کوئٹہ میں پیپلزپارٹی کی بلوچستان خواتین ونگ نے ٹکٹوں کی غیر منصفانہ تقسیم پر پارٹی کے مرکزی دفتر پشین اسٹاپ پر احتجاجی دھرنا دے دیا۔
خواتین ورکرز نے صوبائی قیادت کی جانب سے اپنی قریبی رشتہ دار خواتین اور ساتھیوں کو ٹکٹ دئیے جانے کے تحفظات کے پیش نظر پارٹی کے دفتر کے باہر احتجاج کرتے ہوئے دھرنا دیا۔
خواتین رہنماؤں ثناء درانی اور دیگر نے اس موقع پر کہا کہ جب پارٹی جلسہ یا دیگر ایونٹ ہوتے ہیں تو وہاں ہم کارکنان قربانیاں دیتے ہیں مگر ٹکٹ دیتے وقت ایسے افراد کے نام لسٹ میں شامل کئے جا رہے ہیں جو چند دنوں قبل پارٹی میں شام ہوئیں یا پھر اپنے رشتہ داروں کے نام دیئے گئے۔
پیپلزپارٹی کی خواتین مظاہرین نے کہا کہ بلوچستان خواتین ونگ کی صدر کارکنان کے حقوق کے تحفظ میں ناکام ہیں۔
انہوں نے کہا کہ خواتین اور اقلیتی مخصوص نشستوں پر من پسند افراد کے نام دیئے گئے۔ مظاہرین نے چیئرمین بلاول بھٹو زرداری سے اپیل کی کہ وہ اس مسئلے کا نوٹس لے اور مخلص پارٹی کارکنوں سے انصاف کریں۔
