گزشتہ روز قومی اسمبلی اجلاس کے دوران حکومتی اور اپوزیشن اراکین کے درمیان ہونے والی ہنگامہ آرائی کے دوران تحریک انصاف کی خواتین اراکین اسمبلی کو بھی نشانہ بنایا گیا۔
حکومت اور اپوزیشن کے اراکین کی جانب سے ایک دوسرے کیلئے غیر اخلاقی زبان استعمال کرنے کے علاوہ ایک دوسرے پر بجٹ کتابیں بھی اچھالی گئیں۔
اسی ہنگامہ آرائی کے دوران تحریک انصاف کی ملیکہ بخاری کی آنکھ بجٹ کی کتاب لگنے زخمی ہوگئی، اور اب ان کی آنکھ ضائع ہونے کا خدشہ پیدا ہو گیا ہے۔
وزیر مملکت فرخ حبیب کا کہنا ہے کہ ملیکہ بخاری کو بجٹ بک ماری گئی، انہوں نے کہا ملیکہ بخاری کی آنکھ ضائع ہونے کا خدشہ ہے۔
فرخ حبیب نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ ڈاکٹر کے مطابق خاتون رکن اسمبلی ملیکہ بخاری پر اپوزیشن کی جانب سے حملہ کے باعث ان کی بائیں آنکھ کا کورنیا زخمی ہوگیا ہے۔ یہ کیسے لوگ ہیں جو پوری قیادت سمیت ایسے حملوں اور رویوں کو پروان چڑھا رہے ہیں۔
انہوں نے مزید کہا کہ خواتین کی عزت اور تقدس کا بھی انہیں کوئی خیال نہیں ہے۔
