روس کے علاقے قازان کے ایک اسکول میں فائرنگ کے واقعے میں کم از کم 11 افراد ہلاک ہو گئے جبکہ متعدد افراد کے زخمی ہونے کی بھی اطلاعات ہیں۔

غیر ملکی خبررساں ادارے کے مطابق اسکول پر مسلح افراد کے حملے میں ہلاک ہونے والے 11 افراد میں 09 بچے تھے۔ اس واقعہ میں زخمی ہونے والے 16 افراد کو اسپتال منتقل کر دیا گیا ہے۔

اطلاعات کے مطابق دو طالب علموں کی موت فائرنگ کے بعد تیسری منزل سے کودنے سے ہوئی۔

خبر رساں ایجنسی طاس نے اپنی رپورٹ میں بتایا کہ ابتدائی معلومات کے مطابق دو نامعلوم افراد نے اسکول میں گھس کر اندھا دھند فائرنگ کردی جس میں بڑی تعداد میں لوگوں کے ہلاک وزخمی ہونے کی اطلاعات ہیں۔

طاس کے مطابق قازان شہر کے اسکول میں زور دار دھماکے کی آواز سنی گئی جس کے بعد حکام نے مسلح شخص کو گرفتار کرلیا۔

ایک اور روسی خبر رساں ایجنسی انٹر فیکس نے ذرائع کے حوالے سے بتایا کہ اسکول میں فائرنگ دو حملہ آوروں نے کی، جن میں ایک سے متعلق خدشتہ ظاہر کیا جا رہا ہے کہ وہ تاحال عمارت کے اندر موجود ہے۔