ملیر میں دو افراد کے قاتلوں کو گرفتار نہ کرنے پر عوام کا احتجاج، نیشنل ہائی وے بند
ملیر سومار گوٹھ میں نامعلوم افراد کی فائرنگ سےقتل ہونے والے دو افراد کے لواحقین اور اہل علاقہ نے قاتلوں کی عدم گرفتاری کے خلاف نیشنل ہائی وے پر دھرنا دے دیا ہے، جس کے باعث دونوں اطراف کا ٹریفک معطل ہونے سے عوام کو شدید مشکلات کا سامنا کرنا پڑرہا ہے۔
رواں سال 30 ستمبر کو گلشن حدید کے علاقے ملیر سومار گوٹھ میں نامعلوم افراد نے اسٹیٹ ایجنسی پر فائرنگ کرکے 2 افراد کو قتل کردیا تھا۔ قتل ہونے والے افراد کی شناخت عطر جوکھیو اور زوار کھوکھر کے ناموں سے ہوئی تھی۔
2 ماہ گزر جانے کے باوجود عطر جوکھیو اور زوار کھوکھر کے قتل میں ملوث ملزمان کی عدم گرفتاری کے خلاف سینکڑوں افراد نے نیشنل ہائی وے پر احتجاجی دھرنا دے دیا ہے۔
اس موقع پرپولیس اور رینجرز کی بھاری نفری بھی پہنچ گئی، مظاہرین نے پولیس کی جانب سے قاتلوں کی گرفتار میں عدم دلچسپی پر شدید نعرے بازی کی۔
دوسری جانب احتجاجی مظاہرین کی جانب سے دھرنے کے باعث نیشنل ہائی وے کے دونوں اطراف بند ہوگئے اور ٹریفک جام ہوگیا، جس سے عوام کو شدید مشکلات کا سامنا کرنا پڑرہا ہے۔