Aaj Logo

شائع 03 مئ 2023 11:27am

نواز شریف کو بیرون ملک بھجوانے کیخلاف درخواست ناقابل سماعت قرار دینے کی استدعا مسترد

لاہور ہائیکورٹ نے مسلم لیگ (ن) کے قائد نواز شریف کو بیرون ملک بھجوانے کے معاملے پر جے آئی ٹی تشکیل دینے کے لیے درخواست ناقابل سماعت قرار دینے کی وفاقی حکومت کے وکیل کی استدعا مسترد کردی۔

لاہور ہائیکورٹ کے جسٹس سلطان تنویر احمد نے شہری اظہر عباس کی درخواست پر سماعت کی۔

سماعت کا آغاز ہوتے ہی عدالت نے کہا کہ عدلیہ آخری فورم ہے پہلے مطمئن کیا جائے کہ کس انتظامی ادارے کے پاس گئے۔

جس پر درخواست گزار نے کہاکہ میں نے تمام اداروں اور عمران خان کو درخواستیں دیں مگر شنوائی نہیں ہوئی، عمران خان کو کچھ عرصہ پہلے درخواست دی کیوں کہ وہ دلوں میں زندہ ہیں۔

عدالت نے درخواست گزار سے استفسار کیا کہ عدالت کس بنیاد پر شہباز شریف کو نااہل قرار دے۔

درخواست گزار نے کہا کہ نوازشریف دھوکہ دے کر بیرون ملک گئے، کبھی وہ یورپ اور کبھی سعودی عرب کے دورے پر ہوتے ہیں مگر پاکستان نہیں آرہے۔

وفاقی حکومت کےوکیل نے کہا کہ درخواست گزار متاثرہ فریق نہیں ہے، متعلقہ فورم موجود ہونے کی بناء پر درخواست ناقابل سماعت ہے۔

عدالت نے درخواست ناقابل سماعت قرار دینے کی وفاقی حکومت کے وکیل کی استدعا مسترد کرتے ہوئے کہا کہ درخواست گزار کے سوالات بڑے اہم ہیں، درخواست گزار متعلقہ فورم سے رجوع کرنے کے بعد عدالت آیا۔

عدالت نے درخواست گزار کو مزید دستاویزات پٹیشن کے ہمراہ لف کرنے کی ہدایت کرتے ہوئے سماعت غیر معینہ مدت تک ملتوی کردی۔

Read Comments