کوٹ لکھپت میں گھر میں ڈکیتی کے دوران مزاحمت پر ڈاکوؤں کی فائرنگ سے خاتون جاں بحق ہوگئی، جب کہ مقتولہ کا سوتیلا بیٹا واردات کے بعد منظر سے غائب ہے۔

لاہور کے علاقے کوٹ لکھپت میں گھر میں ڈکیتی مزاحمت پر زخمی خاتون دم توڑ گئی۔ پولیس کا کہنا ہے کہ واردات کے بعد سے مقتولہ کا سوتیلا بیٹا بھی منظر سے غائب ہے۔

پولیس حکام نے واقعے سے متعلق بتایا کہ 2 ڈاکوؤں نے گھر کے اندر گھس کر لوٹ مارکی، اور گھر سے 50 ہزارروپے اور زیورات چھین کر فرار ہوگئے، اس دوران نبیلہ نامی خاتون نے مزاحمت کی تو ڈاکوؤں نے اس پر فائرنگ کردی، جس سے وہ زخمی ہوئی۔

واقعے کی اطلاع ملتے ہی پولیس اور ریسکیو کی ٹیمیں جائے وقوعہ پر پہنچیں اور خاتون کو اسپتال منتقل کردیا، جہاں دوران علاج زخموں کی تاب نہ لاتے ہوئے خاتون دم توڑ گئی۔

حکام کا کہنا ہے کہ واردات کا مقدمہ درج کرکے تفتیش شروع کردی ہے، تاہم شبہ ہے کہ مقتولہ کا سوتیلا بیٹا ڈکیتی کی واردات میں ملوث ہے، کیوں کہ واقعے کے بعد وہ غائب ہے۔