الحاج پولیس چوکی پر دہشت گردوں کی فائرنگ سے پولیس اہلکار شہید ہوگیا۔
خیبرایجنسی کی تحصیل باڑہ میں واقع الحاج پولیس چوکی پر دہشت گردوں نے حملہ کردیا، اور فائرنگ کے نتیجے میں پولیس اہلکار شہید ہوگیا۔
پولیس حکام کے مطابق فائرنگ سے شہید ہونے والے اہلکار کی شناخت نسیم کے نام سے ہوئی، پولیس نے دہشت گردوں کے خلاف بھرپور جوابی کارروائی کی، تاہم حملہ آور فرار ہونے میں کامیاب ہوگئے۔
واقعے کی اطلاع ملتے ہی پولیس کی بھاری نفری جائے وقوع پر پہنچ گئی اور پولیس اہلکارنسیم کو اسپتال منتقل کردیاگیا، تاہم وہ جانبرنہ ہوسکا۔
حکام نے بتایا کہ پولیس نے سیکیورٹی فورسز کی مدد سے علاقے کو گھیرے میں لے کرسرچ آپریشن شروع کردیا۔ دوسری جانب پولیس ذرائع کا کہنا ہے کہ پولیس اہلکار سنائپر کے ذریعے نشانہ بنایا گیا ہے۔
