کراچی: سندھ اسپورٹس بورڈ سجاس انٹر میڈیا ٹی ٹوئنٹی کپ کے پہلے سیمی فائنل میں اے آر وائی ویب نے جیو نیوز کا باآسانی 9 وکٹوں سے ہرا کر ایونٹ کے فائنل میں جگہ بنالی۔

تفصیلات کے مطابق انو بھائی پارک پر کھیلے گئے سیمی فائنل میں جیو نیوز کے بولرز اے آر وائی ویب کیلئے تر نوالہ ثابت ہوئے اور 141 رنز کا مطلوبہ ہدف 9 اعشاریہ 5 اوورز میں ایک وکٹ پر حاصل کرلیا۔

اے آر وائی کے بدر عابدی 30 گیندوں پر 86 رنز کی تیز رفتار اننگز کھیل کر ناقابل شکست رہے۔ آؤٹ ہونے والے واحد بیٹسمین بابر خان نے 22 گیندوں پر 41 رنز کی اننگز کھیلی۔

اس سے قبل جیو نیوز نے پہلے بیٹنگ کرتے ہوئے مقررہ 18 اوورز میں 6 وکٹوں پر 140 رنز اسکور بنائے تھے۔ زوہیب حسن نے شاندار نصف سنچری اسکور کرتے ہوئے 45 گیندوں پر 53 رنز بنائے۔ اس کے علاوہ جعفر حسین 34 گیندوں پر 37 رنز بنا کر نمایاں رہے۔ اے آر وائی ویب کی جانب سے دانیال لطیف نے 22 رنز کے عوض 3 وکٹیں لیں۔

بدر عابدی کو 86 رنز کی دھواں دار اننگز کھیلنے پر میچ کا بہترین کھلاڑی قرار دیا گیا۔ تاخیر سے آغاز کے باعث میچ کو کپتانوں کی باہمی رضامندی سے 18 اوورز فی اننگز تک محدود کیا گیا تھا۔

واضح رہے کہ ایونٹ کا دوسرا سیمی فائنل پیر کو جی این این نیوز اور آج نیوز کے درمیان کھیلا جائے گا جبکہ ٹورنامنٹ کا فائنل منگل کو شیڈول ہے۔