ملک میں عید الاضحیٰ کا تیسرا اور آخری روز ہے، مختلف شہروں میں قربانی کے بعد شہری تفریحی مقامات کا رُخ کررہے ہیں۔

عید کے تیسرے روز بھی کہیں اونٹ کی قربانی ہوئی تو کسی نے گائے قربان کرکے سنت ابراہیمی ادا کی تو کسی نے بکرا اور دنبہ قربان کیا۔

عیدالاضحیٰ کے تیسرے اور آخری روز بھی تقریح کا راؤنڈ چل رہا ہے۔ کراچی سمیت مختلف شہروں میں عوام نے تفریحی مقامات کا رُخ کرلیا ہے۔

شہر قائد میں ساحل سمندر ، چڑیا گھر اور سفاری پارک سمیت دیگر تفریحی گاہوں میں رش ہے۔ بچوں کے ساتھ بڑے بھی خوب انجوائے کررہے ہیں۔

ادھر شہریوں کی بڑی تعداد عید کی خوشیوں کو دوبالا کرنے چھانگا مانگا میں نیشنل پارک کا رخ کر رہے ہیں۔

شیخوپورہ میں عید کے تیسرے روز شہریوں کی بڑی تعداد نے پکنک منانے کے لئے تاریخی مقامات سمیت پارکوں کا رخ کرلیا ہے۔

جلالپور پیروالہ میں عید کے تیسرے روز بھی بچوں نے تفریح کیلئے پارک کا رخ کرلیا، جہاں بچے خوب انجوائے کرتے ہوئے دکھائی دیے۔

دوسری طرف گزشتہ روز کی طرح آج عید کے تیسرے روز بھی دعوتوں کا اہتمام کیا جارہا ہے۔ جو کل مہمان تھے وہ آج میزبانی کررہے ہیں۔ مہمانوں کی خاطر تواضع کے لئے ذائقہ دار پکوان تیار کیے جارہے ہیں۔