کراچی کے علاقے کورنگی گودام چورنگی پر پولیس مقابلے میں ہلاک ملزمان آج زمان ٹاون میں شہید ہونے والے پولیس اہلکار کے قاتل نکلے۔

آج صبح زمان ٹاؤن 51 سی ایریا میں پولیس نے مشتبہ افراد کو روکا تو انہوں نے فائرنگ کردی، جس کے نتیجے میں ایک اہلکار زخمی ہوگیا۔

پینتیس سالہ زخمی پولیس اہلکارمنظور کو آغا خان اسپتال منتقل کیا گیا، جہاں وہ دوران علاج شہید ہوگیا۔

دوسری جانب ملزمان جائے وقوعہ سے فرار ہونے میں کامیابی کے بعد کورنگی گودام چورنگی پہنچے، جہاں ان کا سامنا ایک بار پھر دوسرے پولیس اہلکاروں سے ہوا۔

یہاں بھی پولیس اہلکاروں نے انہیں رکنے کا اشارہ کیا پر ملزمان نے فائرنگ کردی۔

پولیس اہلاکروں کی جانب سے جوابی فائرنگ کی گئی تو دونوں ملزمان ہلاک ہوگئے، جبکہ دونوں اہلکار بھی زخمی ہوئے۔

بعد ازاں، شہید ہیڈ کانسٹیبل منظور کے ساتھی اہلکار نے دونوں ملزمان کی شناخت کرلی۔