پیپلزپارٹی رہنماء خورشید شاہ کےصاحبزادے ایم پی اے فرخ شاہ نے سپریم کورٹ کے حکم پر خود کو عدالت کے سامنے سرینڈر کردیا ۔عدالت نے نیب کو فرخ شاہ کو حراست میں لینے کے احکامات جاری کردیے احتساب عدالت کے جج کے رخصت پر ہونے کی وجہ سے کاروائی سیشن کورٹ میں ہوئی نیب نے فرخ شاہ کو حراست میں لے لیا۔

فرخ شاہ ان کے والد پیپلزپارٹی رہنماء خورشید شاہ،بھائی زیرک شاہ، بہنوئی صوبائی وزیر اویس شاہ سمیت 18 افراد کےخلاف سکھرکی احتساب عدالت میں ایک ارب 23 کروڑ روپے سے زائد کے اثاثے بنانے کے الزام میں نیب ریفرنس زیر سماعت ہے جس میں ضمانت کے لئے ایم پی اے فرخ شاہ نے سپریم کورٹ میں درخواست دائر کررکھی تھی. جس پر گزشتہ دنوں سماعت کے موقع پر سپریم کورٹ نے ان کو تین دن کے اندر خود کو احتساب عدالت کے سامنے سرینڈر کرنے کا حکم دیا تھا اور آج تین دن پورے ہونے پر انہوں نے احتساب عدالت کے جج کے رخصت ہونے کی وجہ سے خود کو تھرڈ ایڈیشنل سیشن جج کی عدالت میں پیش ہوکر خودکو سرینڈر کردیا۔

فرخ شاہ کے والد اور پیپلزپارٹی کے مرکزی رہنما سید خورشید احمد شاہ بھی نیب کی حراست میں ہیں۔