الیکشن کمیشن کی واضح ہدایات کے باوجود مختلف علاقوں میں انتخابی ضابطہ اخلاق کی خلاف ورزی دیکھنے میں آئی۔دونوں جماعتوں کے کارکن موٹر سائیکل اور کار ریلی کی صورت میں سڑکوں پر نعرے بازی کرتے دیکھے گئے۔ضابطہ اخلاق کی خلاف ورزیوں کی وجہ سے مختلف مقامات پر کارکن ایک دوسرے سے الجھتے رہے تاہم کوئی بڑا ناخوشگوار واقعہ پیش نہیں آیا۔

رواں سال کے دوران ہونے والے ضمنی انتخابات کے مقابلے میں حلقہ این اے ایک سو چون میں ووٹرز نے بڑھ چڑھ کر حصہ لیا۔خواتین کی بڑی تعداد نے بھی اپنا حق رائے دہی استعمال کیا۔امن و امان کی صورتحال برقرار رکھنے کے لیے دن بھر رینجرز اور پولیس کی بھاری نفری پولنگ اسٹیشنز کے اندر اور باہر تعینات رہی۔