل بھوکھلا چکی ہے، عمران خان کی گرفتاری ملک کو بہت بڑے بحران میں دھکیل دے گی۔

فواد چوہدری نے اپنے ٹویٹ میں مزید کہا کہ لاہور اور گرد و نواح کے دوست زمان پارک پہنچیں، انشاء اللہ فتح عوام کی ہوگی۔

دوسری جانب پی ٹی آئی رہنما علی زیدی کا کہنا ہے کہ آج سپر ہائی الرٹ ہے، اسے معمولی نہ لیں، تمام لاہوری جلد از جلد زمان پارک پہنچیں۔

یاد رہے کہ گزشتہ روز لاہور میں پی ٹی آئی کارکنوں اور پولیس میں تصادم کے باعث علاقہ میدان جنگ بنا رہا۔

پولیس کی شیلنگ اور لاٹھی چارج سے علی بلال نامی ایک کارکن جاں بحق ہوگیا جبکہ عالیہ حمزہ سمیت کئی خواتین کارکنوں کی حالت غیر ہوگئی۔

دفعہ 144 کی خلاف ورزی پر متعدد کارکن زیرحراست ہیں، کارکن کی موت پر پی ٹی آئی نے رانا ثناء اللہ کے خلاف مقدمہ درج کرانے کا اعلان کیا ہے۔