پاناما پیپرزکی تحقیقات کیلئے حکومت کی جانب سے کمیشن بنانے کی درخواست پر سپریم کورٹ کا موقف بھی سامنے آگیا،اپوزیشن کے بعد چیف جسٹس نے بھی مجوزہ کمیشن کے لئے حکومتی ٹی او آرز پر اپنے تحفظات کا اظہارکردیا۔

حکومت کو لکھے گئے خط میں واضح کیا گیا ہے کہ انیس سو چھپن کے ایکٹ کے تحت بنائے گئے کمیشن کا دائرہ اختیار انتہائی محدود ہوگا۔یہ کمیشن بے اختیار ہوگا اور سوائے بدنامی کے اسکا کوئی فائدہ نہیں۔خط میں کہا گیا ہے کہ کمیشن کے ٹی او آر اتنے وسیع ہیں کہ اگر ان کی بنیاد پر تحقیقات ہوئیں تو برسوں لگیں گے۔اس لئے حکومت سے کہا گیا ہے کہ کسی بھی کمیشن کی تشکیل سے پہلے ضروری ہے کہ ان تمام افراد، خاندانوں، گروپس اور کمپینز کی لسٹ فراہم کی جائے جنکی تحقیقات ہونا ہے۔ان افراد کی تعداد اور دیگر تفصیلات سے بھی آگاہ کیا جائے۔

خط میں لکھا گیا ہے کہ جب عدالت کو تک یہ تمام معلومات نہ فراہم کردی جائیں اور کمیشن کی تشکیل کیلئے مناسب قانون سازی نہ کرلی جائے اس وقت تک جوڈیشل کمیشن بنانے کے حوالے سے حکومتی خط کا حتمی جواب نہیں دیا جاسکتا۔