کراچی: یونیورسٹی روڈ پر ریس لگانے کے دوران تیز رفتاری کے باعث مسافر بس الٹنے سے خاتون سمیت 4 مسافر زخمی ہوگئے۔

آج نیوز کے مطابق پولیس نے بتایا کہ صفورہ مین یونیورسٹی گیٹ نمبر ایک کے قریب تیز رفتار بس حادثے کا شکارہوئی، جس کے نتیجے میں خاتون سمیت 4 مسافر زخمی ہوئے۔

حادثہ دو مسافر بسوں میں ریس لگانے کے دوران پیش آیا جبکہ واقعے کی اطلاع ملتے ہی ریسکیو کا عملہ جائے حادثہ پر پہنچ گیا اور زخمیوں کو طبی امداد کیلئے اسپتال منتقل کردیا گیا۔

تاہم زخمیوں کی شناخت 42 سالہ سلیم ، 21 سالہ لاج ، 28 سالہ اشفاق اور 65 سالہ زینت کے ناموں سے کی گئی ہے جن کی حالت خطرے سے باہر بتائی جاتی ہے۔

پولیس نے مسافر بس کو تحویل میں لے کر ڈرائیور کی گرفتاری کیلئے تحقیقات شروع کردی ہیں۔