دنیا میں موجود ہر پھل انسان کی صحت کے لیے بہت فائدہ مند ہوتا ہے۔قدرت نے کوئی بھی ایساپھل نہیں بنایا کہ جس سے انسان کو کوئی نقصان پہنچے۔لیکن ایسا ضرور ہے کہ چند پھلوں کی زیادتی سے آپ کا وزن بڑھ سکتا ہے۔
لیکن اس کے ساتھ ساتھ قدرت نے ایک ایسا پھل بھی بنایا ہے کہ جس کو کھانے سے آپ کا وزن با آسانی کم ہو سکتا ہے۔اس پھل کی سب سے خاص بات یہ ہے کہ اس میںکیلوریزانتہائی کم ہوتی ہیںاور یہ بھوک کا فوری اور موثر علاج بھی ہے۔ وہ لوگ جو اپنا وزن کم کرنا چاہتے ہیں ان کو چاہیئے کہ اپنی روزانہ کی خوراک میں اس کو ضرور شامل کریں۔
اب آپ یقینا اس کشمکش میں ہونگے کہ آخر یہ پھل کون سا ہے؟ وزن کم کرنے میں سب سے مددگار پھل تربوز ہے، جس کو انسانی صحت کا بہترین دوست کہا جائے تو غلط نہیں ہوگا۔
ایک مناسب سائز کے تربوز میں کھانے کے لائق بیس کپ تربوز نکلتے ہیں، تربوز کے ایک کپ میں اننچاس کیلوریز موجود ہوتی ہیں، اس طرح ایک مکمل تربوز میں تقریباً ایک ہزار کیلوریز پائی جاتی ہیں، جوکہ ایک پورے دن کے لئے بہترین ہے۔
اگر آپ اپنا وزن کم عرصے میں گھٹانا چاہتے ہیں تو اس کے لئے آپ کو اپنے وزن کے ہر دس کلو گرام کو کم کرنے کے لیے ایک کلو گرا م تربوز کھانا ہو گا۔ تربوز کھانے کا سب سے بڑا فائدہ یہ ہے کہ اسے کھانے کے بہت دیر تک بھوک نہیں لگتی۔ کیونکہ انتہائی کم کیلوریز والا یہ پھل معدے میں کافی دیر تک رہتا ہے اور جو لوگ ڈائٹنگ کے لئے تربوز استعمال کرتے ہیں وہ صرف چند دنوں میں پانچ سے تین کلو گرام وزن کم کر سکتے ہیں۔تربوز کو کھانے کے لئے زیادہ سوچنے کی ضرورت نہیں ہوتی اسے آپ کاٹ کر کھائیں ،ٹھنڈا کر کے کھائیں یا تربوز کا شربت پئیں، تربوز میں پائے جانے والے فائبرز اور پروٹین بھی انسانی صحت کے لئے بہت زیادہ فائدہ مند ہیں۔
اس کے علاوہ یہ پھل جسم میں پانی کی مقدار کو پورا کرتا ہے جس کے باعث گرمیوں میں ڈی ہائیڈریشن نہیں ہوتی۔جب جسم میں پانی کی مقدار بالکل مناسب اور متوازن ہو گی تو پھر آپ کی جلد تروتازہ نہ رہے ایسا ہو ہی نہیں سکتا۔ چہرے کے داغ دھبے دور کرنے کے لئے بھی تربوز اہم کردار ادا کرتا ہے۔
یہ بات جان کے آپ کو حیرانگی ہوگی کہ ماہرین کافی تحقیق کے بعد اس نتیجے پر پہنچے ہیں کہ تربوز کے بیج امراضِ قلب اور ذیابطیس کے ساتھ ساتھ جلد کے لئے بھی بہت مفید ہیں۔
تربوز کے بیچوں میں شامل آئرن ، پوٹاشیم اور مختلف وٹامنز نہ صرف بالوں کو مضبوط کرتے ہیں بلکہ چہرے سے داغ دھبے بھی دور کرتے ہیں۔ زیادہ تر لوگ تربوز کے بیج نکال کر پھینک دیتے ہیں کیونکہ انہیں ان کے فوائد کے بارے میں علم نہیں ہوتا۔
