کراچی کے علاقے حسرت موہانی کالونی اور پاک کالونی میں رینجرز اور پولیس نے انٹیلی جنس معلومات کی بنیاد پرکارروائی کرتے ہوئے 4 ملزمان کو گرفتار کرلیا۔

ترجمان سندھ رینجرز کے مطابق گرفتار ملزمان چوری، ڈکیتی اور غیرقانونی اسلحہ سپلائی کرنے میں ملوث ہیں۔

ملزمان میں فدا حسین، عاشر قریشی، شاہی اسلام اور فاروق اسلام شامل ہیں، جن کے قبضے سے 5 پستول، ایک مشین گن، ایک کھلونا پستول، موٹرسائیکل اور موبائل فونز برآمد ہوئے ہیں۔

ترجمان سندھ رینجرز کا کہنا ہے کہ ملزمان کا 8 سے 10 افراد پر مشتمل گروہ ہے، جو 2020 سے کراچی کے مختلف علاقوں میں وارداتیں کرتے ہیں، ملزمان پی ٹی سی ایل کیبل کی چوری میں بھی ملوث ہیں، ملزمان کے دیگر ساتھیوں کی گرفتاری کے لئے چھاپے مارے جارہے ہیں، گرفتار ملزمان کو پولیس کے حوالے کردیا گیا۔