اس حوالے سے غیر ملکی خبر رساں ادارے کو انٹرویو دیتے ہوئے ادیتیا کا کہنا تھا کہ کنگنا ایک پاگل لڑکی ہے۔ کیا آپ نے یہ بات محسوس نہیں کی کہ کوئی پاگل شخص ہی ہے جو اس طرح کی باتیں کر رہا ہے۔ ہم اس انڈسٹری میں بہت لمبے عرصے سے ہیں اور کسی بھی شخص نے ایسی باتیں نہیں کیں۔

انہوں نے کہا کہ میں اس حوالے سے اور کیا کہوں وہ ایک پاگل لڑکی ہے اور اگر میں کیچڑ میں پتھر پھینکوں گا تو چھینٹیں مجھ پر ہی آئیں گی۔ مجھے کنگنا کے ان الزامات سے کافی ٹھیس پہنچی ہے۔ میں کنگنا کے خلاف قانونی کارروائی کرنے جارہا ہوں کیونکہ وہ جھوٹ بول رہی ہیں۔

ان کا مزید کہنا تھا کہ میں دوسروں کے حوالے سے تو کچھ نہیں کہہ سکتا لیکن جہاں تک میرا تعلق ہے انہوں نے میرے حوالے سے سب کچھ جھوٹ بولا ہے میری فیملی بھی ان الزامات سے خاصی متاثر ہوئی ہے جس کی وجہ سے میں اور میری بیوی نے کنگنا کے خلاف قانونی چارہ جوئی کا فیصلہ کیا ہے۔

اس سے قبل کنگنا نے آپ کی عدالت میں یہ بات کہی تھی کہ "ادیتیا نے میرے لئے ایک اپارٹمنٹ لیا تھا جس میں میرے دوستوں کو آنے کی اجازت نہیں تھی وہ میرے لئے ایک قید خانے جیسا تھا۔ اس حوالے سے میں نے ان کی بیوی سے بھی بات کی اور کہا کہ میں آپ کی بیٹی سے بھی ایک سال چھوٹی ہی ہوں برائے مہربانی میری مدد کیجیئے لیکن انہوں نے بھی میری مدد کرنے سے انکار کردیا"۔

تاہم اب ایسا لگ رہا ہے کہ کنگنا کو ایک اور مقدمے کا سامنا کرنا پڑے گا اور وہ کسی طرح بھی اس جنگ کو ہارنے کو تیار نہیں۔