گاؤں ڈاگئی کے 18 خاندانوں کو دھمکی آمیز خطوط موصول ہوئے ہیں جن میں قتل کی دھمکیاں دیتے ہوئے کہا گیا ہے کہ بینک اکاؤنٹس سے پیسے اور طلائی زیورات نکلوا کر گھروں میں رکھیں، تاکہ ہم انہیں چوری کر سکیں۔

صوابی میں نامعلوم بھتہ خور سرگرم ہیں اور گاؤں ڈاگئی کے 18 خاندانوں کو بیک وقت دھمکی آمیز خطوط ارسال کئے گئے ہیں۔

نامعلوم ملزمان کی جانب سے ایک خط نما دھمکی آمیز پرچی بھیجی گئی ہے جس میں ہدایت دی گئی ہے کہ تمام خاندان اپنے بینک اکاؤنٹس میں رکھی ہوئی رقم اور سونا گھر میں منتقل کریں، بصورت دیگر آپ کو جان سے مار دیا جائے گا۔

ملزمان نے گاؤں کے ہی ایک رہائشی کے گھر میں ہونے والی ڈکیتی کا ذکر کرتے ہوئے مبینہ طور پر اعتراف جرم کیا ہے کہ وہ چوری ملزمان نے ہی کی تھی۔

دوسری جانب متاثرہ خاندانوں نے پولیس کو درخواست دے دی ہےاور پولیس نے مقدمہ درج کر لیا ہے۔

قبائلی عمائدین کا کہناہے کہ ہم غیرت مند لوگ ہیں، دھمکی میں آنے والے نہیں ہیں۔

پولیس حکام نے بعد میں دعوی کیا کہ مذکورہ گروہ کو گرفتار کر لیا گیا ہے۔