تحریک انصاف نے نگراں وزیراعظم انوار الحق کاکڑ اور چیف الیکشن کمشنر سکندر سلطان راجہ سے لاپتہ کیے گئے رہنمائوں و کارکنان کی بازیابی کا مطالبہ کردیا۔
سیکریٹری جنرل پی ٹی آئی عمر ایوب نے انوار الحق کاکڑ اور سکندر سلطان راجہ کو الگ الگ خطوط لکھ ڈالے جن کی نقول چاروں نگراں وزرائے اعلیٰ کو بھی بھجوا دی گئیں۔
عمر ایوب نے کہا کہ فرخ حبیب، صداقت عباسی، عثمان ڈار، اویس یونس، عرفان سلیم، عبدالکریم خان کے علاوہ عوامی مسلم لیگ کے سربراہ شیخ رشید کئی روز سے لاپتہ ہیں۔
انہوں نے کہا کہ ان تمام افراد کی جبری گمشدگیاں آئین میں فراہم کردہ بنیادی حقوق کی صریح خلاف ورزی ہے۔
عمر ایوب خان کا کہنا تھا کہ جب تک ان افراد کو رہا اور جبری گمشدگیوں کے ذمہ داران کوکٹہرے میں نہیں لایا جاتا، آئندہ عام انتخابات کی شفافیت پر سوالیہ نشان رہے گا۔
پی ٹی آئی نے خطوط میں استدعا کی کہ امید ہے جبری طور پر گمشدہ کیے گئے افراد کے معاملے کو سنجیدگی سے دیکھتے ہوئے متعلقہ اداروں کو ان کی فوری بازیابی کے احکامات جاری کیے جائیں گے۔
