سندھ میں پولیس کے افسران اور اہلکاروں کے آئل اسمگلنگ اور جرائم میں ملوث ہونے کا انکشاف ہوا ہے اور اب تک 19 افسران کو معطل کیا جاچکا ہے، تمام کا تعلق کشمور، سکھر، خیرپور، شکارپور اور جیکب آباد سے ہے۔

غیر قانونی آئل کی اسمگلنگ اور دیگر جرائم میں ملوث سندھ پولیس کے 19 افسران اور اہلکاروں کو معطل کردیا گیا ہے، اور اس حوالے سے باضابطہ نوٹیفکیشن بھی جاری کردیا گیا ہے۔

افسران کے حوالے سے جاری رپورٹ میں بتایا گیا ہے کہ افسران و اہلکار نان کسٹم پیڈ گاڑیوں کی اسمگلنگ اور دیگرجرائم میں ملوث ہیں، ان افسران میں انسپیکٹر، سب انسپیکٹر، اسسٹنٹ سب انسپیکٹر کے علاوہ ہیڈ کانسٹیبل اور کانسٹیبل بھی شامل ہیں، اور تمام کا تعلق کشمور، سکھر، خیرپور، شکارپور اور جیکب آباد سے ہے۔

رپورٹ میں بتایا گیا ہے کہ معطل افسران و اہلکاروں کو کراچی گارڈن ہیڈ کوارٹر بھیجا گیا تھا، لیکن معطل افسران و اہلکار یہاں بھی مسلسل غیر حاضر ہیں۔

دوسری جانب متعلقہ پولیس افسر نے جرائم میں ملوث افسران و اہلکاروں کی تنخواہ روکنےکی درخواست کردی ہے۔