کراچی کے علاقے سائٹ میں سپر ہائی وے پر واقع اللہ بخش گوٹھ میں پولیس مقابلہ ہوا، دو طرفہ فائرنگ کے تبادلے میں ایک پولیس اہلکار سینے پر گولی لگنے سے شدید زخمی ہوا، جبکہ ایک ڈکیت ہلاک ایک زخمی حالت میں گرفتار کرلیا گیا۔
پولیس مقابلے میں مارا جانے والا ڈاکو انتہائی مطلوب نکلا، ملزم متعدد مرتبہ پہلے بھی گرفتار ہوچکا تھا۔ ہلاک ملزم تین سے چار ماہ قبل جیل سے چھوٹ کر باہر آیا تھا۔
زخمی اہلکار کو فوری طور پر آغا خان ہسپتال منتقل کیا گیا، ایس ایچ او اور دیگر افسران بھی نجی اسپتال پہنچ گئے۔
ایس ایچ او ادریس بنگش نے بتایاکہ چار پولیس اہلکار موٹر سائیکل پر گشت کر رہے تھے، گشت کے دوران مشتبہ افراد کو روکا تو ملزمان نے فائرنگ کردی۔
ایس ایچ او کا کہنا ہے کہ سپاہی کی حالت تشویشناک ہے، اسپتال میں طبی امداد فراہم کی جارہی ہے۔
پولیس کے مطابق گرفتار ملزم کا نام ارشد شریف جبکہ ہلاک ڈاکو کی شناخت اسلم کے نام سے ہوئی ہے۔
