** کراچی میں گلشن معمار تھانے کی حدود میں پولیس وردی میں ملبوس ڈاکوؤں نے 2 گھروں میں واردات کرکے طلائی زیورات، موبائل فونز اور رقم لوٹ لی۔**

پولیس وردی میں ملبوس ملزمان فرید گوٹھ میں پہلے ایک گھر میں داخل ہوئے اور اہلخانہ کو ایک کمرے میں بند کرکے لوٹ مار کی۔

اس کے بعد ملزمان دیوار پھلانگ کر دوسرے گھر میں چلے گئے، یہاں بھی طلائی زیورات قیمتی موبائل فونز اور رقم لوٹی اور جاتے جاتے سی سی ٹی وی فوٹیج بھی ساتھ لے گئے۔

متاثرہ افراد کا کہنا ہے کہ ملزمان نے گھر کا صفایا کردیا، ڈاکوؤں کو گرفتار کرکے ہمارا سامان اور رقم واپس دلوائی جائے۔

ایس ایچ او گلشن معمار وقار قیصر کا کہنا ہے کہ وردیوں میں گروہ وارداتیں کررہا ہے، واقعہ کی تحقیقات کی جارہی ہیں، امید ہے جلد ملزمان کو گرفتار کرلیا جائے گا۔

یاد رہے کہ گلشن معمار میں دو روز قبل بھی پولیس وردیوں میں ملبوس دو پرائیویٹ گاڑیوں میں سوار سات سے زائد ملزمان ایک گھر سے لاکھوں روپے لوٹ کر فرار ہوگئے تھے۔