پنجاب کے نئے وزیر داخلہ کے لئے مختلف ناموں پر مشاورت شروع ہوچکی ہے، وزرات داخلہ کیلئے راجہ بشارت، عمر سرفراز چیمہ اور اسلم اقبال کے ناموں پر غور کیا جارہا ہے۔

ذرائع کا کہنا ہے کہ عمران خان نئے وزیر داخلہ کے نام کا فیصلہ کریں گے۔

پنجاب کے موجودہ وزیر داخلہ کرنل (ر) ہاشم ڈوگر نے اپنا استعفا وزیراعلیٰ پنجاب چوہدری پرویز الہٰی کو پیش کردیا ہے۔

وفاقی وزیر داخلہ رانا ثناء اللہ کا کہنا ہے کہ پاکستان ایک ذمہ دار ریاست ہے، کسی سیاسی گروہ یا جماعت کو وفاق پر حملہ کرکے ریاست کو مفلوج کرنے کی اجازت نہیں دی جاسکتی۔

وزیرداخلہ رانا ثناء اللہ کی زیرصدارت وزارت داخلہ میں اہم اجلاس ہوا۔

اجلاس میں کہا گیا کہ شہر اقتدار پر کسی سیاسی جماعت کے ممکنہ لانگ مارچ کوروکنے کیلئے حکمت عملی بنا دی گئی ہے، کسی کو بھی اجازت نہیں دی جائے گی کہ دارالحکومت پرحملہ کرکے ریاست کو مفلوج بنائے۔

اجلاس میں وفاق، پنجاب ، کے پی، گلگت بلتستان اور آزاد جموں و کشمیرکے چیف سیکریٹریز اورآئی جیزسمیت چیف کمشنر اسلام آباد نے شرکت کی۔

اجلاس میں پی ٹی آئی کے وفاق پر ممکنہ چڑھائی کے حوالے سے حکمت عملی پر غورکے بعد شرکاء بے وفاق پرممکنہ حملے کی صورت میں آئین اورقانون کی مکمل پاسداری کرنے کی یقین دہانی کرائی۔

وزیر داخلہ رانا ثناءاللہ کا کہنا تھا کہ سیاسی جماعت کی طرف سے وفاق پر چڑھائی کےغیرقانونی اقدام کو روکنا صوبائی حکومتوں کی آئینی ذمہ داری ہے۔

انہوں نے کہا کہ کسی سیاسی جماعت ،گروہ یا مسلحہ جتھے کو وفاق پر حملہ آور ہونے اورریاست کو یرغمال بنانے کی اجازت نہیں دی جا سکتی۔

وزیر داخلہ واضح کیا کہ وفاق اور اس کی اکائیاں مل کر ایسے غیر آئینی اقدامات کو روکنے کی پیش بندی کریں گے۔

وزیرِ داخلہ پنجاب ہاشم ڈوگر نے اپنے عہدے سے استعفا دے دیا۔

ہاشم ڈوگر کا کہنا ہے کہ آج میں نے ذاتی وجوہات کی بنا پر عہدے سے استعفا دے دیا، تاہم پی ٹی آئی کے ادنیٰ کارکن کے طور پر کام کرتا رہوں گا۔

وزیرِ اعلیٰ پنجاب کے نام لکھے گئے استعفے میں ہاشم ڈوگر نے لکھا کہ صحت کے مسائل اور ذاتی مصروفیات کی وجہ سے وہ مزید عہدے پر برقرار نہیں رہ سکتے۔

چند روز قبل وزیر داخلہ نے اپنے ایک انٹرویو میں کہا تھا کہ لانگ مارچ ہوا تو پنجاب حکومت لانگ مارچ کے شرکاء کو کوئی سہولت فراہم نہیں کرے گی، تاہم شرکاء کو سیکیورٹی ضرور فراہم کی جائے گی۔

جس کے بعد سوشل میڈیا پر پی ٹی آئی کے کارکنوں نے ہاشم ڈوگر کو شدید تنقید کا نشانہ بنایا تھا۔

ہاشم ڈوگر کا استعفیٰ ایک ایسے موقع پر سامنے آیا ہے کہ جب وزیراعلیٰ پنجاب پرویز الہیٰ منگل کو لندن سے پاکستان واپس پہنچے ہیں۔

لندن میں حالیہ دنوں پی ٹی آئی کے منحرف اراکین علیم خان اور عون چوہدری نے مسلم لیگ (ن) کے قائد نواز شریف سے ملاقاتیں کی ہیں۔

سابق وزیر اعظم اور چیئرمین پاکستان تحریک انصاف (پی ٹی آئی) عمران خان نے کہا کہ مجھے گندا کرنے کے لئے یہ لوگ گندی گندی ویڈیوز تیار کر رہے ہیں۔

ننکانہ صاحب میں جلسے سے خطاب کرتے ہوئے عمران خان نے کہا کہ ہماری حکومت کے خلاف باہر سے سازش ہوئی جس کے تحت مجھے ہٹا کر ان کی نوکری کرنے والا وزیراعظم لایا گیا۔ . انہوں نے کہا کہ یہ سارے چور جمع ہو کر کسی نہ کسی طرح یہ مجھے عوام کے سامنے گندا ثابت کرنے کے لئے ڈیپ فیک ویڈیوز تیار کر رہے ہیں۔

عمران خان نے کہا کہ ڈیپ فیک آڈیو لیک اور فون ٹیپ کرنے پر سپریم کورٹ جا رہا ہوں، وزیراعظم آفس اور اس کے گھر کی سیکور لائن کو کس نے ٹیب کرکے لیک کیا۔

انہوں نے کہا کہ جو مراسلہ چھپایا گیا تھا وہ سامنے آگیا ہے، سائفر کی تحقیقات کے لئے کمیشن حکومت نہیں بنائے گی، اسی لئے تحقیقات جوڈیشل کمیشن کے ذریعے ہونی چاہئے۔

پی ٹی آئی چیئرمین کا مزید کہنا تھا کہ ہم کسی کی غلامی کرنے کو تیار تھے اور نہ ان چوروں کو این آراو دینا چاہتے تھے۔

پاکستان تحریک انصاف (پی ٹی آئی) کے سربراہ عمران خان سمیت 11 افراد کے خلاف فارن فنڈنگ کیس میں مقدمہ درج کرلیا گیا۔

کارپوریٹ بینکنگ سرکل کی جانب سے درج کئے گئے مقدمے میں کہا گیا کہ ملزمان نے فارن ایکسچینج ایکٹ کی خلاف ورزی کی۔

مقدمے کے متن کے مطابق ملزمان نجی بینک اکاونٹ کے بینفشری ہیں، پی ٹی آئی کا نجی بینک میں اکاؤنٹ تھا۔ نیا پاکستان کے نام پر بینک اکاؤنٹ بنایا گیا۔

مقدمے میں سردار اظہر طارق، سیف اللہ نیازی، سید یونس، عامر کیانی، طارق شیخ اور طارق شفیع کو بھی نامزد کیا گیا ہے۔

ایف آئی آر کے مطابق نجی بینک کے مینیجر کو بھی مقدمے میں شامل کیا گیا ہے، بینک مینجر نے غیرقانونی بینک اکاؤنٹ آپریٹ کرنے کی اجازت دی، نجی بینک کے سربراہ نے مشتبہ غیر قانونی تفصیلات میں مدد کی۔

متن کے مطابق بینک اکاؤنٹ میں ابراج گروپ آف کمپنی سے 21 لاکھ ڈالر آئے، ابراج گروپ نے پی ٹی آئی کے اکاؤنٹ میں پیسے بھیجے، ووٹن کرکٹ کلب سے دو مزید اکاونٹ سے رقم وصول ہوئی۔

ایف آئی آر میں کہا گیا کہ پی ٹی آئی نے عارف نقوی کا الیکشن کمیشن میں بیان حلفی جمع کرایا جو جھوتا اور جعلی ہے۔