عدالت نے سلیمان شہباز و دیگر کی بریت درخواستوں پر وکلاء کو دلائل کیلئے طلب کرلیا
لاہور کی اسپیشل سینٹرل کورٹ نے منی لانڈرنگ کیس میں وزیراعظم شہباز شریف کے صاحبزادے سلیمان شہباز سمیت دیگر کی بریت درخواستوں پر وکلاء کو دلائل کے لئے طلب کرلیا۔
اسپیشل جج سینٹرل لاہور ون کے جج بخت فخر بہزاد کی رخصت کے باعث ڈیوٹی جج عبدالستار نے سلیمان شہباز کے خلاف شوگر مل کے ذریعے 16 ارب روپے کی منی لانڈرنگ کیس کی سماعت کی۔
سلیمان شہباز سمیت دیگر ملزمان عدالت میں پیش ہوئے۔ عدالتی اہلکاروں نے تمام ملزمان کی حاضری مکمل کی۔
فاضل جج کی رخصت کے باعث منی لانڈرنگ کیس کی سماعت نہ ہو سکی۔
عدالت نے کیس کی سماعت 11 مارچ تک ملتوی کرتے ہوئے ملزمان کے وکلاء کو بریت کی درخواستوں پر دلائل کے لئے طلب کرلیا۔
یاد رہے کہ ایف آئی اے نے عدالت کے روبرو بتایا تھا کہ سلیمان شہباز کے خلاف کوئی الزام ثابت نہیں ہو سکا، جس سے عدالت نے اتفاق نہیں کیا تھا۔
سلیمان شہباز کی آمد کے موقع پر لیگی کارکنان نے ان کے حق میں نعرے بازی اور گل پاشی کی۔