ٹی 20 ورلڈ کپ میں بھارت کے بعد سُپر 12 مرحلے کے میچزمیں زمبابوے کے ہاتھوں مسلسل دوسری شکست کے بعد پاکستانی ٹیم کا سیمی فائنل میں پہنچنا کسی معجزے سے مشروط ہوگیا ہے۔

آخری اوورکی آخری گیند پر صرف ایک رن سے شکست جہاں پوری قوم پربجلی بن کرگری وہیں خود گرین شرٹس بھی اپنی پوزیشن سے شدید ڈسٹرب ہیں۔

دیکھنے والوں کو یاد ہوگا کہ نواز نے آؤٹ ہونے کے بعد میدان میں ہی منہ گھٹنوں میں چھپا کرشدید مایوسی کا اظہار کیا تھا۔ سوشل میڈیا پرایک اور ویڈیو وائرل ہے جس میں شاداب خان اس شکست کے بعد کونے میں زمین پر اکیلے بیٹھے شدت جذبات سے رورہے ہیں۔

اس دوران ٹیم سے کوئی ساتھی آکرشاداب کو تسلی دے کراٹھاتے ہیں اور اندرلے جاتے ہیں۔

اپ سیٹ شکست پرشاداب کے رونے نے دیکھنے والوں کے دل بھی پگھلا دیے جو گرین شرٹس کو تنقید کا نشانہ بنارہے تھے۔

بیشتر نے اپنے تبصروں میں انہیں دل شکستہ نہ ہونے اور آئندہ اچھا کھیلنے کا مشورہ دیا۔